ബെംഗളുരു: ഉപഭോക്തൃ താല്‍പ്പര്യങ്ങള്‍ക്കനുസരിച്ചുള്ള ഭക്ഷണം വിതരണം ചെയുന്ന മത്സരമേറിയ മേഖലയിലേക്ക് ഇനി മുതല്‍ ആമസോണും. രാജ്യത്തെ ശക്തരായ ഭക്ഷണ വിതരണ ശൃംഖലയായ സ്വിഗ്ഗിയ്ക്കും സോമാറ്റോയ്ക്കും പിന്നാലെയാണ് ആമസോണിന്റെ കടന്നു വരവ്. ഓണ്‍ലൈന്‍ വില്‍പ്പന രംഗത്ത് പ്രബലമായി മാറിയ ആമസോണിന്റെ ഈ പുതിയ ചുവടുവയ്പ്പ് വിപണി കീഴടക്കുമോ എന്ന ശങ്കയിലാണ് മറ്റ് എതിരാളികള്‍.
ബെംഗളുരുവിലെ തിരഞ്ഞെടുത്ത സ്ഥലങ്ങളില്‍ ഉപഭോക്താക്കളുടെ ആവിശ്യപ്രകാരം ഭക്ഷണം എത്തിക്കുന്നതിനുളള പ്രാഥമികമായ ഒരു പരീക്ഷണം ഇതിനോടകം തന്നെ നടന്നു കഴിഞ്ഞു. സ്വിഗ്ഗിയും സോമാറ്റയും ഭക്ഷണത്തിന്മേലുള്ള കിഴിവുകള്‍ ഒഴിവാക്കിയതും വിലയില്‍ കാര്‍ക്കശ്യം പുലര്‍ത്തുന്നതുമാണ് ആമസോണിന് പുതിയ സാധ്യതകള്‍ തുറന്നു നല്‍കിയത്. ഒപ്പം ഊബര്‍ ഈറ്റ്‌സ് ഇന്ത്യയില്‍ നിന്നും വിട വാങ്ങിയതും ഒരു കാരണമായി. 10 ശതമാനം ഓഹരിയ്ക്ക് പകരമായി കഴിഞ്ഞ മാസം ഊബര്‍ ഈറ്റ്‌സ് സോമാറ്റോയ്ക്ക് വിറ്റിരുന്നു.
ആമസോണ്‍ പ്രൈം പെയ്ഡ് സബ്‌സ്‌ക്രിപ്ഷന്‍ സേവനം പ്രയോജനപ്പെടുത്തിയ മുന്‍നിര ഉപഭോക്താക്കള്‍ക്കായി പലചരക്ക്, ഭക്ഷണം മുതല്‍ ഇലക്ട്രോണിക്‌സ്, ഗാര്‍ഹിക ഉല്‍പന്നങ്ങള്‍ വരെ സമഗ്രമായ ഒരു ഉല്‍പ്പന്ന പോര്‍ട്ട്‌ഫോളിയോ നിര്‍മ്മിക്കാനുള്ള ഒരു വലിയ പദ്ധതിയുടെ ഭാഗമാണ് ഭക്ഷണ വിതരണത്തിലേക്ക് പ്രവേശിക്കാനുള്ള ആമസോണിന്റെ നീക്കം. ആമസോണ്‍ സമയത്തെക്കുറിച്ച് ആശങ്കപ്പെടുന്നില്ല. നിങ്ങള്‍ ഒരു വിപണിയില്‍ അവസാനമായിരുന്നാലും വിജയിക്കാനുള്ള സാധ്യതകള്‍ എപ്പോഴും നിലനില്‍ക്കുന്നുണ്ട് എന്ന് ഒരു ഓണ്‍ലൈന്‍ ഉപഭോക്തൃ നിക്ഷേപകന്‍ പറഞ്ഞു.
ഉപയോക്താക്കള്‍ ചെലവഴിക്കുന്ന എല്ലാ വലിയ മേഖലകളും പിടിച്ചെടുക്കുകയും ആവര്‍ത്തിച്ചുള്ള വാങ്ങലുകള്‍ സൗകര്യപ്രദവും താങ്ങാനാവുന്നതും തടസ്സമില്ലാത്തതുമാക്കുകയും, അവ പ്രധാന നഗരങ്ങളില്‍ എത്തിക്കുക എന്നതുമാണ് ഇതിന്റെ ഉദ്ദേശ്യം - സ്ഥാപനത്തിലെ ഒരു ഉന്നത ഉദ്യോഗസ്ഥന്‍ പറഞ്ഞു. നിലവില്‍, ആമസോണിന്റെ ഭക്ഷ്യ വിതരണ പ്ലാറ്റ്‌ഫോം സ്വന്തം ജീവനക്കാര്‍ക്ക് മാത്രമായി തുറന്നിരിക്കുന്നു. കൂടാതെ നഗരത്തിലെ ജനസാന്ദ്രതയേറിയ അഞ്ച് മേഖലകളായ എച്ച്എസ്ആര്‍, ബെല്ലന്ദൂര്‍, ഹരളൂര്‍, മറാത്തഹള്ളി, വൈറ്റ്ഫീല്‍ഡ് എന്നിവിടങ്ങളിലെ റെസ്റ്റോറന്റുകളുടെ സഹകരണത്തോടെ പരീക്ഷണങ്ങള്‍ നടന്നുവരുകയുമാണ്.
10-15% കമ്മീഷനുകള്‍ വാഗ്ദാനം ചെയ്ത്, ഇന്‍ഫോസിസ് സഹസ്ഥാപകന്‍ എന്‍ആര്‍ നാരായണ മൂര്‍ത്തിയുടെ കാറ്റമരന്‍ വെന്‍ചേഴ്സിന്റേയും ആമസോണ്‍ ഇന്ത്യയുടേയും സംയുക്ത സംരംഭമായ പ്രയോണ്‍ ബിസിനസ് സര്‍വീസസ് ആമസോണില്‍ ലിസ്റ്റുചെയ്യുന്നതിന് ബ്രാന്‍ഡുകളുമായി കരാറുകളില്‍ ഒപ്പുവെച്ചിട്ടുണ്ടെന്ന് രണ്ട് റെസ്റ്റോറന്റുകളിലെ എക്‌സിക്യൂട്ടീവുകള്‍ സ്ഥിരീകരിച്ചു. സ്വിഗ്ഗിയും സൊമാറ്റോയും അതിന്റെ പങ്കാളികളായ റെസ്റ്റോറന്റുകളില്‍ നിന്ന് ഈടാക്കുന്നതിന്റെ പകുതിയോളമാണ് ഈ കമ്മീഷനുകള്‍.
ആമസോണിന്റെ ഭക്ഷ്യ വിതരണ ബിസിനസിന്റെ സമാരംഭം മാര്‍ച്ചിലായിരിക്കും നടക്കുക. ആമസോണ്‍ പ്രൈം നൗ അപ്ലിക്കേഷനില്‍ സേവനം സമാരംഭിക്കും എന്നും പദ്ധതികളെക്കുറിച്ച് അറിയുന്ന ഒരാള്‍ പറഞ്ഞു. ആമസോണിലെ ഡയറക്ടര്‍-പ്രൊഡക്റ്റ് മാനേജ്‌മെന്റ് രഘു ലക്കപ്രഗഡയാണ് ഈ സംരംഭത്തിന് നേതൃത്വം നല്‍കുന്നത്. ക്രമേണ, കൊറിയന്‍, ജാപ്പനീസ് ഉള്‍പ്പെടെയുള്ള പ്രത്യേക ഭക്ഷണവിഭവങ്ങള്‍ക്കായി റെസ്റ്റോറന്റുകളുമായി പങ്കാളിത്തമുണ്ടാക്കുമെന്നും എക്സ്‌ക്ലൂസീവ് ബ്രാന്‍ഡുകള്‍ വിപണിയിലെത്തിക്കാന്‍ ശ്രമിക്കുമെന്നും അദ്ദേഹം പറഞ്ഞു.
ഞങ്ങളുടെ ഉപഭോക്താക്കള്‍ക്ക് വേണ്ടി ഇത് നവീകരിക്കുന്നതില്‍ ഞങ്ങള്‍ വിശ്വസിക്കുന്നു. ഈ പ്രതിജ്ഞാബദ്ധതയുടെ ഭാഗമായി, ഞങ്ങളുടെ ഉപഭോക്താക്കളുമായി ബന്ധപ്പെടാനും സേവനം നല്‍കാനുമുള്ള പുതിയ മേഖലകളും അവസരങ്ങളും ഞങ്ങള്‍ നിരന്തരം വിലയിരുത്തുന്നു - ഒരു ആമസോണ്‍ വക്താവ് പറഞ്ഞു. ആമസോണ്‍ അതിന്റെ ഭക്ഷ്യ വിതരണ ബിസിനസ്സ് മെച്ചപ്പെടുത്തുന്നതിനും സ്വിഗ്ഗി, സോമാറ്റ എന്നിവയെ മറികടക്കുന്നതിനും ലോജിസ്റ്റിക്‌സ്, റെസ്റ്റോറന്റ് ഇക്കോസിസ്റ്റം, ടെക്‌നോളജി, മാര്‍ക്കറ്റിംഗ് എന്നിവയില്‍ കാര്യമായ നിക്ഷേപം നടത്തേണ്ടിവരുമെന്ന് ഈ മേഖലയിലെ വിദഗ്ധരും നിക്ഷേപകരും പറയുന്നു. നിലവിലുള്ള നിക്ഷേപകനായ ദക്ഷിണാഫ്രിക്കന്‍ ഇന്റര്‍നെറ്റ് ഭീമന്‍ നാസ്‌പേഴ്‌സിന്റെ നേതൃത്വത്തില്‍ കഴിഞ്ഞയാഴ്ച, സ്വിഗ്ഗി 113 മില്യണ്‍ ഡോളര്‍ സമാഹരിച്ചു. 350 മില്യണ്‍ ഡോളറിന് സോമാറ്റോ ഉബര്‍ ഈറ്റ്‌സ് ഇന്ത്യ സ്വന്തമാക്കി ഏതാനും ആഴ്ചകള്‍ക്കുള്ളിലാണ് ഇത് സംഭവിച്ചത്.
