ഇന്ത്യയില്‍ ഇന്ധന വിലക്കയറ്റം അടുത്ത മാസങ്ങളിലും അതിരൂക്ഷമായി തുടരുമെന്ന് റിപ്പോര്‍ട്ട്

3 years ago

ന്യൂഡല്‍ഹി: രാജ്യത്ത് ഇന്ധന വിലക്കയറ്റം അടുത്ത മാസങ്ങളിലും അതിരൂക്ഷമായി തന്നെ തുടരുമെന്ന് റിപ്പോര്‍ട്ട്. അസംസ്‌കൃത എണ്ണവില ബാരലിന് 100 ഡോളറിന് അടുത്തേക്ക് എത്തുമെന്നാണ് റിപ്പോര്‍ട്ട്. ഇതോടെ പെട്രോള്‍ വില 110 രൂപക്ക് മുകളിലേക്ക് കുതിക്കും. പെട്രോളും ഡീസലും ജി.എസ്.ടി. പരിധിയില്‍ കൊണ്ടുവരണമെന്ന് ആവശ്യപ്പെട്ട് പാര്‍ലമെന്റില്‍ പ്രതിഷേധം ശക്തമാക്കുമെന്ന് കോണ്‍ഗ്രസ് വ്യക്തമാക്കി.

അസംസ്‌കൃത എണ്ണവില ബാരലിന് 75 ഡോളറിലേക്ക് എത്തിയപ്പോള്‍ തന്നെ രാജ്യത്തെ പെട്രോള്‍ വില 100 രൂപക്ക് മുകളിലും ഡീസല്‍ 100 രൂപക്ക് അടുത്തുമാണ്. അസംസ്‌കൃത എണ്ണവില 100 ഡോളറിലേക്ക് എത്തുമെന്നാണ് ബാങ്ക് ഓഫ് അമേരിക്കയുടെയടക്കം വിലയിരുത്തല്‍. ഇതോടെ ഷോക്കടിപ്പിക്കുന്ന വിലക്കയറ്റമാകും രാജ്യത്തെ കാത്തിരിക്കുന്നത്. രണ്ടുമാസത്തിനുള്ളില്‍ പെട്രോള്‍ വില 110 രൂപ കടന്നേക്കും. ഡീസല്‍ നൂറ് രൂപക്ക് മുകളിലും. കേന്ദ്ര-സംസ്ഥാന നികുതിയും സെസും കുറക്കുക മാത്രമാണ് പരിഹാരം. അതിന് കേന്ദ്രവും സംസ്ഥാനങ്ങളും തയ്യാറല്ല. ജി.എസ്.ടി പരിധിയില്‍ പെട്രോളും ഡീസലും കൊണ്ടുവരണമെന്ന് ആവശ്യപ്പെട്ട് പാര്‍ലമെന്റില്‍ പ്രതിഷേധം ഉയര്‍ത്തുമെന്നാണ് കോണ്‍ഗ്രസ് പ്രതികരണം.

ഡീലര്‍ കമ്മീഷനുള്‍പ്പടെ 45 രൂപ 21 പൈസക്ക് വിപണിയില്‍ എത്തുന്ന പെട്രോളാണ് ലിറ്ററിന് 101 രൂപക്ക് മുകളില്‍ രാജ്യത്ത് വില്‍ക്കുന്നത്. ഡീസലും അതുപോലെ തന്നെ. എക്‌സൈസ് നികുതിക്കൊപ്പം പെട്രോള്‍ വിലയില്‍ 20 രൂപ സെസും കേന്ദ്രം ഈടാക്കുന്നു. അസംസ്‌കൃത എണ്ണ ഇറക്കുമതി ചെയ്താണ് പെട്രോളും ഡീസലും വേര്‍ തിരിക്കുന്നതെങ്കിലും വില നിശ്ചയിക്കുള്‍ അന്താരാഷ്ട്ര വിപണിയിലെ പെട്രോളിന്റെയും ഡീസലിന്റെയും വിലയാണ് മാനദണ്ഡം. നയങ്ങളിലെ മാറ്റം കൊണ്ട് മാത്രമെ ഇപ്പോഴത്തെ പ്രതിസന്ധി മറികടക്കാനാകൂ.

Related Articles