പാചകവാതക വില ഉയരുന്നു; ഗാര്‍ഹിക സിലണ്ടറിന് 25.50 രൂപ ഇന്ന് വര്‍ധിപ്പിച്ചു

3 years ago

ന്യൂഡല്‍ഹി: ഇന്ധനവില സര്‍വകാല റെക്കോര്‍ഡില്‍ തുടരുന്നതിനിടെ പാചകവാതക വിലയും കുതിക്കുന്നു. ഗാര്‍ഹിക സിലണ്ടറിന് 25.50 രൂപ ഇന്ന് വര്‍ധിപ്പിച്ചു. ഇതോടെ കൊച്ചിയില്‍ ഗാര്‍ഹിക സിലണ്ടറിന്റെ പുതുക്കിയ വില 841.50 രൂപയായി ഉയര്‍ന്നു. വാണിജ്യ ആവശ്യത്തിനുള്ള സിലണ്ടറുകളുടെ വിലയില്‍ 80 രൂപയുടെ വര്‍ധനവാണ് ഉണ്ടായിരിക്കുന്നത്. ഇതോടെ വാണിജ്യ ആവശ്യങ്ങള്‍ക്കുള്ള സിലണ്ടര്‍ ഒന്നിന് 1550 രൂപ നല്‍കേണ്ടി വരും. പുതുക്കിയ വില ഇന്ന് മുതല്‍ നിലവില്‍ വരും. തുടര്‍ച്ചയായ ഇന്ധനവില വര്‍ധനവിനെതിരെ പ്രതിഷേധം ആളിക്കത്തുന്നതിനിടയിലാണ് പാചക വാതകവിലയിലെ ഇരുട്ടടി. ജൂണ്‍ മാസം 17 തവണ പെട്രോള്‍, ഡീസല്‍ വില വര്‍ധിപ്പിച്ചിരുന്നു.

അതേസമയം, ഇന്ന് രാജ്യത്ത് പെട്രോള്‍, ഡീസല്‍ വില മാറ്റമില്ല. രാജ്യത്തെ പ്രധാന നഗരങ്ങളിലെല്ലാം ഇന്ധന വില സര്‍വകാല റെക്കോര്‍ഡില്‍ തുടരുകയാണ്. ബുധനാഴ്ചയും ഇന്ധനവിലയില്‍ മാറ്റമുണ്ടായിരുന്നില്ല. ചൊവ്വാഴ്ച പെട്രോള്‍ ലിറ്ററിന് 35 പൈസയും ഡീസലിന് 29 പൈസയും വര്‍ധിച്ചിരുന്നു. ആറു മാ?സത്തി?നി?ടെ 58 തവണയാണ് വില വര്‍ധിക്കുന്നത്. മുംബൈയില്‍ ഒരു ലിറ്റര്‍ പെട്രോളിന് 104.90 രൂപയും ഡീസലിന് 96.72 രൂപയുമാണ്. ബെംഗളൂരു- 102.11 / 94.54, ചെന്നൈ- 99.80/ 94.54, കൊല്‍ക്കത്ത- 98.64/ 92.03, ഡല്‍ഹി - 98.81/ 89.18 രൂപ എന്നിങ്ങനെയാണ് ഇന്നത്തെ നിരക്ക്.

12 സംസ്ഥാനങ്ങളില്‍ പെട്രോളിന് 100 രൂപ മറികടന്നു. രാജസ്ഥാന്‍, മധ്യപ്രദേശ്, മഹാരാഷ്ട്ര, ആന്ധ്രാപ്രദേശ്, തെലങ്കാന, കര്‍ണാടക, ജമ്മു കശ്മീര്‍, ഒഡീഷ, തമിഴ്നാട്, ലഡാക്ക്, ബിഹാര്‍, കേരളം എന്നിവിടങ്ങളിലാണ് പെട്രോള്‍ വില നൂറുപിന്നിട്ട് കുതിക്കുന്നത്. രാജസ്ഥാനിലെ ശ്രീഗംഗാനഗറില്‍ 110.05 രൂപയാണ് ഒരു ലിറ്റര്‍ പെട്രോളിന്. രാജ്യത്ത് ഏറ്റവും കൂടുതല്‍ വാറ്റ് നികുതി ഈടാക്കുന്ന സംസ്ഥാനമാണ് രാജസ്ഥാന്‍. ചരക്ക് കൂലി, ഡീലര്‍മാരുടെ കമ്മീഷന്‍, എക്‌സൈസ് തീരുവ, മൂല്യവര്‍ധിത നികുതി എന്നിവയുടെ അടിസ്ഥാനത്തിലാണ് ഇന്ധന വില നിശ്ചയിക്കുന്നത്. രാജ്യാന്തര വിപണിയില്‍ ക്രൂഡോയില്‍ വില ഉയര്‍ന്നുനില്‍ക്കുകയാണ്. യുഎസ് വെസ്റ്റ് ടെക്‌സാസ് ഇന്റര്‍മീഡിയറ്റ് ക്രൂഡോയിലിന് ബാരലിന് 73.70 ഡോളറിനാണ് വ്യാപാരം നടക്കുന്നത്. ബ്രെന്റ് ക്രൂഡിന് ബാരലിന് 75.13 ഡോളറാണ്.

Related Articles