സമ്പത്തില്‍ ലോക കോടീശ്വരന്മാരെ പിന്നിലാക്കി ഗൗതം അദാനി; ജെഫ് ബെസോസിനെയും ഇലോണ്‍ മസ്‌കിനെയും പിന്നിലാക്കി

5 years ago

ന്യൂഡല്‍ഹി: സമ്പത്ത് വര്‍ധനവില്‍ ലോക കോടീശ്വരന്മാരെയും പിന്നിലാക്കി ഗൗതം അദാനി. ആമസോണിന്റെ ജെഫ് ബെസോസിനെയും ടെസ്ലയുടെ ഇലോണ്‍ മസ്‌കിനെയും മറികടന്നാണ് അദാനി നേട്ടം സ്വന്തമാക്കിയത്. ബ്ലൂംബര്‍ഗ് ശതകോടീശ്വര പട്ടിക പ്രകാരമാണിത്. 2021 ല്‍ ഇതുവരെ 16.2 ബില്യണ്‍ ഡോളര്‍ ഉയര്‍ന്ന് ഏകദേശം 50 ബില്യണ്‍ ഡോളറിലേക്ക് (4,970 കോടി ഡോളര്‍) ആണ് അദാനിയുടെ സമ്പത്ത് ഉയര്‍ന്നിരിക്കുന്നത്. ഇന്ത്യയിലെ തുറമുഖങ്ങളില്‍ തുടങ്ങി വിമാനത്താവളങ്ങള്‍, ഡാറ്റാ സെന്ററുകള്‍, കല്‍ക്കരി ഖനികള്‍, ഊര്‍ജ പ്ലാന്റുകള്‍ വരെ നീണ്ടു കിടക്കുന്നതാണ് അദാനിയുടെ ബിസിനസ് സാമ്രാജ്യം. ഒരെണ്ണം ഒഴികെയുള്ള എല്ലാ അദാനി ഗ്രൂപ്പ് സ്റ്റോക്കുകളുടെയും ഓഹരികള്‍ ഈ വര്‍ഷം കുറഞ്ഞത് 50 ശതമാനമെങ്കിലും ഉയര്‍ന്നതായാണ് പുറത്തുവന്ന കണക്കുകള്‍ പറയുന്നത്.

അദാനി ടോട്ടല്‍ ഗ്യാസ് ലിമിറ്റഡ് 96 ശതമാനം, അദാനി എന്റര്‍പ്രൈസസ് 90 ശതമാനം, അദാനി ട്രാന്‍സ്മിഷന്‍ ലിമിറ്റഡ് 79 ശതമാനം, അദാനി പവര്‍, അദാനി പോര്‍ട്ടുകള്‍, പ്രത്യേക സാമ്പത്തിക മേഖലകള്‍ എന്നിവ 52 ശതമാനം, അദാനി ഗ്രീന്‍ എനര്‍ജി ലിമിറ്റഡ് എന്നിങ്ങനെയാണ് ഈ വര്‍ഷത്തെ വളര്‍ച്ചയുടെ തോത്. ഇതില്‍ അദാനി ഗ്രീന്‍ എനര്‍ജി ലിമിറ്റഡ് കഴിഞ്ഞ വര്‍ല്‍ഷം 500 ശതമാനത്തിലധികം വളര്‍ച്ചയാണ് കാഴ്ചവെച്ചത്.

അടുത്ത കാലത്ത് കമ്പനിയിലെ നിക്ഷേപത്തിലുണ്ടായ വളര്‍ച്ചയാണ് അദാനിയെ ബില്യണഅ ഡോളര്‍ ക്ലബിലെ ഏറ്റവും സമ്പന്നനാക്കിയത്. വിദേശ സ്ഥാപനങ്ങളായ പെട്രോളിയം റിഫൈനിങ് കമ്പനിയായ ടോട്ടല്‍ എസ്ഇ, യുഎസ് ഇക്വിറ്റി സ്ഥാപനമായ വാര്‍ബര്‍ഗ് പിന്‍കസ് എന്നിവയില്‍ അദാനി നിക്ഷേപം നടത്തിയിരുന്നു. ഡാറ്റാ സെന്റര്‍ ബിസിനസിലും അദാനി വരവറിയിച്ചിട്ടുണ്ട്. ഇന്ത്യയില്‍ ഒരു ജിഗാവാട്ട് ഡാറ്റാ സെന്റര്‍ ശേഷി വികസിപ്പിക്കുന്നതിനുള്ള കരാര്‍ കഴിഞ്ഞ മാസം അദാനി എന്റര്‍പ്രൈസസ് ലിമിറ്റഡ് ഒപ്പുവച്ചിരുന്നു.

Related Articles