ഇന്‍ഫോസിസില്‍ വീണ്ടും തൊഴിലവസരം; 500 പേരെ കൂടി നിയമിക്കാനൊരുങ്ങുന്നു

4 years ago

ഇന്ത്യയിലെ രണ്ടാമത്തെ വലിയ ഐടി സേവന സ്ഥാപനമായ ഇന്‍ഫോസിസ് 2023 ഓടെ യുഎസിലെ റോഡ് ഐലന്‍ഡില്‍ 500 അധിക ടെക് തൊഴിലാളികളെ നിയമിക്കാന്‍ പദ്ധതിയിടുന്നു. രാജ്യത്ത് 12,000 അധിക തൊഴിലാളികളെ നിയമിക്കുമെന്ന സമീപകാല പ്രഖ്യാപനത്തിന്റെ ഭാഗമായാണ് 500 പുതിയ ജീവനക്കാരെ കൂടി നിയമിക്കുമെന്ന് കമ്പനി പ്രഖ്യാപിച്ചിരിക്കുന്നത്. 2017 ല്‍ ഇന്‍ഫോസിസ് രണ്ട് വര്‍ഷത്തിനിടെ 10,000 അമേരിക്കന്‍ തൊഴിലാളികളെ നിയമിക്കാന്‍ പ്രതിജ്ഞാബദ്ധമായിരുന്നു, കൂടാതെ ഇന്നുവരെ യുഎസില്‍ 13,000 തൊഴിലവസരങ്ങള്‍ സൃഷ്ടിക്കുകയും ചെയ്തു.

ഈ മാസം ആദ്യം, ബെംഗളൂരു ആസ്ഥാനമായുള്ള കമ്പനി അടുത്ത രണ്ട് വര്‍ഷത്തിനുള്ളില്‍ 12,000 അമേരിക്കന്‍ തൊഴിലാളികളെ യുഎസിലെ തങ്ങളുടെ തൊഴില്‍ ശക്തിയില്‍ ഉള്‍പ്പെടുത്താന്‍ പദ്ധതിയിട്ടിരുന്നു. ഇന്‍ഫോസിസ് കഴിഞ്ഞ വര്‍ഷമാണ് റോഡ് ഐലന്‍ഡിലെ പ്രൊവിഡന്‍സില്‍ ഡിജിറ്റല്‍ ഇന്നൊവേഷന്‍ ആന്‍ഡ് ഡിസൈന്‍ സെന്റര്‍ തുറന്നത്. ഇന്ത്യാന, നോര്‍ത്ത് കരോലിന, കണക്റ്റിക്കട്ട്, റോഡ് ഐലന്‍ഡ്, ടെക്‌സസ്, അരിസോണ എന്നിവിടങ്ങളില്‍ യുഎസില്‍ ആറ് 'ടെക്‌നോളജി ആന്റ് ഇന്നൊവേഷന്‍ സെന്ററുകള്‍' കമ്പനി സ്ഥാപിച്ചു.

ഡൊണാള്‍ഡ് ട്രംപിന്റെ നേതൃത്വത്തിലുള്ള യുഎസ് ഭരണകൂടം എച്ച് 1 ബി വിസ ഉടമകള്‍ക്ക് വര്‍ക്ക് വിസകളില്‍ നിരവധി നിയന്ത്രണങ്ങള്‍ ഏര്‍പ്പെടുത്തിയിരിക്കുന്ന സമയത്താണ് കമ്പനിയുടെ ഈ നീക്കം. ജോലി നഷ്ടപ്പെട്ട ദശലക്ഷക്കണക്കിന് അമേരിക്കക്കാരെ സഹായിക്കുകയെന്ന ലക്ഷ്യത്തോടെ, ഇന്ത്യന്‍ ഐടി പ്രൊഫഷണലുകള്‍ക്കിടയില്‍ ജനപ്രിയമായ എച്ച് -1 ബി വിസകള്‍ മറ്റ് വിദേശ വര്‍ക്ക് വിസകള്‍ക്കൊപ്പം ഈ വര്‍ഷം ആദ്യം ട്രംപ് നിയന്ത്രണങ്ങള്‍ ഏര്‍പ്പെടുത്തിയിരുന്നു.

ഇന്‍ഫോസിസിന്റെ ഏറ്റവും വലിയ വിപണിയാണ് വടക്കേ അമേരിക്ക. വരുമാനത്തിന്റെ 61.5% ആണ് ഇവിടെ നിന്ന് ലഭിക്കുന്നത്. യൂറോപ്പ് (24%), ലോകത്തിന്റെ ബാക്കി ഭാഗങ്ങള്‍ (11.6%), ഇന്ത്യ (2.9%) എന്നിങ്ങനെയാണ് 2020 ജൂണ്‍ 30 വരെയുള്ള കണക്കുകള്‍. 2020 ജൂണ്‍ അവസാനത്തോടെ ഇന്‍ഫോസിസിന് 2,39,233 ജീവനക്കാരുണ്ടായിരുന്നു. വിസയുമായി ബന്ധപ്പെട്ട വെല്ലുവിളികളെ അതിജീവിക്കാന്‍ ഐടി കമ്പനികള്‍ കഴിഞ്ഞ കുറച്ച് വര്‍ഷങ്ങളായി യുഎസില്‍ തങ്ങളുടെ സാന്നിധ്യം വര്‍ദ്ധിപ്പിക്കുകയും അവിടുന്ന് തന്നെ നിയമനം നടത്തുകയുമാണ് ചെയ്യുന്നത്.

Related Articles