മില്‍മ പാലിന് ലിറ്ററിന് നാലു രൂപ വില വര്‍ധിപ്പിക്കും; തീരുമാനം ക്ഷീരവകുപ്പ് മന്ത്രി കെ.രാജുവിന്റെ അധ്യക്ഷതയില്‍ ചേര്‍ന്ന യോഗത്തില്‍; മില്‍മ ആവശ്യപ്പെട്ടത് ഏഴ് രൂപ വരെ വര്‍ധിപ്പിക്കണമെന്ന്
തിരുവനന്തപുരം: ഇക്കുറി ഓണം കഴിയുന്നതോടെ മില്‍മ പാലിന്റെ വില വര്‍ധിക്കും. ലിറ്ററിന് നാലു രൂപ വര്‍ധിപ്പിക്കുമെന്നാണ് മില്‍മ അറിയിച്ചിരിക്കുന്നത്. ക്ഷീര വകുപ്പ് മന്ത്രി കെ. രാജു അധ്യക്ഷത വഹിച്ച യോഗത്തിലാണ് ഇക്കാര്യം തീരുമാനമായത്. ഈ മാസം 21 മുതല്‍ പാലിന്റെ വില വര്‍ധിക്കുമെന്ന് അധികൃതര്‍ വ്യക്തമാക്കി. വര്‍ധിപ്പിക്കുന്ന വിലയുടെ 83.75 ശതമാനവും കര്‍ഷകര്‍ക്ക് ലഭിക്കും. അങ്ങനെ വരുമ്പോള്‍ 3 രൂപ 35 പൈസയാണ് കര്‍ഷകര്‍ക്ക് അധികമായി ലഭിക്കുന്നത്. പാലിന്റെ വില അഞ്ചു രൂപ മുതല്‍ ഏഴ് രൂപ വരെ വര്‍ധിപ്പിക്കണമെന്നായിരുന്നു മില്‍മ ആവശ്യപ്പെട്ടത്.
എന്നാല്‍ സര്‍ക്കാര്‍ തീരുമാനം നാലു രൂപ വര്‍ധിപ്പിച്ചാല്‍ മതിയെന്നായിരുന്നു. വര്‍ധിച്ച വിലയുടെ 80 ശതമാനം കര്‍ഷകര്‍ക്ക് നല്‍കാം എന്ന് മില്‍മ അറിയിച്ചിരുന്നുവെങ്കിലും അതിലും കൂടുതല്‍ വേണം എന്ന സര്‍ക്കാരിന്റെ നിലപാടിന് പിന്നാലെയാണ് 83.75 ശതമാനം നല്‍കാന്‍ തീരുമാനമായത്. സാധാരണ ഗതിയില്‍ മില്‍മയ്ക്ക് വില സ്വന്തമായി തീരുമാനിക്കാന്‍ സാധിക്കുമെങ്കിലും സര്‍ക്കാര്‍ അനുമതി ലഭിച്ചതിന് ശേഷമേ ഇത് നടപ്പിലാക്കാറുള്ളൂ.
2017-ലാണ് പാല്‍ വില അവസാനം കൂട്ടിയത്. അന്ന് കൂടിയ നാലുരൂപയില്‍ 3.35 രൂപയും കര്‍ഷകര്‍ക്കാണ് ലഭിച്ചത്. ഇത്തവണയും വര്‍ധന കര്‍ഷകര്‍ക്കാണ് ഏറെ ഗുണം ചെയ്തിരിക്കുന്നത്. സര്‍ക്കാര്‍ ഫാമുകളില്‍ ഇതിനകം പാല്‍ വില കൂടിയിട്ടുണ്ട്. ഫാമുകളില്‍ നാലുരൂപ വര്‍ധിച്ച് 46 രൂപയാണ് പുതിയ നിരക്ക്. പ്രളയശേഷം ആഭ്യന്തര ഉത്പാദനത്തില്‍ ഒരു ലക്ഷത്തിലധികം ലിറ്റര്‍ പാലിന്റെ കുറവുണ്ടായി. കഴിഞ്ഞവര്‍ഷം ദിവസം 1.86 ലക്ഷം ലിറ്റര്‍ പാല്‍ മറ്റുസംസ്ഥാനങ്ങളില്‍നിന്ന് വാങ്ങി. ഇപ്പോള്‍ ഇത് 3.60 ലക്ഷം ലിറ്ററായി.
Related Articles
-
-
-
-
-
-
-
-
