ഇന്ത്യന് വാഹന വിപണിയെ തകര്ത്ത ഫെബ്രുവരി; വാഹന വില്പ്പനയില് 19.08 ശതമാനം ഇടിവ്; മൊത്തം വാഹന വില്പ്പന 16,46,332 യൂണിറ്റ്; സാമ്പത്തിക മാന്ദ്യവും ബിഎസ്-6 മാനദണ്ഡങ്ങളിലേക്കുള്ള ആസന്ന മാറ്റവും തിരിച്ചടിയായി
ന്യൂഡല്ഹി: ഇന്ത്യയിലെ വാഹന വില്പ്പനയില് ഫെബ്രുവരി മാസം 19.08 ശതമാനം ഇടിവ് രേഖപ്പെടുത്തി. സാമ്പത്തിക മാന്ദ്യത്തിന് പുറമേ ബിഎസ്-6 മാനദണ്ഡങ്ങളിലേക്കുള്ള ആസന്ന മാറ്റവും വിപണിയെ ആശയക്കുഴപ്പത്തിലാക്കിയിട്ടുണ്ടെന്ന് സൊസൈറ്റി ഓഫ് ഇന്ത്യന് ഓട്ടോമൊബൈല് മാനുഫാക്ചറേഴ്സ് (സിയാം) അറിയിച്ചു.
സിയാം പുറത്തുവിട്ട കണക്കുകള് പ്രകാരം ഫെബ്രുവരിയില് മൊത്തം വാഹന വില്പ്പന 16,46,332 യൂണിറ്റായിരുന്നു. എന്നാല് 2019 ഫെബ്രുവരിയില് ഇത് 20,34,597 യൂണിറ്റായിരുന്നു. ബിഎസ്-6 വാഹനങ്ങള് വാങ്ങാനാഗ്രഹിക്കുന്ന ഉപയോക്താക്കള് മാര്ച്ച് അവസാനം വരെ കാത്തിരിക്കുന്നതും ഫെബ്രുവരിയില് വില്പ്പന കുറയാന് കാരണമായിട്ടുണ്ടെന്ന് സിയാം പ്രസിഡന്റ് രാജന് വധേര പറഞ്ഞു. കൊറോണ വൈറസ് ബാധ മൂലം ചൈനയില് നിന്നുള്ള വിതരണ ശൃംഖലകളില് വന്ന തടസ്സം ആശങ്കാജനകമാണ്.
ആഭ്യന്തര പാസഞ്ചര് വാഹന വില്പ്പന ഫെബ്രുവരിയില് 7.61 ശതമാനം താഴ്ന്ന് 2,51,516 യൂണിറ്റായി. കഴിഞ്ഞ വര്ഷം ഇത് 2,72,243 യൂണിറ്റായിരുന്നു. കാര് വില്പ്പന കഴിഞ്ഞ മാസം 8.77 ശതമാനം ഇടിഞ്ഞ് 1,56,285 യൂണിറ്റിലെത്തി. എന്നാലിത് കഴിഞ്ഞ വര്ഷം ഫെബ്രുവരിയില് 1,71,307 യൂണിറ്റായിരുന്നു. മാര്ക്കറ്റ് ലീഡര് മാരുതി സുസുക്കി ഇന്ത്യയുടെ പാസഞ്ചര് വാഹന വില്പ്പന കഴിഞ്ഞ മാസം 2.34 ശതമാനം കുറഞ്ഞ് 1,33,702 യൂണിറ്റായി. ഹ്യുണ്ടായ് മോട്ടോര് ഇന്ത്യയുടേത് 7.19 ശതമാനം ഇടിഞ്ഞ് 40,010 യൂണിറ്റായി. 15,644 യൂണിറ്റുകള് വിറ്റഴിച്ച് കിയ മോട്ടോഴ്സ് മൂന്നാം സ്ഥാനത്തെത്തി.
ഫെബ്രുവരിയില് മൊത്തം ഇരുചക്രവാഹന വില്പ്പന 19.82 ശതമാനം ഇടിഞ്ഞ് 12,94,791 യൂണിറ്റായി. കഴിഞ്ഞ വര്ഷം ഇതേ കാലയളവില് 16,14,941 യൂണിറ്റായിരുന്നു. ഹീറോ മോട്ടോകോര്പ്പ് കഴിഞ്ഞ മാസം 4,80,196 യൂണിറ്റ് വിറ്റഴിച്ചു. 20.05 ശതമാനം ഇടിവാണ് രേഖപ്പെടുത്തിയത്. ഹോണ്ട 22.83 ശതമാനം ഇടിവ് രേഖപ്പെടുത്തിക്കൊണ്ട് 3,15,285 യൂണിറ്റായി. അതേസമയം ടിവിഎസ് ടൂ വീലര് വില്പ്പന 26.73 ശതമാനം ഇടിഞ്ഞ് 1,69,684 യൂണിറ്റിലെത്തി.
കഴിഞ്ഞ മാസം മൊത്തത്തില് മോട്ടോര് സൈക്കിള് വില്പ്പന 22.02 ശതമാനം ഇടിഞ്ഞ് 8,16,679 യൂണിറ്റായി. മുന് വര്ഷം ഇത് 10,47,356 യൂണിറ്റായിരുന്നു. സ്കൂട്ടര് വില്പ്പന 14.27 ശതമാനം കുറഞ്ഞ് 4,22,310 യൂണിറ്റായി. കഴിഞ്ഞ വര്ഷം ഫെബ്രുവരിയില് 4,92,584 യൂണിറ്റ് വിറ്റിരുന്നു. ഫെബ്രുവരിയില് വാണിജ്യ വാഹനങ്ങളുടെ വില്പ്പന 32.9 ശതമാനം ഇടിഞ്ഞ് 58,670 യൂണിറ്റായി. കഴിഞ്ഞ വര്ഷം ഇതേ കാലയളവില് 87,436 യൂണിറ്റായിരുന്നു വില്പ്പന.
Related Articles
-
ആറുമാസം മുൻപ് ഒരു ബിറ്റ് കോയിന്റെ വില 68,000 ഡോളർ; ഇന്നലെ 23,000 ഡോളർ; ക്രിപ്റ്റ -
പൊതുജനങ്ങൾക്ക് ഓഹരി നിക്ഷേപ പാഠങ്ങളുമായി ധനമന്ത്രാലയം; രജിസ്ട്രേഷൻ ആരംഭിച്ചു -
റിപ്പോ നിരക്കും കരുതല് ധനാനുപാതവും ഉയര്ത്തി റിസര്വ് ബാങ്ക് -
സംസ്ഥാനത്ത് ഇന്ന് സ്വര്ണ വില ഉയര്ന്നു -
അനില് അംബാനിക്ക് വിദേശത്ത് കോടികളുടെ നിക്ഷേപം; ഞെട്ടിപ്പിക്കുന്ന വെളിപ്പെടുത്തല -
രാജ്യത്തെ പലിശ നിരക്കുകള് ഉയരും; സര്ക്കാര് കടപ്പത്ര ആദായത്തില് കുതിപ്പ് -
ഐഡിബിഐ ബാങ്കിനെ സ്വകാര്യ ബാങ്കുകളുമായി ലയിപ്പിച്ചേക്കും -
വായ്പാ നിരക്ക് വര്ധിപ്പിച്ച് എച്ച്ഡിഎഫ്സി ബാങ്ക്; ഇന്ന് മുതല് പ്രാബല്യത്തില്