പിഎം-കിസാന്റെ ഒന്നാം വാര്‍ഷികാഘോഷത്തിനൊരുങ്ങി ചിത്രകൂട്ട്; ഫെബ്രുവരി 29 ന് നടക്കുന്ന ചടങ്ങില്‍ പ്രധാനമന്ത്രി പങ്കെടുക്കും; കിസാന്‍ ക്രെഡിറ്റ് കാര്‍ഡുകളും വിതരണം ചെയ്യും
ഉത്തര്‍പ്രദേശ്: പ്രധാനമന്ത്രി നരേന്ദ്ര മോദി ഫെബ്രുവരി 29 ന് ഉത്തര്‍പ്രദേശിലെ ചിത്രകൂട്ട് ജില്ലയില്‍ സര്‍ക്കാരിന്റെ പ്രധാനമന്ത്രി-കിസാന്‍ പദ്ധതി നടപ്പാക്കിയതിന്റെ ഒരു വര്‍ഷം ആഘോഷിക്കുമെന്ന് കൃഷിമന്ത്രി നരേന്ദ്ര സിംഗ് തോമര്‍ തിങ്കളാഴ്ച അറിയിച്ചു. പൊതുതെരഞ്ഞെടുപ്പിന് തൊട്ടുമുമ്പ്, മോദി 2019 ഫെബ്രുവരി 24 ന് ഗോരഖ്പൂരില്‍ പ്രധാന്‍ മന്ത്രി കിസാന്‍ സമന്‍ നിധി (പിഎം-കിസാന്‍) ആരംഭിച്ചു. 14 കോടി കര്‍ഷകര്‍ക്ക് മൂന്ന് തുല്യ തവണകളായി പ്രതിവര്‍ഷം 6,000 രൂപ നല്‍കാനാണ് ഈ പദ്ധതി പ്രകാരം കേന്ദ്രസര്‍ക്കാര്‍ ലക്ഷ്യമിടുന്നത്.
നിലവില്‍ പശ്ചിമ ബംഗാള്‍ ഒഴികെയുള്ള എല്ലാ സംസ്ഥാനങ്ങളും പദ്ധതി നടപ്പാക്കുന്നു. ഇതുവരെ 9.74 കോടി കര്‍ഷകരാണ് പദ്ധതി പ്രകാരം രജിസ്റ്റര്‍ ചെയ്തിട്ടുള്ളത്. ഇതില്‍ 8.45 കോടി കര്‍ഷകര്‍ക്ക് സംസ്ഥാന സര്‍ക്കാരുകളുടെ ഡാറ്റാ പരിശോധനയ്ക്ക് ശേഷം ഇതുവരെ പണം ലഭിച്ചിട്ടുണ്ടെന്ന് ഔദ്യോഗിക കണക്കുകള്‍ വ്യക്തമാക്കുന്നു. പ്രധാനമന്ത്രി-കിസാന്‍ നടപ്പാക്കിയിട്ട് ഒരു വര്‍ഷം പൂര്‍ത്തിയാകുന്ന അവസരം ഫെബ്രുവരി 29 ന് ഉത്തര്‍പ്രദേശിലെ ചിത്രകൂട്ടില്‍ ആഘോഷിക്കും. ഒപ്പം ചടങ്ങില്‍ പ്രധാനമന്ത്രി, കിസാന്‍ ക്രെഡിറ്റ് കാര്‍ഡുകള്‍ (കെസിസി) വിതരണം ചെയ്യുമെന്നും തോമര്‍ പറഞ്ഞു. ജില്ലാ തലത്തിലുള്ള ബാങ്കുകള്‍ അന്ന് പിഎം-കിസാന്‍ ഗുണഭോക്താക്കള്‍ക്ക് ക്രെഡിറ്റ് കാര്‍ഡുകള്‍ വിതരണം ചെയ്യുമെന്നും കര്‍ഷകര്‍ക്ക് ഈ കാര്‍ഡുകള്‍ ഉപയോഗിച്ച് ഹ്രസ്വകാല വായ്പ ലഭിക്കുമെന്നും അദ്ദേഹം പറഞ്ഞു.
ബജറ്റില്‍ പ്രഖ്യാപിച്ച 10,000 കര്‍ഷക ഉല്‍പാദന കമ്പനികളുടെ (എഫ്പിഒ) രൂപീകരണവും പ്രധാനമന്ത്രി അനാച്ഛാദനം ചെയ്യും. ഓരോ എഫ്പിഒയ്ക്കും കേന്ദ്രം 15 ലക്ഷം രൂപ വീതം ഫണ്ട് നല്‍കും. 2022 ഓടെ കര്‍ഷകരുടെ വരുമാനം ഇരട്ടിയാക്കുക എന്ന ലക്ഷ്യം കൈവരിക്കുന്നതിന് സര്‍ക്കാര്‍ നിരവധി നടപടികള്‍ സ്വീകരിച്ചിട്ടുണ്ടെന്നും മന്ത്രി പറഞ്ഞു. പിഎം-കിസാന്‍ ആരംഭിക്കുക, വായ്പ ഉറപ്പാക്കുക, മെച്ചപ്പെട്ട സ്ഥിതിയ്ക്കായി ഒരു കമ്പനി രൂപീകരിക്കുന്നതിന് കര്‍ഷകരെ ഒന്നിച്ചുചേര്‍ക്കാന്‍ പ്രാപ്തരാക്കുക - ഇവയെല്ലാം കര്‍ഷകരുടെ വരുമാനം വര്‍ദ്ധിപ്പിക്കുന്നതിനുള്ള നടപടികളാണ്.
Related Articles
-
-
-
-
-
-
-
-
