ടൊയോട്ട കിര്‍ലോസ്‌കറിന്റെ യാരിസ് നിര്‍ത്തലാക്കുന്നു; കാരണം ഇതാണ്

3 years ago

ജാപ്പനീസ് കാര്‍ നിര്‍മ്മാതാക്കളായ ടൊയോട്ടയുടെയും കിര്‍ലോസ്‌കര്‍ മോട്ടോഴ്സിന്റെയും സംയുക്ത സംരംഭമായ ടൊയോട്ട കിര്‍ലോസ്‌കര്‍ മോട്ടോഴ്സിന്റെ മിഡ് സെഗ്മെന്റ് സെഡാന്‍ മോഡലായ യാരിസിന്റെ വില്‍പ്പന നിര്‍ത്തിവച്ചു. ഇന്നലെ മുതല്‍ യാരിസ് മോഡലിന്റെ വില്‍പ്പന ഇന്ത്യയില്‍ നിര്‍ത്തലാക്കുമെന്നാണ് കമ്പനിയുടെ പ്രഖ്യാപനം. മെച്ചപ്പെട്ട സാങ്കേതികവിദ്യകളിലൂടെയും ഉല്‍പ്പന്ന ഓഫറുകളിലൂടെയും ഉപഭോക്താവിന്റെ ആവശ്യങ്ങള്‍ നിറവേറ്റുന്നതിനുള്ള ടൊയോട്ടയുടെ തന്ത്രങ്ങളുടെ ഭാഗമായാണ് ഈ നീക്കമെന്നും കമ്പനി പ്രസ്താവനയില്‍ പറഞ്ഞു.

അതേസമയം, മോഡലിന്റെ വില്‍പ്പന നിര്‍ത്തിവയ്ക്കുമെങ്കിലും 10 വര്‍ഷത്തേക്ക് ടൊയോട്ടയുടെ സ്പെയര്‍ പാര്‍ട്സുകള്‍ യാരിസ് ഉപഭോക്താക്കള്‍ക്ക് ലഭ്യമാക്കുമെന്നും കമ്പനി ഉറപ്പുനല്‍കുന്നുണ്ട്. രാജ്യമെമ്പാടുമുള്ള ഞങ്ങളുടെ ഡീലര്‍ സര്‍വീസ് ഔട്ട്ലെറ്റുകള്‍ വഴി യാരിസ് ഉപഭോക്താക്കളുടെ എല്ലാ ആവശ്യങ്ങളും നിറവേറ്റുന്നത് തുടരുമെന്ന് വാഹന നിര്‍മ്മാതാവ് കൂട്ടിച്ചേര്‍ത്തു.

ഈ വര്‍ഷം ഏപ്രിലില്‍ യാരിസിന്റെ 237 യൂണിറ്റുകള്‍ മാത്രമാണ് ടൊയോട്ട കിര്‍ലോസ്‌കര്‍ മോട്ടോഴ്സ് നിര്‍മിച്ചത്. കഴിഞ്ഞ നാല് മാസമായി കമ്പനി ഈ മോഡലിന്റെ ഒരു യൂണിറ്റ് പോലും നിര്‍മ്മിച്ചിട്ടില്ല. 2018 ഏപ്രിലില്‍ അവതരിപ്പിച്ച ഈ മോഡല്‍ 2019 സാമ്പത്തിക വര്‍ഷത്തില്‍ 11,831 യൂണിറ്റും 2020 ല്‍ 3,602 യൂണിറ്റും 2021ല്‍ 4,056 യൂണിറ്റുകളുമാണ് വില്‍പ്പന നേടിയത്. എല്ലാ ഉപഭോക്താക്കളുടെയും പിന്തുണയ്ക്കും ബ്രാന്‍ഡില്‍ വിശ്വാസം അര്‍പ്പിച്ചതിനുള്ള നന്ദിയുും കമ്പനി അറിയിക്കുന്നു. നിലവിലുള്ള മറ്റ് ഓഫറുകളുമായി ഉപഭോക്താക്കള്‍ക്കുള്ള സേവനം തുടരാന്‍ കമ്പനി ആഗ്രഹിക്കുന്നതായും 2022ല്‍ പുതിയ മോഡലുകള്‍ പുറത്തിറക്കാനുള്ള തയ്യാറെടുപ്പുകള്‍ നടത്തുന്നതായും പ്രസ്താവനയില്‍ വ്യക്തമാക്കി.

Related Articles