സൊമാറ്റോ അടുത്ത ആഴ്ച വിപണിയിലേക്ക്; ലക്ഷ്യം 9,375 കോടി രൂപ

3 years ago

ഇന്ത്യയിലെ ഏറ്റവും വലിയ ഓണ്‍ലൈന്‍ ഫുഡ് ഡെലിവറി സ്റ്റാര്‍ട്ടപ്പായ സൊമാറ്റോയുടെ ഐപിഒ (പ്രാഥമിക ഓഹരി വില്‍പ്പന) അടുത്ത ആഴ്ച വിപണിയില്‍ എത്തുമെന്ന് റിപ്പോര്‍ട്ട്. ജൂലൈ 19 ന് ഓഫര്‍ ആരംഭിക്കാനുള്ള മുന്‍ പദ്ധതിയില്‍ കമ്പനി മാറ്റം വരുത്തിയതായി പ്രമുഖ ദേശീയ മാധ്യമമായ ലൈവ് മിന്റ് റിപ്പോര്‍ട്ട് ചെയ്യുന്നു. 

9,375 കോടി രൂപയുടെ ഐപിഒ അടുത്ത ആഴ്ച മധ്യത്തില്‍ സമാരംഭിക്കാന്‍ സാധ്യതയുണ്ട്, മിക്കവാറും ജൂലൈ 14 ന് ഐപിഒ ഇഷ്യു ആരംഭിച്ചേക്കുമെന്നാണ് റിപ്പോര്‍ട്ട്. ഐപിഒ നടപടികളില്‍ രജിസ്ട്രാര്‍ ഓഫ് കമ്പനീസ് (ഞീഇ) അംഗീകാരം മാത്രമേ ഇനി ലഭിക്കാനൊള്ളൂ. നിക്ഷേപകരുടെ ആവശ്യം കണക്കിലെടുത്ത് കമ്പനിയും ബാങ്കര്‍മാരും ഓഹരി വില്‍പ്പന നേരത്തെ നടത്താന്‍ തീരുമാനിച്ചതായാണ് ലഭിക്കുന്ന സൂചന. 

വിദേശ, ആഭ്യന്തര നിക്ഷേപകരില്‍ നിന്ന് ഇഷ്യുവിന് വലിയ ഡിമാന്റ് ഉണ്ടാകുമെന്നാണ് കണക്കാക്കുന്നത്. ഈ കരാറോടെ ചില പുതിയ എഫ്‌ഐഐകള്‍ ഇന്ത്യന്‍ വിപണികളിലേക്ക് എത്തുമെന്നാണ് വിപണി നിരീക്ഷരുടെ വിലയിരുത്തല്‍. ഓണ്‍ലൈന്‍ ഭക്ഷ്യ വിതരണ രം?ഗം അതിവേ?ഗ വളര്‍ച്ച പ്രകടിപ്പിക്കുന്ന പശ്ചാത്തലത്തില്‍ സൊമാറ്റോ വരാനിരിക്കുന്ന ഐപിഒയുടെ മൂല്യനിര്‍ണ്ണയം ഏകദേശം എട്ട് ബില്യണ്‍ ഡോളറില്‍ നിന്ന് 10 ബില്യണ്‍ ഡോളറായി ഉയര്‍ത്തുന്നതായി ലൈവ് മിന്റ് ചൊവ്വാഴ്ച റിപ്പോര്‍ട്ട് ചെയ്തിരുന്നു. ഇത് സൊമാറ്റോയുടെ ഓഹരികള്‍ക്കായി നിക്ഷേപകരില്‍ നിന്നുള്ള ഡിമാന്‍ഡ് ഗണ്യമായ വര്‍ധിക്കാന്‍ കാരണമായി.

നിക്ഷേപകരുടെ ശക്തമായ താത്പര്യം സംബന്ധിച്ച സൂചനകള്‍ ലഭിച്ചതിനെത്തുടര്‍ന്ന് സൊമാറ്റോ ഐപിഒയുടെ വലുപ്പവും വര്‍ധിപ്പിച്ചു. നേരത്തെ ആസൂത്രണം ചെയ്ത പുതിയ ഓഹരികളുടെ ഇഷ്യു വലുപ്പം 7,500 കോടി രൂപയായിരുന്നത്, 9,000 കോടി രൂപയായി ഉയര്‍ത്തി. ഇതോടൊപ്പം കമ്പനിയുടെ ആദ്യകാല നിക്ഷേപകനായ ഇന്‍ഫോ എഡ്ജ് ഐപിഒയിലെ ദ്വിതീയ ഓഹരി വില്‍പ്പനയുടെ ഇഷ്യു വലുപ്പം 750 കോടി രൂപയില്‍ നിന്ന് 375 കോടി രൂപയായി കുറയ്ക്കുകയും ചെയ്തു. 

സൊമാറ്റോയുടെ നിലവിലുള്ള നിക്ഷേപകരില്‍ ഇന്‍ഫോ എഡ്ജ് (ഇന്ത്യ) ലിമിറ്റഡും ഉള്‍പ്പെടുന്നു. (18.55%), ഉബര്‍ ബി.വി. (9.13%), അലിപേ സിംഗപ്പൂര്‍ ഹോള്‍ഡിംഗ് ലിമിറ്റഡ്. (8.33%), ആന്റ് ഫിന്‍ സിംഗപ്പൂര്‍ ഹോള്‍ഡിംഗ് (8.20%), ടൈഗര്‍ ഗ്ലോബല്‍ (6%), സെക്വോയ ക്യാപിറ്റല്‍ (5.98%), സഹസ്ഥാപകന്‍ ദീപീന്ദര്‍ ഗോയല്‍ (5.51%), ടെമാസെക് ഹോള്‍ഡിംഗ്‌സ് സബ്‌സിഡിയറി (3.65%) എന്നിവയാണ് മറ്റ് പ്രധാന നിക്ഷേപകര്‍.

കഴിഞ്ഞ കുറച്ച് മാസങ്ങളായി സൊമാറ്റോ അതിന്റെ എല്ലാ ബിസിനസ്സ് മേഖലകളിലും അതിവേഗം വളര്‍ച്ചാ പാതയിലാണ്. കഴിഞ്ഞ വര്‍ഷത്തെ കണക്ക് അനുസരിച്ച്, രണ്ട് ലക്ഷത്തിലധികം ഡെലിവറി പങ്കാളികളുള്ള സൊമാറ്റോ ഇന്ത്യയിലുടനീളമുള്ള അഞ്ഞൂറോളം നഗരങ്ങളില്‍ പ്രവര്‍ത്തിച്ചുവരുന്നു. കമ്പനി അതിന്റെ ചെലവുകള്‍ ഗണ്യമായി കുറച്ചിട്ടുണ്ട്. പരസ്യ, പ്രമോഷണല്‍ ചെലവുകളായി സൊമാറ്റോ 307 കോടി രൂപ ചെലവഴിച്ചു, ഇത് 2020 സാമ്പത്തിക വര്‍ഷത്തില്‍ ചെലവഴിച്ച 1,338 കോടി രൂപയേക്കാള്‍ 77% കുറവാണ്.

Related Articles