ന്യൂഡൽഹി: കൊറോണ വൈറസ് സാഹചര്യത്തിൽ വരുമാനം ഇടിഞ്ഞതായും ഇടപാടുകൾക്ക് കാലതാമസം നേരിടാമെന്നും ഓയോ തങ്ങളുടെ പങ്കാളികൾക്ക് അറിയിപ്പ് നൽകി. വൈറസ് വ്യാപനവുമായി ബന്ധപ്പെട്ടുണ്ടായ യാത്രാ വിലക്കുകളും സാമൂഹിക നിയന്ത്രണങ്ങളും സോഫ്റ്റ് ബാങ്ക് പിന്തുണയുള്ള ഓയോയുടെ വരുമാനത്തെയും പ്രവർത്തനങ്ങളെയും സാരമായി ബാധിച്ചു. അതിനാൽ തങ്ങളുടെ പണമിടപാടുകൾക്ക് തടസ്സങ്ങൾ ഉണ്ടാകാമെന്ന് ഇടപാടുകാർക്കെഴുതിയ കത്തിൽ ഓയോ വ്യക്തമാക്കുന്നു.
ആതിഥ്യ വ്യവസായം ജനങ്ങളുടെ സഞ്ചാരത്തെയും ആശയവിനിമയത്തെയും ആശ്രയിച്ചിരിക്കുന്നുവെന്നും മേൽപ്പറഞ്ഞ പ്രവർത്തനങ്ങൾ വ്യവസായത്തെ സാരമായി ബാധിച്ചിട്ടുണ്ടെന്നും ഓയോയുടെ സംഭരണ, വിതരണ ശൃംഖലയുടെ തലവൻ അങ്കിത് അഗർവാൾ പറയുന്നു. ഓയോ, ആതിഥ്യ-യാത്രാ വ്യവസായത്തിൽ സമീപകാലങ്ങളിൽ വെല്ലുവിളികൾ കാണുന്നു. അതിനാൽ, ഞങ്ങൾ ഈ സമയത്ത്‌ കൂടുതൽ സുതാര്യതയോടെ വിനിമയം നടത്തുന്നത് തുടരുകയും ഉണ്ടാകാനിടയുള്ള അപാകതകൾ പരിഹരിക്കുകയും ചെയ്യും. ഇക്കാര്യത്തിലാണ് ഞങ്ങളുടെ വ്യാപാരികളോടും പങ്കാളികളോടും മുൻകരുതൽ എന്ന നിലയിൽ പേയ്‌മെന്റ് സൈക്കിളിൽ തടസ്സങ്ങൾ ഉണ്ടാകാമെന്ന് അറിയിച്ചിട്ടുള്ളതെന്നും ഒയോ വക്താവ് പറഞ്ഞു. ഇനി അപാകതകൾ സംഭവിക്കുകയാണെങ്കിൽ, അവ വേഗത്തിൽ പരിഹരിക്കാൻ ഞങ്ങൾ ശ്രമിക്കുമെന്നും വക്താവ് കൂട്ടിച്ചേർത്തു.
മന്ത്രാലയങ്ങൾ, സംസ്ഥാന സർക്കാരുകൾ, പ്രാദേശിക അധികാരികൾ എന്നിവരുമായി കമ്പനിയുടെ ചില സ്വത്തുക്കൾ താങ്ങാവുന്നതും ന്യായവുമായ വിലയ്ക്ക് കൊറോണ പ്രതിരോധ പ്രവർത്തനങ്ങൾക്ക് നൽകാമെന്ന് വാഗ്ദാനം ചെയ്തിട്ടുണ്ട്. നിലവിലെ അഭൂതപൂർവമായ വെല്ലുവിളി നിറഞ്ഞ സാഹചര്യത്തിൽ ഞങ്ങളുടെ പേയ്‌മെന്റ് സൈക്കിളുകളിൽ തടസ്സമുണ്ടാകാം. ഈ സാഹചര്യത്തിലൂടെ സഞ്ചരിക്കാൻ ഞങ്ങൾക്ക് നിങ്ങളുടെ പിന്തുണ ആവശ്യമാണ് എന്നും അഗർവാൾ കത്തിൽ പറയുന്നു. പക്ഷേ, അസന്തുഷ്ടരായ ഉടമകൾക്ക് അത് ഇനിയും ബോധ്യമായിട്ടില്ല.
അതേസമയം ഓയോ ഹോട്ടലുകളുടെയും ഓയോ ലൈഫ് ഓഫറുകളുടെയും സംയോജനത്തിലൂടെ ആശുപത്രി ജീവനക്കാർ, എയർ, സീ ക്രൂ എന്നിവരുടെയും വിനോദസഞ്ചാരികളുടെയും താമസ ആവശ്യങ്ങൾ പിന്തുണയ്ക്കാൻ കമ്പനി ശ്രദ്ധാലുവാണെന്ന് ഓയോ വക്താവ് പറഞ്ഞു. എന്നാൽ ഓയോയുടെ പ്രഖ്യാപനത്തിൽ വേണ്ടത്ര വ്യക്തതയില്ലെന്ന് ഫെഡറേഷൻ ഓഫ് ഹോട്ടൽ ആൻഡ് റെസ്റ്റോറന്റ് അസോസിയേഷൻസ് ഓഫ് ഇന്ത്യ (FHRAI) വൈസ് പ്രസിഡന്റ് ഗുർബാക്സിഷ് സിംഗ് കോഹ്‌ലി പറഞ്ഞു.
ഈ പ്രഖ്യാപന തുക ആരുടെ വാടകയിൽ നിന്ന് കുറയ്ക്കുമെന്ന് ഓയോ വ്യക്തമാക്കിയിട്ടില്ല. മാത്രമല്ല ഈ പ്രഖ്യാപനത്തിന് മുമ്പ് ഹോട്ടൽ ഉടമകളോട് ആലോചിച്ചിട്ടില്ലെന്നും റിപ്പോർട്ടുണ്ട്. ഇത് പ്രസിദ്ധിയ്ക്ക് വേണ്ടി മാത്രമാണെന്ന് ഞങ്ങൾ സംശയിക്കുന്നുവെന്നും കോഹ്‌ലി പറഞ്ഞു. FHRAI യും അതിന്റെ പ്രാദേശിക സ്ഥാപനങ്ങളും ഇതിനകം 1000 മുറികളിലായി സന്നദ്ധസേവനം നടത്തിയിട്ടുണ്ട്. ഞങ്ങളുടെ അംഗങ്ങൾ സംസ്ഥാന, ജില്ലാ, നഗര തലങ്ങളിലെ സർക്കാർ ഉദ്യോഗസ്ഥരുമായി ചേർന്ന് സജീവമായി പ്രവർത്തനങ്ങൾ ഏകോപിപ്പിക്കുന്നു എന്നും അദ്ദേഹം കൂട്ടിച്ചേർത്തു.
ഡോക്ടർമാർ, നഴ്‌സുമാർ, ഫസ്റ്റ്-റെസ്‌പോണ്ടർമാർ എന്നിവരുൾപ്പെടെ എല്ലാ മെഡിക്കൽ പ്രൊഫഷണലുകൾക്കും 300+ ഹോട്ടലുകളിൽ സൗജന്യമായി മുറികൾ കമ്പനി വാഗ്ദാനം ചെയ്തിട്ടുണ്ടെന്ന് ഒയോ പറഞ്ഞു. ചെറുകിട ഹോട്ടലുകൾക്ക് ബിസിനസ്സ് നിലനിർത്താൻ കഴിയില്ലെന്ന് പൂനെ റെസ്റ്റോറന്റ് ആൻഡ് ഹോട്ടൽ അസോസിയേഷന്റെ വി.പിയും മുൻ ഒയോ പങ്കാളിയുമായ വിക്രം ഷെട്ടി പറഞ്ഞു. ഓയോ പേയ്‌മെന്റുകൾ ഒഴിവാക്കാൻ ആഗ്രഹിക്കുന്നുവെങ്കിൽ ഇത് ഒരു സുവർണ്ണാവസരമാണ്. ധാരാളം ഹോട്ടൽ ഉടമകൾ വായ്പയെടുത്തിട്ടുണ്ട്. അടച്ചുപൂട്ടലിന് മുമ്പായി മാർച്ച് മാസത്തെ കുടിശ്ശികയെങ്കിലും അവർ നൽകണമെന്നും അദ്ദേഹം കൂട്ടിച്ചേർത്തു.
