കൊച്ചി: പ്രമുഖ സ്വര്‍ണ വ്യാപാര ശൃംഖലയായ കല്യാണ്‍ ജൂവലേഴ്സ് പ്രഥമ ഓഹരി വില്പന (ഐപിഒ)യ്ക്ക് മുന്നോടിയായി സിങ്കപ്പൂര്‍ സര്‍ക്കാര്‍, മോണിറ്ററി അതോറിറ്റി ഓഫ് സിങ്കപ്പൂര്‍ എന്നിവയില്‍ നിന്നടക്കം 351.90 കോടി രൂപ സമാഹരിച്ചു. മൊത്തം 15 സ്ഥാപനങ്ങളാണ് ആങ്കര്‍ നിക്ഷേപകരായി എത്തിയത്.

മൊത്തം, 1,175 കോടി രൂപ സമാഹരിക്കാന്‍ ലക്ഷ്യമിടുന്ന ഐ.പി. ഒ. ചൊവ്വാഴ്ച തുടങ്ങി വ്യാഴാഴ്ച അവസാനിക്കും. 10 രൂപ മുഖവിലയുള്ള ഓഹരികള്‍ 86-87 രൂപയ്ക്കാണ് ലഭ്യമാക്കുന്നത്. ചുരുങ്ങിത് 172 ഓഹരികള്‍ക്കോ അതിന്റെ ഗുണിതങ്ങള്‍ക്കോ വേണ്ടി അപേക്ഷിക്കാം.

പ്രമുഖ വ്യവസായി ടി.എസ്. കല്യാണരാമന്റെ നേതൃത്വത്തില്‍ തൃശ്ശൂര്‍ നഗരത്തില്‍ ഒരൊറ്റ ഷോറൂമുമായി തുടങ്ങിയ കല്യാണ്‍ ജൂവലേഴ്സിന് ഇന്ന് ഇന്ത്യയിലും ഗള്‍ഫ് രാജ്യങ്ങളിലുമായി 137 ഷോറൂമുകളുണ്ട്.