ദില്ലി: 5ജി സ്പെക്ട്രം ലേലം 3.5 വര്ഷം കഴിഞ്ഞ് നടത്തിയാല്മതിയെന്ന് വ്യവസായ പ്രോത്സാഹക സംഘടന പിഎച്ച്ഡി ചേംബര് ഓഫ് കൊമേഴ്സ് ആന്റ് ഇന്റസ്ട്രി. കേന്ദ്രസര്ക്കാരിനാണ് പിഎച്ച്ഡി നിര്ദേശം കൈമാറിയത്. ബാന്റ് വിഡ്ത്തുകള്ക്ക് അനുയോജ്യമായ മൂല്യം സര്ക്കാരിന് ലഭിക്കാന് അത്രയും സമയം വേണ്ടിവരുമെന്നും ന്യൂദല്ഹി ആസ്ഥാനമായ ചേംബര്,ടെലികോം വകുപ്പിന് നല്കിയ ശുപാര്ശയില് പറയുന്നു. 5ജി സ്പെക്ട്രം ഇപ്പോള് ലേലം ചെയ്യുകയാണെങ്കില് അടുത്ത ഇരുപത് വര്ഷത്തേക്ക് ലൈസന്സ് ഫീസുകള് മരവിക്കുന്ന അവസ്ഥയുണ്ടാകും. ഇതുവഴി സര്ക്കാരിന് വന് നഷ്ടമായിരിക്കും വരിക. ഓപ്പറേറ്റര്മാര്ക്കും ധനനഷ്ടം സംഭവിക്കും. മൂന്ന് മുതല് അഞ്ച് വര്ഷങ്ങള്ക്ക് ശേഷം മാത്രമേ ഇതില് നിന്ന് വരുമാനമുണ്ടാകുകയുള്ളൂ. പിഎച്ച്ഡിസിഐ അധ്യക്ഷന് സന്ദീപ് അഗര്വാള് പറഞ്ഞു.
ലേലത്തിന് ശേഷമുള്ള 2-3 വര്ഷത്തേക്ക് ലൈസന്സ് ഫീസ് സര്ക്കാര് വാങ്ങരുതെന്നും അഗര്വാള് ആവശ്യപ്പെടുന്നു. 5ജി ലേലം 2019ല് നടത്താനാണ് ടെലികോം വകുപ്പ് തീരുമാനിച്ചിരുന്നത്. ഈ വര്ഷം 5ജി സ്പെക്ട്രലേലം നടക്കാനിരിക്കെയാണ് വ്യവസായികള് നിര്ദേശവുമായി രംഗത്തെത്തിയിരിക്കുന്നത്.
