പേടിഎം വാലറ്റിലേറ്റിലേക്ക് ക്രെഡിറ്റ് കാര്‍ഡ് ഉപയോഗിച്ച് പണം ട്രാന്‍സ്ഫര്‍ ചെയ്യുന്നത് പതിനായിരം രൂപയില്‍ കൂടുതലായാല്‍ രണ്ട് ശതമാനം സര്‍വീസ് ചാര്‍ജ് നല്‍കേണ്ടി വരുമെന്ന് കമ്പനി.അതേസമയം ഡെബിറ്റ് കാര്‍ഡുകള്‍ അല്ലെങ്കില്‍ യൂണിഫൈഡ് പേയ്മെന്റ് ഇന്റര്‍ഫേസ് (യുപിഐ) വഴിയുള്ള ഇടപാടുകള്‍ക്ക് നിരക്കുകള്‍ ഈടാക്കില്ലെന്നും കമ്പനി വ്യക്തമാക്കി. ഉപയോക്താക്കള്‍ അവരുടെ ക്രെഡിറ്റ് കാര്‍ഡുകള്‍ ഉപയോഗിച്ച് പേടിഎം വാലറ്റുകളിലേക്ക് പണം മാറ്റുകയും തുടര്‍ന്ന് ഈ തുക അവരുടെ ബാങ്ക് അക്കൗണ്ടുകളിലേക്ക് കൈമാറുകയും ചെയ്യുന്നത് പേടിഎം അധികൃതരുടെ ശ്രദ്ധയില്‍പ്പെട്ടിട്ടുണ്ട്. ഈ തുക ഉപഭോക്താക്കള്‍ പിന്നീട് ചെലവഴിക്കുകയോ നിക്ഷേപിക്കുകയോ ചെയ്യും.
ക്രെഡിറ്റ് കാര്‍ഡുകളില്‍ ലഭ്യമായ 40 ദിവസത്തെ പലിശരഹിത കാലയളവ് വാലറ്റ് ഉപയോക്താവ് ഇതിലൂടെ പ്രയോജനപ്പെടുത്തുകയും ചെയ്യും. 2 ശതമാനം ചാര്‍ജ് അവതരിപ്പിച്ചുകൊണ്ട് ഈ പഴുതുകള്‍ അടയ്ക്കാനാണ് പേടിഎമ്മിന്റെ ലക്ഷ്യം.നേരത്തേ ക്രെഡിറ്റ് കാര്‍ഡില്‍ വഴി വാലറ്റിലേക്ക് പണം കൈമാറുന്നതിന് തുകയുടെ 2 ശതമാനം ചാര്‍ജ് ഈടാക്കുമെന്ന് പ്രഖ്യാപിച്ചെങ്കിലും ഉപഭോക്താക്കളുടെ സൗകര്യം മാനിച്ച് നിരക്ക് ഈടാക്കുന്നത് നിര്‍ത്തിവെയ്ക്കുകയായിരുന്നു.
