വാക്‌സിന്‍ എടുക്കാത്ത ജീവനക്കാരെ വിമാന കമ്പനികള്‍ ഉള്‍പ്പെടെ പിരിച്ച് വിടുന്നു. കാനഡയിലെ ഏറ്റവും വലിയ എയര്‍ ലൈനായ എയര്‍കാനഡയാണ് എണ്ണൂറോളം ജീവനക്കാരെ പിരിച്ച് വിട്ടത്. മറ്റൊരു കനേഡിയന്‍ എയര്‍ലൈനായ വെസ്റ്റ് ജെറ്റ് 300 ജീവനക്കാരെ പിരിച്ച് വിട്ടിട്ടുണ്ട്. മറ്റ് കമ്പനികളും സമാനമായ നടപടികളുമായി രംഗത്ത് എത്തിയിട്ടുണ്ട്. അമേരിക്കന്‍ ഹെല്‍ത്ത് കെയര്‍ കമ്പനിയായ കൈസര്‍ വാക്‌സിന്‍ എടുക്കാത്ത 2,200 ജീവനക്കാരെയാണ് ഈ മാസം ആദ്യം പിരിച്ച് വിട്ടത്.
നടപടിക്ക് ശേഷം കമ്പനിയുടെ ഭൂരിഭാഗം ജീവനക്കാരും വാക്‌സിനേഷന്‍ പൂര്‍ത്തിയാക്കിയതായി ആണ് സൂചന. അതേസമയം ജീവനക്കാര്‍ക്ക് വാക്‌സിനേഷന്‍ പൂര്‍ത്തിയാക്കിയ ശേഷം ജോലിയില്‍ തിരികെ പ്രവേശിക്കാന്‍ ഡിസംബര്‍ ഒന്ന് വരെ അധിക സമയം നല്‍കിയിട്ടുണ്ട്. കമ്പനിയുടെ ഒരു ശതമാനം ജീവനക്കാരാണ് വാക്‌സിന്‍ എടുക്കാന്‍ ഉള്ളത്. വാക്‌സിന്‍ എടുക്കാത്തവരോട് ശമ്പളമില്ലാത്ത നിര്‍ബന്ധ അവധിയില്‍ പ്രവേശിക്കാന്‍ ആവശ്യപ്പെടുന്ന കമ്പനികളുമുണ്ട്.
എയര്‍ കാനഡയിലെ ഭൂരിഭാഗം ജീവനക്കാരും ഫെഡറല്‍ കൊവിഡ് നിയമങ്ങള്‍ക്കനുസൃതമായി പൂര്‍ണ്ണമായും വാക്‌സിനേഷന്‍ എടുത്തിട്ടുണ്ടെന്ന് കമ്പനിയുടെ ഡെപ്യൂട്ടി ചീഫ് എക്‌സിക്യൂട്ടീവ് ഓഫീസര്‍ മൈക്കല്‍ റുസ്സോ പറഞ്ഞു. കൊവിഡ് ഭീഷണി പൂര്‍ണമായി ഒഴിഞ്ഞിട്ടില്ലാത്തതും യാത്രക്കാരുടെ സുരക്ഷയും മുന്‍നിര്‍ത്തിയാണ് ജീവനക്കാരെ പിരിച്ച് വിടുന്നത്.
ജീവനക്കാരില്‍ 96 ശതമാനത്തിലധികം പേരും പൂര്‍ണ്ണമായും വാക്‌സിനേഷന്‍ ലഭിച്ചവരാണ്. വാക്‌സിനേഷന്‍ എടുക്കാത്ത ജീവനക്കാരെയും മറ്റ് ഇളവുകള്‍ അനുവദനീയമല്ലാത്ത ജീവനക്കാരെയുമാണ് ശമ്പളമില്ലാത്ത അവധിയില്‍ പ്രവേശിപ്പിക്കുന്നത്.
വ്യോമയാന മേഖലയിലെയും റെയില്‍, ഷിപ്പിംഗ് കമ്പനികളിലെയും ഒക്കെ തൊഴിലാളികള്‍ക്കായി പ്രത്യേക വാക്‌സിനേഷന്‍ നയങ്ങള്‍ തന്നെ രൂപീകരിക്കാന്‍ കനേഡിയന്‍ പ്രധാനമന്ത്രി ജസ്റ്റിന്‍ ട്രൂഡോ ഉത്തരവിട്ടിരുന്നു. ഒക്ടോബര്‍ മുതലായിരുന്നു ഇത്. എയര്‍ലൈന്‍ രംഗത്ത് സമ്പൂര്‍ണ വാക്‌സിനേഷന്‍ രാജ്യം നിര്‍ബന്ധമാക്കിയിട്ടുണ്ട്.
സമാനമായ നടപടിയുമായി ആസ്‌ട്രേലിയയും രംഗത്ത് എത്തിയിട്ടുണ്ട്. വിക്ടോറിയയില്‍ വാക്‌സിന്‍ എടുക്കാത്തവര്‍ക്ക് റീട്ടെയ്ല്‍ ഷോപ്പുകളില്‍ എത്തി അവശ്യ സാധനങ്ങള്‍ വാങ്ങാന്‍ ആകില്ല. നവംബര്‍ 24 മുതലാണ് ഇത് ബാധകമാക്കുക. ഇവിടെ 80 ശതമാനം പേരും രണ്ട് വാക്‌സിന്‍ ഡോസുകളും പൂര്‍ത്തിയാക്കിയതിനാല്‍ റീട്ടെയ്ല്‍ ഷോപ്പുകള്‍ എല്ലാം തുറന്നു പ്രവര്‍ത്തിച്ചു തുടങ്ങി. കൊവിഡ് പൂര്‍ണമായി അവസാനിച്ചിട്ടില്ലാത്തതിനാല്‍ ചിലര്‍ വാക്‌സിന്‍ സ്വീകരിക്കാത്തത് പൊതുജനങ്ങള്‍ക്കും വെല്ലുവിളിയായ സാഹചര്യത്തിലാണിത്.
