മുംബൈ: രാജ്യത്തെ മൂന്നാമത്തെ വലിയ ഇരുചക്ര വാഹന നിര്‍മ്മാതാക്കളായ ബജാജ് ഓട്ടോ മഹാരാഷ്ട്രയില്‍ പുതിയ പ്ലാന്റ് നിര്‍മ്മിക്കുന്നു. 650 കോടി ചെലവഴിച്ച് നിര്‍മ്മിക്കുന്ന പ്ലാന്റിന്റെ ധാരണാപത്രം മഹാരാഷ്ട്ര സര്‍ക്കാരുമായി ഒപ്പുവച്ചു. ചേതക്, കെടിഎം, ഹസ്ഖ്വാര്‍ണ, ട്രയംഫ് ബൈക്കുകളാണ് ഇവിടെ നിര്‍മ്മിക്കുക.
പുണെയിലെ ചകനിലുള്ള നിലവിലെ പ്ലാന്റിനോട് ചേര്‍ന്നായിരിക്കും പുതിയ പ്ലാന്റും നിര്‍മ്മിക്കുക. 2023 ഓടെ ഇവിടെ ഉല്‍പ്പാദനം ആരംഭിക്കാനാണ് ആലോചന. കമ്പനിയുടെ തൊട്ടടുത്ത എതിരാളികളായ ഹോണ്ട മോട്ടോര്‍സൈക്കിളും സ്‌കൂട്ടര്‍ ഇന്ത്യയും സുസുകി മോട്ടോര്‍സൈക്കിളും വമ്പന്‍ നിക്ഷേപങ്ങള്‍ നടത്താനുള്ള നീക്കങ്ങള്‍ താത്കാലികമായി നിര്‍ത്തിവച്ചിരിക്കുന്ന ഘട്ടത്തിലാണ് ബജാജിന്റെ തീരുമാനമെന്നത് ശ്രദ്ധേയമാണ്. അതേസമയം ഹീറോ മോട്ടോകോര്‍പ്പ് ഏഴ് വര്‍ഷത്തിനുള്ളില്‍ 10,000 കോടിയുടെ നിക്ഷേപം നടത്താനാണ് ആലോചിക്കുന്നത്.
