220ലധികം സേവനങ്ങള് ഉള്ക്കൊള്ളിച്ച് ബാങ്ക് ഓഫ് ബറോഡ (ബിഒബി) ഒരു പുതിയ ആപ്പ് അവതരിപ്പിച്ചു. 'ബോബ് വേള്ഡ്'എന്ന പേരില് അറിയപ്പെടുന്ന ആപ്പിലൂടെ ബാങ്കുമായി ബന്ധപ്പെട്ട 95ശതമാനം ഇടപാടുകള്ക്ക് വേണ്ടി ഒരാള്ക്ക് ഇനി ബാങ്കിലേക്ക് പോകേണ്ട ആവശ്യമില്ല. നൂതന ഡിജിറ്റല് ബാങ്കിങ് സംവിധാനമായ 'ബോബ് വേള്ഡ്' സേവ്, ഇന്വെസ്റ്റ്, ബോറോ, ഷോപ് എന്നിങ്ങനെ നാല് വിഭാഗങ്ങളിലായിട്ടാണ് സേവനങ്ങള് മൊബൈല് ആപ്പില് ലഭ്യമാക്കിയിരിക്കുന്നത്. ബാങ്കിലെ ഇടപാടുകള് വീട്ടിലോ ഓഫീസിലോ ഇരുന്ന് ചെയ്യാനുള്ള സൗകര്യം ഇന്ത്യയിലെയും വിദേശത്തെയും ഇടപാടുകാര്ക്ക് ഏറെ പ്രയോജനപ്പെടുമെന്ന് ബാങ്ക് ഓഫ് ബറോഡ തിരുവനന്തപുരം റീജിയണല് മാനേജര് ലക്ഷ്മി ആനന്ദ് 'ധന'ത്തോട് പറഞ്ഞു.
'ബോബ് വേള്ഡ്' ആപ്പിലൂടെ 10 മിനിറ്റിനുള്ളില് ഡിജിറ്റല് അക്കൌണ്ട് ആരംഭിക്കാനും ഉടനടി വെര്ച്വല് ഡെബിറ്റ് കാര്ഡ് നേടാനും കഴിയും. ഓണ്ലൈനായി ക്രെഡിറ്റ് സ്കോര് പരിശോധിക്കാം. മൈക്രോ, മിനി വ്യക്തിഗത വായ്പയ്ക്ക് അപേക്ഷിക്കാം. ഉടനടി പണം അക്കൗണ്ടിലെത്തുന്ന ഷോപ് ആന്ഡ് പേ സംവിധാനത്തിലൂടെ ഹോട്ടല്, ബസ്, വിമാന ടിക്കറ്റുകള്, ബുക്ക് ചെയ്യാം.
ആമസോണ്, ഫ്ലിപ്കാര്ട്ട്, ക്ലിക് തുടങ്ങിയവ ഉള്പ്പെടെയുള്ള ഇ-കൊമേഴ്സ് സൈറ്റുകളിലെ വില താരതമ്യം ചെയ്തു വാങ്ങാനുള്ള സൗകര്യവുമുണ്ട്. ഡിജിറ്റല് ഓണ്ലൈന് അക്കൗണ്ടുകളില് സൗജന്യ ഒടിടി സബ്സ്ക്രിപ്ഷന് ഉള്പ്പെടെയുള്ള വിവിധ ഓഫറുകളും അതരിപ്പിച്ചിട്ടുണ്ട്. ഇന്ഷ്വറന്സ്, മ്യൂചല് ഫണ്ട് മുതലായ നിക്ഷേപ ഇടപാടുകള് നേരിട്ടു ചെയ്യാന് കഴിയുമെന്നും ബോബ് വേള്ഡ് വഴിയുള്ള ഇടപാടുകള് പ്രോത്സാഹിപ്പിക്കുന്നതിന് ലോയല്റ്റി പോയിന്റുകളും റിവാര്ഡുകളും പ്രഖ്യാപിച്ചിട്ടുണ്ടെന്നും ബാങ്ക് ഓഫ് ബറോഡ ഡിജിറ്റല് ഹെഡ് പി.ശ്രുതി അറിയിച്ചു. ആന്ഡ്രോയ്ഡ് പ്ലേസ്റ്റോറിലും, ആപ്പിള് ആപ്പ് സ്റ്റോറിലും, ആപ് ലഭ്യമാകും. നേരത്തെ എം കണക്ട് പ്ലസ് എന്ന ആപ്പ് ആയിരുന്നു ബിഒബി- ക്കുണ്ടായിരുന്നത്.
