ടെലികോം ഓപ്പറേറ്ററായ ഭാരതി എയര്‍ടെല്‍ അതിന്റെ അനുബന്ധ സ്ഥാപനങ്ങളായ ഇന്‍ഡസ് ടവേഴ്സ്, എന്‍എക്സ്ട്രാ, ഭാരതി ഹെക്സാകോം എന്നിവയുമായുള്ള ബിസിനസ് ഇടപാടുകള്‍ക്കായി ഏകദേശം 1.17 ലക്ഷം കോടി രൂപ ചെലവഴിക്കാന്‍ പദ്ധതിയിട്ടിട്ടുണ്ടെന്ന് റെഗുലേറ്ററി ഫയലിംഗില്‍ വ്യക്തമാക്കി. 1.28 ശതമാനം ഓഹരികള്‍ വാങ്ങുന്നതിനായി 7,500 കോടി രൂപയുടെ നിക്ഷേപത്തിന് ഗൂഗിളിന് അംഗീകാരം നല്‍കുന്നതിനായി ഫെബ്രുവരി 26 ന് കമ്പനി അംഗങ്ങളുടെ പൊതുയോഗം നടത്തും.
മൊബൈല്‍ ടവര്‍ കമ്പനിയായ ഇന്‍ഡസ് ടവേഴ്സുമായി 88,000 കോടി രൂപയും ഡാറ്റാസെന്റര്‍ സ്ഥാപനമായ എന്‍എക്സ്ട്രയുടെ സേവനങ്ങള്‍ ലഭിക്കുന്നതിന് 15,000 കോടി രൂപയും ഭാരതി ഹെക്സാകോമുമായി 14,000 കോടി രൂപ വരെയുള്ള ഇടപാടുകളും ഭാരതി എയര്‍ടെല്‍ നടത്തുമെന്ന് അറിയിപ്പില്‍ പറയുന്നു. ഭാരതി എയര്‍ടെല്‍ അടുത്ത 4 സാമ്പത്തിക വര്‍ഷങ്ങളില്‍ ഇന്‍ഡസ് ടവറുമായുള്ള ഇടപാടുകള്‍ക്കായി 17,000 കോടി രൂപ വരെയും 2025-26 ല്‍ 20,000 കോടി രൂപ വരെയും നിക്ഷേപിക്കുമെന്ന് ഫയലിംഗില്‍ ശനിയാഴ്ച പറഞ്ഞു.
ആഗോളതലത്തിലുള്ള 5ജിയുടെ വികാസങ്ങള്‍ കണക്കിലെടുക്കുമ്പോള്‍, 5ജി ഉടന്‍ തന്നെ ഇന്ത്യയിലും യാഥാര്‍ത്ഥ്യമാകാന്‍ സാധ്യതയുണ്ട്. സാവധാനം പ്രധാന നഗരങ്ങളില്‍, തുടര്‍ന്ന് ഞങ്ങളുടെ നിലവിലെ നെറ്റ്വര്‍ക്കിന്റെ ഇന്ത്യയുടെ മറ്റ് ഭാഗങ്ങളിലേക്കും 5ജി വ്യാപിപ്പിക്കും. അതിനാല്‍, വന്‍തോതിലുള്ള 5ജി അടിസ്ഥാന സൗകര്യങ്ങളുടെ ആവശ്യകതകള്‍ വര്‍ദ്ധിപ്പിച്ചതിനാല്‍, 2025-26 സാമ്പത്തിക വര്‍ഷത്തില്‍ ഇന്‍ഡസ് ടവേഴ്സുമായി പ്രതിവര്‍ഷം 20,000 കോടി രൂപ വരെയുള്ള ഉയര്‍ന്ന ഇടപാടുകള്‍ കമ്പനി പ്രതീക്ഷിക്കുന്നതായും അറിയിപ്പില്‍ പറയുന്നു.
