നാഷണല്‍ സ്റ്റോക്ക് എക്സ്ചേഞ്ച് (എന്‍എസ്ഇ) മുന്‍ മാനേജിങ് ഡയറക്ടറും ചീഫ് എക്സിക്യൂട്ടീവ് ഓഫീസറുമായിരുന്ന ചിത്ര രാമകൃഷ്ണ അറസ്റ്റില്‍. എന്‍എസ്ഇ കോ-ലൊക്കേഷന്‍ വിഷയത്തില്‍ നടന്നുകൊണ്ടിരിക്കുന്ന അന്വേഷണവുമായി ബന്ധപ്പെട്ട് ഞായറാഴ്ച വൈകിട്ടാണ് ചിത്രയെ സിബിഐ അറസ്റ്റ് ചെയ്തത്. സ്റ്റോക്ക് എക്സ്ചേഞ്ച് തിരിമറി കേസില്‍ ഇവരുടെ മുന്‍കൂര്‍ ജാമ്യാപേക്ഷ ഡല്‍ഹിയിലെ സിബിഐ പ്രത്യേക കോടതി കഴിഞ്ഞ ദിവസം തള്ളിയിരുന്നു. ഇതിന് പിന്നാലെയാണ് അറസ്റ്റ്. 2013- 16 കാലയളവില്‍ എന്‍എസ്ഇ എംഡി ആയിരിക്കേ തിരിമറികള്‍ നടന്നെന്നാണ് കണ്ടെത്തല്‍.
'ഹിമാലയന്‍ യോഗി' എന്ന് വിശേഷിപ്പിക്കപ്പെടുന്ന സന്യാസിയുടെ താല്‍പര്യ പ്രകാരം താന്‍ പല കാര്യങ്ങളും ചെയ്തെന്നു ചിത്ര നേരത്തേ വ്യക്തമാക്കിയിരുന്നു. അന്വേഷണ ഉദ്യോഗസ്ഥരെ തെറ്റിദ്ധരിപ്പിക്കാന്‍ നിലവിലില്ലാത്ത ഒരാളെയാണ് രാമകൃഷ്ണ അവതരിപ്പിച്ചതെന്ന് കോടതി ശനിയാഴ്ച പറഞ്ഞു. സെക്യൂരിറ്റീസ് എക്സ്ചേഞ്ച് ബോര്‍ഡ് ഓഫ് ഇന്ത്യയും (സെബി) സിബിഐയും വിഷയത്തില്‍ വേഗത്തില്‍ നടപടിയെടുക്കാത്തതിനെയും കോടതി വിമര്‍ശിച്ചു. ആനന്ദ് സുബ്രഹ്മണ്യന്റെ ക്രമങ്ങള്‍ പാലിക്കാതെ വളരെ ഉയര്‍ന്ന ശമ്പളത്തിലുള്ള നിയമന നടപടി പ്രഥമദൃഷ്ട്യാ കാണിക്കുന്നത്, അവരെല്ലാം കോ-ലൊക്കേഷന്‍ അഴിമതിയുടെ ലക്ഷ്യങ്ങള്‍ നടപ്പിലാക്കുന്നതിനോ മുന്നോട്ട് കൊണ്ടുപോകുന്നതിനോ പരസ്പരം യോജിച്ച് പ്രവര്‍ത്തിച്ചിട്ടുണ്ടാകാം എന്നാണെന്നു കോടതി നിരീക്ഷിച്ചു.
കമ്പനിയുടെ ഹ്യൂമന്‍ റിസോഴ്‌സ് നയങ്ങള്‍ ലംഘിച്ച് സുബ്രഹ്മണ്യനെ മുന്‍ ഗ്രൂപ്പ് ഓപ്പറേറ്റിങ് ഓഫീസറായി (ജിഒഒ) ചിത്ര രാമകൃഷ്ണ നിയമിച്ചതായും സെബി കണ്ടെത്തിയിരുന്നു. കേസുമായി ബന്ധപ്പെട്ട് ആനന്ദ് സുബ്രഹ്മണ്യനെ ഇക്കഴിഞ്ഞ ഫെബ്രുവരി 25ന് സിബിഐ അറസ്റ്റ് ചെയ്തിരുന്നു. ചിത്ര രാമകൃഷ്ണയും യോഗി എന്ന് വിളിക്കപ്പെടുന്ന വ്യക്തിയും തമ്മിലുള്ള ഇ-മെയില്‍ കൈമാറ്റങ്ങളുടെ വെളിപ്പെടുത്തലിനെ തുടര്‍ന്നുള്ള ഏജന്‍സിയുടെ തുടര്‍ച്ചയായ അന്വേഷണത്തില്‍ സഹകരിക്കുന്നതില്‍ പരാജയപ്പെട്ടതിനെ തുടര്‍ന്നാണ് സുബ്രഹ്മണ്യനെ അറസ്റ്റ് ചെയ്തത്. സുബ്രഹ്മണ്യന്റെ നിയമനത്തില്‍ 'യോഗി'യാണ് ചിത്ര രാമകൃഷ്ണയെ നയിച്ചത്. വിഷയവുമായ ബന്ധപ്പെട്ടു മുന്‍ ഉദ്യോഗസ്ഥന്‍ രവി നരേനേയും ഏജന്‍സി ചോദ്യം ചെയ്തിരുന്നു. നരേന്‍ 1994 ഏപ്രില്‍ മുതല്‍ 2013 മാര്‍ച്ച് വരെ എന്‍എസ്ഇയുടെ മാനേജിങ് ഡയറക്ടറും സിഇഒയും ആയിരുന്നു.
2018 ല്‍ സെബി ഫ്‌ളാഗ് ചെയ്ത കേസ്, ചില ബ്രോക്കര്‍മാര്‍ക്ക് എന്‍എസ്ഇ സെര്‍വറുകളിലേക്ക് അന്യായമായ മുന്‍ഗണനാ ആക്സസ് ലഭിച്ചുവെന്ന ആരോപണവുമായി ബന്ധപ്പെട്ടതാണ്. ട്രേഡിങ് സ്‌ക്രീനില്‍ ഓഹരി വിലകള്‍ ഓരോ മൈക്രോസെക്കന്‍ഡിലും മാറിക്കൊണ്ടിരിക്കും. ക്യൂവില്‍ നില്‍ക്കുന്ന മറ്റുള്ളവര്‍ക്ക് മുമ്പായി ഓഹരി വില ലഭിക്കുന്ന ഒരു വ്യാപാരി, വിലയെ കുറിച്ച് മുന്‍കൂട്ടി മനസിലാക്കുകയും, അയാള്‍ക്ക് കാര്യമായ നേട്ടങ്ങള്‍ക്കുള്ള അവസരം നല്‍കുകയും ചെയ്യുന്നു. 2010- 14 കാലഘട്ടത്തില്‍, ചില ബ്രോക്കര്‍മാര്‍ മറ്റുള്ളവര്‍ക്ക് മുമ്പ് എക്സ്ചേഞ്ച് സെര്‍വറുമായി ബന്ധിപ്പിച്ചു.
2012നും 2014നും ഇടയില്‍ ട്രേഡിങ് അംഗങ്ങളിലൊരാളായ ഒപിജി സെക്യൂരിറ്റീസിന് അന്യായമായ ആക്സസ് നല്‍കിയതായി ആരോപിക്കപ്പെട്ടു. ഇത് സെക്കണ്ടറി സെര്‍വറിലേക്ക് ആദ്യം ലോഗിന്‍ ചെയ്യാനും കോ-ലൊക്കേഷന്‍ സൗകര്യത്തില്‍ മറ്റുള്ളവര്‍ക്ക് മുമ്പായി ഡേറ്റ നേടാനും പ്രാപ്തമാക്കി. 2014-15ല്‍ സെക്യൂരിറ്റീസ് ആന്‍ഡ് എക്സ്ചേഞ്ച് ബോര്‍ഡ് ഓഫ് ഇന്ത്യയ്ക്ക് (സെബി) പരാതി നല്‍കി. ചില ഉന്നത എന്‍എസ്ഇ ഉദ്യോഗസ്ഥരുമായി ഒത്തുചേര്‍ന്ന് ചില ബ്രോക്കര്‍മാര്‍ സൗകര്യം ദുരുപയോഗം ചെയ്തു എന്നായിരുന്നു പരാതി.
എന്‍എസ്ഇ പിന്നീട് അംഗങ്ങള്‍ക്ക് ഡേറ്റ റിലേ ചെയ്യാന്‍ ടിക്- ബൈ- ടിക്ക് സെര്‍വര്‍ പ്രോട്ടോക്കോള്‍ ഉപയോഗിച്ചു. ഈ പ്രോട്ടോക്കോളിന്റെ സവിശേഷമായ ഭാഗം അത് എങ്ങനെ വിവരങ്ങള്‍ നല്‍കുന്നു എന്നതാണ്. സാധാരണ ഡേറ്റ പ്രോട്ടോക്കോളുകള്‍ ഒരേ സമയം നെറ്റ്വര്‍ക്കില്‍ കണക്റ്റുചെയ്തിരിക്കുന്ന എല്ലാ ഉപയോക്താക്കള്‍ക്കും ഡേറ്റ അയയ്ക്കുന്നു. എന്നാല്‍ ലഭിച്ച ഓര്‍ഡറുകളുടെ ക്രമത്തിലാണ് ടിബിടി ട്രാന്‍സ്മിറ്റ് ചെയ്യുന്നത്. മറ്റൊരു വിധത്തില്‍ പറഞ്ഞാല്‍, സിസ്റ്റത്തിലേക്കുള്ള പ്രവേശനം ആദ്യം ലഭിക്കുന്ന ഉപയോക്താവിന് ബാക്കിയുള്ളതിനേക്കാള്‍ നേരത്തെ ഡേറ്റ ലഭിക്കും.
ലോകമെമ്പാടുമുള്ള എക്‌സ്‌ചേഞ്ചുകള്‍ അത്യാധുനിക ട്രേഡിങ് അംഗങ്ങള്‍ക്ക് വാഗ്ദാനം ചെയ്യുന്ന ഒരു ജനപ്രിയ സംവിധാനമാണ് കോ-ലൊക്കേഷന്‍. ഇന്ത്യയിലെ പ്രധാന സ്റ്റോക്ക് എക്സ്ചേഞ്ച് സെര്‍വറുകള്‍ മുംബൈയിലാണെങ്കിലും അവ ഉപയോഗിക്കുന്ന ബ്രോക്കറേജുകള്‍ രാജ്യത്തുടനീളം വ്യാപിച്ചുകിടക്കുന്നു. ഈ സിസ്റ്റങ്ങള്‍ ആക്സസ് ചെയ്യുന്നതിന് സാധാരണ ഇന്റര്‍നെറ്റ് കണക്ഷന്‍ ഉപയോഗിക്കുന്നത് ചിലപ്പോള്‍ ഡേറ്റാ കാലതാമസത്തിലേക്കോ ഡേറ്റാ ട്രാന്‍സ്മിഷന്‍ വൈകുന്നതിലേക്കോ നയിക്കുന്നു.
