ബെംഗളൂരു: കോഫി ഡേ ഗ്രൂപ്പ് മൂന്നിലൊന്ന് കട ബാധ്യതകൾ ഒഴിവാക്കി. ഗ്ലോബൽ വില്ലേജ് ടെക് പാർക്ക് ബ്ലാക്ക്സ്റ്റോണിന് വിറ്റ ഇടപാടിൽ ആദ്യത്തെ തുകയായി ലഭിച്ച 1,700 കോടി രൂപ കൊണ്ടാണ് ഇത് സാധ്യമാക്കിയത്. വെള്ളിയാഴ്ച ഈ തുക ലഭിച്ച് മണിക്കൂറുകൾക്കകം തന്നെ ബാങ്കുകൾക്കും മറ്റ് വായ്പക്കാർക്കും നൽകി കടം വീട്ടുകയായിരുന്നു.
ഈ തിരിച്ചടവിലൂടെ കോഫി ഡേ ഗ്രൂപ്പിന്റെ കടം ഏകദേശം 3,100 കോടി രൂപയായി കുറഞ്ഞു. ഇതിൽ സബ്സിഡിയറി സിക്കൽ ലോജിസ്റ്റിക്സിന്റെ 1,400 കോടി രൂപയും ഉൾപ്പെടുന്നു. 13 ബാങ്കുകളുടേയും ധനകാര്യ സ്ഥാപനങ്ങളുടേയും കടങ്ങളാണ് ഈ തുകയിലൂടെ തിരിച്ചടച്ചത്. സ്റ്റാൻഡേർഡ് ചാർട്ടേഡ് ബാങ്കിനും ആക്‌സിസ് ബാങ്കിനും യഥാക്രമം 500, 415 കോടി രൂപ ലഭിച്ചു. പിരമൽ ഫിനാൻസിന് 200 കോടി രൂപയും യെസ് ബാങ്കിന് 108 കോടി രൂപയുമാണ് ലഭിച്ചതെന്ന് കമ്പനി വൃത്തങ്ങൾ അറിയിച്ചു. കോട്ടക് ബാങ്ക്, ആർ‌ബി‌എൽ ബാങ്ക് എന്നിവരാണ് പണം നേടിയ മറ്റ് സ്ഥാപനങ്ങൾ.
2019 സെപ്റ്റംബർ 6 ന് ബെംഗളൂരുവിന്റെ പ്രാന്തപ്രദേശത്ത് 3.3 മില്യൺ ചതുരശ്ര അടി വിസ്തീർണ്ണമുള്ള കോഫി ഡേ ഗ്രൂപ്പിന്റെ ഗ്ലോബൽ വില്ലേജ് ടെക്നോളജി പാർക്ക് 2,700 കോടി രൂപയ്ക്കാണ് ബ്ലാക്ക്സ്റ്റോൺ സ്വന്തമാക്കിയത്. ഈ തുകയ്ക്ക് ശേഷമുള്ള ബാക്കി പണം അടുത്ത ആറുമാസത്തിനുള്ളിൽ പ്രതീക്ഷിക്കുന്നു. കൊറോണ വൈറസ് പ്രതിസന്ധിയെത്തുടർന്ന് സാമ്പത്തിക പ്രവർത്തനങ്ങളും ക്രെഡിറ്റ് മാർക്കറ്റുകളും നിർത്തലാക്കുമ്പോഴും എല്ലാ കടക്കാർക്കും നൽകേണ്ട മുഴുവൻ പലിശയും നൽകിയതായി കോഫി ഡേ എന്റർപ്രൈസസ് പറഞ്ഞു.
