ന്യൂഡല്‍ഹി: രാജ്യത്ത് വാണിജ്യ സിലിണ്ടറുകളുടെ വില കുറച്ചു. 19 കിലോ ഗ്രാമിന്റെ വാണിജ്യ സിലിണ്ടറിന്റെ വില 134 രൂപയാണ് കുറച്ചത്. ഇതോടെ വാണിജ്യ സിലിണ്ടറിന്റെ വില 2223.50 രൂപയായി കുറഞ്ഞു. എന്നാല്‍, ഗാര്‍ഹിക സിലിണ്ടറിന്റെ വിലയില്‍ എണ്ണകമ്പനികള്‍ മാറ്റം വരുത്തിയിട്ടില്ല. നേരത്തെ മേയ് മാസത്തില്‍ എല്‍.പി.ജി സിലിണ്ടറിന്റെ വില കമ്പനികള്‍ വര്‍ധിപ്പിച്ചിരുന്നു. 14 കിലോയുടെ ഗാര്‍ഹിക സിലിണ്ടറിനും അന്ന് വില കൂട്ടിയിരുന്നു. ഗാര്‍ഹിക സിലിണ്ടറിന്റെ വില 3.50 രൂപയും വാണിജ്യ സിലിണ്ടറിന്റേത് എട്ട് രൂപയുമാണ് വര്‍ധിപ്പിച്ചത്.

അതേസമയം, അന്താരാഷ്ട്ര വിപണിയില്‍ എണ്ണവില ഉയരുകയാണ്. ബ്രെന്റ് ക്രൂഡിന്റെ വില ബാരലിന് 122.8 ഡോളറായാണ് വര്‍ധിച്ചത്. ഡബ്യുടിഐ ക്രൂഡിന്റെ വിലയും കൂടിയിട്ടുണ്ട്. 115.4 ഡോളറായാണ് ഡബ്യുടിഐ ക്രൂഡിന്റെ വില വര്‍ധിച്ചത്. കൊല്‍ക്കത്തയില്‍ 2322 രൂപ, മുംബൈയില്‍ 2171.50 രൂപ, ചെന്നൈയില്‍ 2373 രൂപ എന്നിങ്ങനെയാണ് പുതുക്കിയ വില.