മുംബൈ: ഉത്പന്ന വിപണിയിലെ വ്യാപാരസമയം വെട്ടിക്കുറച്ച് ‘സെബി’(സെക്യൂരിറ്റീസ് ആൻഡ് എക്സ്ചേഞ്ച് ബോർഡ് ഓഫ് ഇന്ത്യ) ഉത്തരവിറക്കി. ലോക് ഡൗണിന്റെ ഭാഗമായി മൾട്ടി കമ്മോഡിറ്റി എക്സ്ചേഞ്ച് (എംസിഎക്സ്), നാഷണൽ കമ്മോഡിറ്റി ആൻഡ് ഡെറിവേറ്റീവ്‌സ് എക്സ്ചേഞ്ച്(എൻസിഡിഇഎക്സ്), ഇന്ത്യൻ കമ്മോഡിറ്റി എക്സ്ചേഞ്ച്(ഐസിഇഎക്സ്) എന്നിവയിൽ വൈകീട്ടത്തെ വ്യാപാരം ഒഴിവാക്കാനാണ് തീരുമാനം. ഇതോടെ രാത്രി 11.30 വരെ നടന്നിരുന്ന വ്യാപാരം വൈകീട്ട് അഞ്ചുമണിവരെയായി ചുരുങ്ങും. മാർച്ച് 30 മുതൽ ഏപ്രിൽ 14 വരെയാണ് പുതിയ സമയം പ്രാബല്യത്തിൽ വരുക.
വ്യാപാരം ആരംഭിക്കുന്നതിന് 15 മിനിറ്റ് മുമ്പ് ഓർഡറുകൾ റദ്ദാക്കുന്നതിനുള്ള പ്രീ-ഓപ്പൺ സെഷൻ ആരംഭിക്കുകയും ക്ലയന്റ് കോഡ് പരിഷ്കരണം വൈകുന്നേരം 5 നും 5.15 നും ഇടയിൽ അനുവദിക്കുകയും ചെയ്യും. മാത്രമല്ല, ഏപ്രിൽ 2, 6, 14 തീയതികളിൽ വൈകീട്ടത്തെ സെഷനുകൾ ഉണ്ടാകില്ലെന്ന് എംസിഎക്സ് വ്യാഴാഴ്ച പ്രസ്താവനയിൽ പറഞ്ഞു. അതുപോലെ, പ്രീ-ഓപ്പൺ സെഷൻ രാവിലെ 8:45 ന് ആരംഭിക്കുമെന്നും ക്ലയന്റ് കോഡ് പരിഷ്ക്കരണം രാവിലെ 9 മുതൽ വൈകുന്നേരം 5.15 വരെ അനുവദിക്കുമെന്നും എൻസിഡിഇഎക്സ് അറിയിച്ചു.
കുറഞ്ഞ വ്യാപാര സമയം എല്ലാ അംഗങ്ങൾക്കും വലിയ ആശ്വാസം നൽകുമെന്നും എന്നാൽ ലോക്ക്ഡൗൺ തുടരുന്നതുവരെ ചരക്ക് വ്യാപാരം പൂർണ്ണമായും നിർത്തിവയ്ക്കണമെന്ന് നിരവധി അസോസിയേഷൻ അംഗങ്ങളിൽ നിന്ന് അഭ്യർത്ഥനകൾ വരുന്നുണ്ടെന്നും കമ്മോഡിറ്റി പാർടിസിപന്റ്‌സ് അസോസിയേഷൻ ഓഫ് ഇന്ത്യ (സി‌പി‌എ‌ഐ)യുടെ പ്രസിഡന്റ് നരീന്ദർ വാധ്വ പറഞ്ഞു.
നിക്ഷേപകരെ പ്രതികൂലമായി ബാധിക്കാതിരിക്കാൻ വ്യാപാര സേവനങ്ങൾ അവശ്യ സേവന നിയമത്തിന് കീഴിൽ കൊണ്ടുവരണമെന്ന് എല്ലാ സംസ്ഥാന സർക്കാരുകളെയും ബോധ്യപ്പെടുത്തണമെന്ന് നേരത്തെ തന്നെ സി‌പി‌എ‌ഐ കേന്ദ്രത്തോട് ആവശ്യപ്പെട്ടിരുന്നു. ലോക്ക്ഡൗണിനെത്തുടർന്ന് ചരക്ക് വ്യാപാര സ്ഥാപനങ്ങളിലെ ജീവനക്കാർക്ക് ഓഫീസുകളിൽ എത്താൻ ബുദ്ധിമുട്ടുണ്ടെന്ന് ബുധനാഴ്ച സി‌പി‌എ‌ഐ അറിയിച്ചിരുന്നു.
