ഇ-കൊമേഴ്സ് വാങ്ങലുകളും അവയുടെ പേമെന്റുകളും ഇനി ദുഷ്‌കരമാകും. ഉപയോക്താക്കളുടെ കാര്‍ഡ് വിവരങ്ങള്‍ പോര്‍ട്ടലുകള്‍ ശേഖരിച്ചുവയ്ക്കേണ്ടതില്ലെന്ന ആര്‍ബിഐ നിലപാട് നിര്‍ബന്ധമാകുകയാണ്. രാജ്യത്ത് സൈബര്‍ ആക്രമണങ്ങളും ഓണ്‍ലൈന്‍ തട്ടിപ്പുകളും വ്യാപകമാകുന്ന സാഹചര്യത്തിലാണ് ആര്‍ബിഐ നടപടികള്‍ കര്‍ശനമാക്കുന്നത്. 2022 ജനുവരി മുതല്‍ നിയന്ത്രണങ്ങള്‍ കര്‍ശനമാക്കാനാണു തീരുമാനം. ഇതോടെ ഒരോ വാങ്ങലുകള്‍ക്കും ഉപയോക്താക്കള്‍ ബാങ്ക് വിവരങ്ങള്‍ നല്‍കേണ്ടി വരും.
കാര്‍ഡ് വിവരങ്ങള്‍ ശേഖരിക്കുന്നതിനു ബദലായി ഇ-കൊമേഴ്സ് സ്ഥാപനങ്ങള്‍ക്കു ടോക്കനൈസേഷനാണ് ആര്‍ബിഐ മുന്നോട്ടുവയ്ക്കുന്നത്. ഇതിനായി ഇ-കൊമേഴ്സ് സ്ഥാപനങ്ങള്‍ കാര്‍ഡ് നെറ്റ്വര്‍ക്കുമായി പങ്കാളിത്തം സ്ഥാപിക്കണം. കാര്‍ഡ് നെറ്റ്വര്‍ക്ക് ഒരോ കാര്‍ഡുകള്‍ക്കും വ്യത്യസ്തമായ ടോക്കണുകള്‍ നല്‍കും. ഈ ടോക്കണുകള്‍ വേറെ ഒരു സ്ഥലത്തും ഉപയോഗിക്കാനാവില്ല. എന്നാല്‍ ഇതിനു സമയം ആവശ്യമാണെന്നാണു വിപണിയുടെ വിലയിരുത്തല്‍. ഇടപാടുകള്‍ വേഗത്തിലാക്കാനാണ് പോര്‍ട്ടലുകള്‍ കാര്‍ഡ് വിവരങ്ങള്‍ ശേഖരിച്ചു വയ്ക്കുന്നത്. ഇതുവഴി ഇടപാടുകള്‍ മുടങ്ങുന്നത് ഒഴിവാക്കാനും സാധിക്കും.
നിലവില്‍ ഒരു തവണ ഉപയോഗിച്ച പേമെന്റ് വിവരങ്ങള്‍ ഭാവിയിലേക്ക് ഉപയോക്താക്കളുടെ പ്രൊഫൈലില്‍ ശേഖരിച്ചു വയ്ക്കാന്‍ ഇ-പോര്‍ട്ടലുകള്‍ അനുമതി നല്‍കിയിരുന്നു. ഇതു ഉപയോക്താക്കളുടെ ഇടപാടുകള്‍ വേഗത്തിലാക്കിയിരുന്നു. പുതിയ നിയമം വരുന്നതോടെ പേമെന്റ് നടപടികള്‍ ദുഷ്‌കരമാകും. ഫ്ളാഷ് സെയിലുകള്‍, ലിമിറ്റഡ് ഓഫറുകള്‍ എന്നിവയിലെ പങ്കെടുക്കലുകളാകും കൂടുതല്‍ ദുഷ്‌കരമാകുക. ഉപയോക്താക്കളുടെ ഡേറ്റയുടെ സംരക്ഷണവും അവകാശങ്ങളും ഉറപ്പുവരുത്തുകയാണ് നടപടിയുടെ ലക്ഷ്യമെന്ന് ആര്‍ബിഐ വ്യക്തമാക്കി.
വ്യാപാരിയുടെ നെറ്റ്വര്‍ക്ക് എത്ര സുരക്ഷിതമാണെങ്കിലും ഉപയോക്താക്കളുടെ അക്കൗണ്ട് വിവരങ്ങളും ഇടപാട് വിവരങ്ങളും സംഭരിക്കാന്‍ സമ്മതിക്കില്ലെന്നാണ് ആര്‍.ബി.ഐയുമായി അടുത്തവൃത്തങ്ങള്‍ നല്‍കുന്ന സൂചന. സെപ്റ്റംബര്‍ മുതല്‍ ആര്‍.ബി.ഐയുടെ റിക്കറിങ് പേമെന്റ് മാനദണ്ഡങ്ങളും ഓണ്‍ലൈന്‍ ബിസിനസുകാര്‍ നടപ്പാക്കേണ്ടതുണ്ട്. അടുത്ത മാസം മുതല്‍ റിക്കറിങ് പേമെന്റുകള്‍ക്ക്, ഉപയോക്താക്കള്‍ ബാങ്കുകള്‍ക്ക് മാന്‍ഡേറ്റ് ഫോം നല്‍കണം. ഓണ്‍ലൈന്‍ സ്ഥാപനങ്ങള്‍ക്ക് ഇതില്‍ ഡെബിറ്റ് ചാര്‍ജ് ഈടാക്കാനാകില്ല.
