ടെസ് ലയുടെ സ്ഥാപകനും സ്പേസ് എക്സിന്റെ സിഇഒയും ശതകോടീശ്വരനമായ ഇലോണ്‍ മസ്‌ക് അവസാനത്തെ വീടുകൂടി വിറ്റൊഴിയുന്നു. സാന്‍ ഫ്രാന്‍സിസ്‌കോ ബേ ഏരിയയിലെ ഒരു വീട് മാത്രമെ തന്റെ സ്വന്തമായുള്ളൂ എന്ന് ട്വിറ്ററില്‍ കുറിച്ച് ഒരാഴ്ചക്ക് ശേഷമാണ് ആ വീട് വില്‍ക്കുന്ന കാര്യവും പ്രഖ്യാപിച്ചത്.
അമേരിക്കയിലെ കോടീശ്വരന്മാരായ മസ്‌ക്, ജെഫ് ബെസോസ്, വാറന്‍ ബഫെറ്റ് എന്നിവര്‍ ഉള്‍പ്പടെയുള്ളവരില്‍ പലരും ആദായനികുതി അടയ്ക്കുന്നില്ലെന്ന് വാര്‍ത്താ വെബ്സൈറ്റായ പ്രോപബ്ലിക്ക ഈയിടെ റിപ്പോര്‍ട്ട് ചെയ്തിരുന്നു. റിപ്പോട്ട് പുറത്തുവന്ന് ദിവസങ്ങള്‍ക്കുശേഷം ബേ ഏരിയയിലെ വീടൊഴികെയുള്ള വീടുകള്‍ വിറ്റതായും അദ്ദേഹം ട്വീറ്റ് ചെയ്തു. ഇപ്പോള്‍ അവസാനത്തെ വീടും വിറ്റൊഴിയുകയാണ് അദ്ദേഹം.
പിന്നെ എവിടെയാണ് മസ്‌ക് താമസിക്കുന്നത്? സൗത്ത് ടെക്സാസിലെ വീദൂര ബീച്ചായ ബോക ചിക്കയിലെ സ്പേസ് എക്സിന്റെ ഉമടസ്ഥതയിലുള്ള വീട്ടില്‍ വാടകയ്ക്കാണ് അദ്ദേഹം ഇപ്പോള്‍ കഴിയുന്നത്. സ്പേസ് എക്സ് കമ്പനിയുമായി ഒരു വര്‍ഷം മുമ്പാണ് ശാന്തതീരമായ ബോക ചിക്കയില്‍ അദ്ദേഹമെത്തുന്നത്. മാര്‍ച്ചില്‍ അതിനെ സ്റ്റാര്‍ബേസ് എന്ന് പുനര്‍നാമകരണം ചെയ്യുമെന്ന് പ്രഖ്യാപിക്കുകയും ചെയ്തു. സാറ്റലൈറ്റ് അധിഷ്ഠിത ബ്രോഡ്ബാന്‍ഡ് സേവനമായ സ്റ്റാര്‍ലിങ്കിനായി ടെക്സാസില്‍ പുതിയ ഫാക്ടറി സ്ഥാപിക്കുന്നതിന്റെ തരിക്കിലാണ് അദ്ദേഹമിപ്പോള്‍.
