കൊറോണ വൈറസിന്റെ ആഘാതത്തില്‍ അന്താരാഷ്ട്ര എണ്ണ വിപണി വലിയ തളര്‍ച്ചയിലൂടെയാണ് ഇപ്പോള്‍ കടന്നുപോകുന്നത്. എണ്ണ വ്യാപാരത്തില്‍ അധിഷ്ടിതമായ ഗള്‍ഫ് രാജ്യങ്ങള്‍ക്ക് കൊറോണ വൈറസ് ഇരുട്ടടി നല്‍കും. ക്രൂഡ് ഓയില്‍ വില ഇപ്പോള്‍ ബാരലിന് 70 ഡോളറില്‍ നിന്ന് 55 ഡോളറായി ചുരുങ്ങി. ഇതോടെ രാജ്യാന്തര എണ്ണ വിപണിയില്‍ പെട്രോളിനും ഡീസലിനും വില കുറഞ്ഞു.
ഡല്‍ഹിയില്‍ പെട്രോളിന് ലിറ്ററിന് 73.4 രൂപയും, ഡീസലിന് 66.09 രൂയുമാണ് വില. മുംബൈയില്‍ പെട്രോളിന് വില ലിറ്ററിന് 78.069 രൂപയും, ഡീസലിന് 69.27 രൂപയുമാണ് വില. ബംഗളൂരുവില്‍ 75.52 രൂപയും, ഡീസലിന് 68.32 രൂപയുമാണ് വില. ചെന്നൈയില്‍ പെട്രോളിന് ലിറ്ററിന് 75.89 രൂപയും, ഡീസലിന് 68.81 രൂപയുമാണ് വില.
ഇന്ത്യന്‍ ഓഹരി വിപണിക്ക് ഇന്ന് ആവേശം
ക്രൂഡ് ഓയില്‍ വില 13 മാസത്തിനിടെ ഏറ്റവും താഴ്ന്ന നിരക്കിലേക്കെത്തിയതോടെ ഓഹരി വിപണിയും ഇന്ന് ആവേശത്തിലാണ്. ബജറ്റ് പ്രഖ്യാപനത്തിന് ശേഷം തളര്‍ച്ച നേരിട്ട വിപണി ചില സൂചനകള്‍ നല്‍കുന്നുണ്ട്. ഓഹരികള്‍ ട്രേഡ് ചെയ്യപ്പെടുന്ന ബിഎസ്ഇ, എന്‍എസ്ഇ സൂചികള്‍ ഇന്ന് റെക്കോര്‍ഡ് കുതിച്ചുചാട്ടമാണ് നടത്തുന്നത്. മുംബൈ ഓഹരി സൂചികയായ സെന്‍െസെക്‌സ് 741 പോയിന്റ് ഉയര്‍ന്ന് 40,613 ലേക്കെത്തിയാണ് ഇന്ന് വ്യാപാരം അരങ്ങേറുന്നത്. ദേശീയ ഓഹരി സൂചികയായ നിഫ്റ്റി 216 പോയിന്റ് ഉയര്‍ന്ന് 11,924 ലേക്കെത്തിയാണ് ഇന്ന് വ്യാപാരം അരങ്ങേറുന്നത്. നിലവില്‍ ബിഎസ്ഇയിലെ വിവിധ കമ്പനികളുടെ വിപണി മൂലധനത്തില്‍ ആകെ കൂട്ടിച്ചേര്‍ത്തത് രണ്ട് ലക്ഷം കോടി രൂപയോളമാണ്. വ്യാപാരം ആരംഭിച്ച് 90 മിനിട്ടിലാണിതെന്ന് ഓര്‍ക്കണം.
