ഇന്ത്യയില്‍ കറന്‍സി നോട്ടുകളുടെ പ്രചാരം കുത്തനെ കൂടിയെന്ന് റിപ്പോര്‍ട്ട്. നടപ്പ് സാമ്പത്തിക വര്‍ഷത്തിന്റെ ആദ്യ ഒമ്പത് മാസങ്ങളില്‍ പ്രചാരത്തിലുളള മൊത്തം കറന്‍സി നോട്ടുകളുടെ മൂല്യം 13 ശതമാനം വര്‍ധിച്ചു. റിസര്‍വ് ബാങ്ക് പുറത്തുവിട്ട കണക്കുകളിലാണ് പ്രസ്തുത വിവരങ്ങളുളളത്. കൊവിഡ്-19 പകര്‍ച്ചവ്യാധി മൂലമുണ്ടായ അനിശ്ചിതത്വത്തിനിടയില്‍ മുന്‍കരുതല്‍ നടപടിയായി പണം കൈവശം വയ്ക്കാന്‍ വ്യക്തികള്‍ താല്‍പ്പര്യപ്പെടുന്നതിനാലാണ് ഈ സാഹചര്യം സൃഷ്ടിക്കപ്പെട്ടത്.
റിസര്‍വ് ബാങ്ക് ഓഫ് ഇന്ത്യ (ആര്‍ബിഐ) അടുത്തിടെ പുറത്തുവിട്ട കണക്കുകള്‍ പ്രകാരം 2020 മാര്‍ച്ച് 31ലെ 24,47,312 കോടി രൂപയില്‍ നിന്ന് പ്രചാരത്തിലുളള കറന്‍സി നോട്ടുകളുടെ മൂല്യം 2021 ജനുവരി ഒന്നായപ്പോഴേക്കും 3,23,003 കോടി അഥവാ 13.2 ശതമാനം വര്‍ധിച്ച് 27,70,315 കോടി രൂപയായി.
2020 സാമ്പത്തിക വര്‍ഷത്തെ ഏപ്രില്‍-ഡിസംബര്‍ കാലയളവിലെ വര്‍ധന 6 ശതമാനമായിരുന്നു. ലോക്ക്ഡൗണ്‍ സമയത്തെയും തുടര്‍ന്നുളള നാളുകളിലെയും ആവശ്യകതകള്‍ നിറവേറ്റുന്നതിനായി ആളുകള്‍ കൂടുതല്‍ പണം സ്വരൂപിക്കുന്നതിനാല്‍ നിലവിലെ സാമ്പത്തിക വര്‍ഷത്തില്‍ പ്രചാരത്തിലുള്ള കറന്‍സിയുടെ അളവ് വളരെ ഉയര്‍ന്നതാണെന്ന് കെയര്‍ റേറ്റിംഗ് ചീഫ് ഇക്കണോമിസ്റ്റ് മദന്‍ സബ്‌നാവിസ് പ്രമുഖ ദേശീയ മാധ്യമമായ ബിസിനസ് സ്റ്റാന്‍ഡേര്‍ഡിനോട് പറഞ്ഞു.
കൊവിഡ്-19 പകര്‍ച്ചവ്യാധി മൂലമുണ്ടായ ഉയര്‍ന്ന അനിശ്ചിതത്വത്തിന്റെ പശ്ചാത്തലത്തില്‍ കറന്‍സിയുടെ ആവശ്യം വര്‍ദ്ധിക്കാന്‍ തുടങ്ങിയതായും 2020 ഓഗസ്റ്റില്‍ പുറത്തിറക്കിയ 2019-20 ലെ വാര്‍ഷിക റിപ്പോര്‍ട്ടില്‍ റിസര്‍വ് ബാങ്ക് പരാമര്‍ശിച്ചിരുന്നു. മെച്ചപ്പെട്ട ആവശ്യം നിറവേറ്റുന്നതിനായി കേന്ദ്ര ബാങ്കും നിരവധി നടപടികള്‍ സ്വീകരിച്ചിരുന്നു.
2020 കലണ്ടര്‍ വര്‍ഷത്തില്‍ പ്രചാരത്തിലുളള കറന്‍സി 22.1 ശതമാനം അഥവാ 5,01,405 കോടി രൂപ ഉയര്‍ന്ന് 2021 ജനുവരി ഒന്നിന് 27,70,315 കോടി രൂപയായി ഉയര്‍ന്നു. പ്രചാരത്തിലുളള കറന്‍സിയില്‍ നോട്ടുകളും നാണയങ്ങളും ഉള്‍പ്പെടുന്നു. നിലവില്‍ 2 രൂപ, 5 രൂപ, 10 രൂപ, 20 രൂപ, 50 രൂപ, 100 രൂപ, 200 രൂപ, 500 രൂപ, 2,000 രൂപ എന്നിങ്ങനെ മൂല്യമുളള നോട്ടുകളാണ് പ്രചാരത്തിലുളളത്. പ്രചാരത്തിലുള്ള നാണയങ്ങളില്‍, 50 പൈസ, 1 രൂപ, 2 രൂപ, 5 രൂപ, 10 രൂപ, അടുത്തിടെ സമാരംഭിച്ച 20 രൂപ നാണയവും ഉള്‍പ്പെടുന്നു.
ആര്‍ബിഐയുടെ വാര്‍ഷിക റിപ്പോര്‍ട്ട് അനുസരിച്ച്, പ്രചാരത്തിലുള്ള നോട്ടുകളുടെ മൂല്യവും അളവും യഥാക്രമം 14.7 ശതമാനവും 6.6 ശതമാനവും വര്‍ദ്ധിച്ചു. മൂല്യത്തിന്റെ അടിസ്ഥാനത്തില്‍, 2020 മാര്‍ച്ച് അവസാനത്തോടെ പ്രചാരത്തിലുള്ള നോട്ടുകളുടെ മൊത്തം മൂല്യത്തിന്റെ 83.4 ശതമാനം 500 രൂപയും 2,000 രൂപ നോട്ടുകളും ചേര്‍ന്നതാണ്, 500 രൂപ നോട്ടുകളുടെ വിഹിതം കുത്തനെ വര്‍ദ്ധിച്ചു. 2020 മാര്‍ച്ച് അവസാനത്തോടെ പ്രചാരത്തിലുള്ള മൊത്തം നോട്ടുകളുടെ 43.4 ശതമാനം 10 രൂപയും 100 രൂപയും നോട്ടുകളാണെന്നും റിസര്‍വ് ബാങ്ക് വാര്‍ഷിക റിപ്പോര്‍ട്ടില്‍ പറയുന്നു.
