കേരളത്തില്‍ സ്വര്‍ണ വിലയില്‍ ഇന്ന് വര്‍ദ്ധനവ് രേഖപ്പെടുത്തി. പവന് 200 രൂപ വര്‍ദ്ധിച്ച് 36800 രൂപയ്ക്കാണ് ഇന്ന് വ്യാപാരം പുരോഗമിക്കുന്നത്. ഗ്രാമിന് 4600 രൂപയാണ് ഇന്നത്തെ വില. ഇന്നലെ പവന് 36600 രൂപയായിരുന്നു സ്വര്‍ണ വില. ജനുവരി മാസം രണ്ടാഴ്ച്ച പിന്നിട്ടപ്പോള്‍, ഇതുവരെയുള്ള ഈ മാസത്തെ ഏറ്റവും കുറഞ്ഞ വിലയാണ് ഇന്നലെ സ്വര്‍ണത്തിന് രേഖപ്പെടുത്തിയത്. ജനുവരിയിലെ ഏറ്റവും ഉയര്‍ന്ന സ്വര്‍ണ വില ജനുവരി 5, 6 തീയതികളില്‍ രേഖപ്പെടുത്തിയ 38400 രൂപയാണ്.
ഇന്ത്യന്‍ വിപണിയില്‍ രണ്ടാം ദിവസമാണ് സ്വര്‍ണ വില ഇടിയുന്നത്. എംസിഎക്‌സ് ഫ്യൂച്ചേഴ്‌സ് 0.25 ശതമാനം ഇടിഞ്ഞ് 10 ഗ്രാമിന് 49100 രൂപയിലെത്തി. കഴിഞ്ഞ സെഷനില്‍ സ്വര്‍ണ വില 0.3 ശതമാനം ഇടിഞ്ഞിരുന്നു. എംസിഎക്‌സിലെ സില്‍വര്‍ ഫ്യൂച്ചറുകളിലും ഇന്ന് ഇടിവ് രേഖപ്പെടുത്തി. സ്വര്‍ണ വില ഒരു കിലോയ്ക്ക് 1.6 ശതമാനം ഇടിഞ്ഞ് 65,609 രൂപയിലെത്തി.
യുഎസ് പ്രസിഡന്റ് ആയി തെരഞ്ഞെടുക്കപ്പെട്ട ജോ ബൈഡന്‍ 1.9 ട്രില്യണ്‍ ഡോളര്‍ ഉത്തേജക പാക്കേജ് നിര്‍ദ്ദേശം പ്രഖ്യാപിച്ചതോടെ അന്താരാഷ്ട്ര വിപണിയില്‍ സ്വര്‍ണ്ണ നിരക്ക് ഉയര്‍ന്നു. സ്പോട്ട് സ്വര്‍ണ വില 0.2 ശതമാനം ഉയര്‍ന്ന് 1,850.36 ഡോളറിലെത്തി. വിലയേറിയ മറ്റ് ലോഹങ്ങളില്‍ വെള്ളി വില ഔണ്‍സിന് 0.5 ശതമാനം ഉയര്‍ന്ന് 25.65 ഡോളറായി. പ്ലാറ്റിനം വില 1,116 ഡോളറായി കുറഞ്ഞു. വിവിധ രാജ്യങ്ങളില്‍ കൊറോണ വൈറസ് വ്യാപനം വര്‍ദ്ധിക്കുന്നത് അന്താരാഷ്ട്ര വിപണിയില്‍ സ്വര്‍ണ വില ഉയരാന്‍ കാരണമായിട്ടുണ്ട്.
