കേരളത്തില്‍ സ്വര്‍ണ വില കുത്തനെ ഇടിഞ്ഞു. ഒരു പവന് 480 രൂപ കുറഞ്ഞ് 36480 രൂപയ്ക്കാണ് ഇന്ന് വ്യാപാരം പുരോഗമിക്കുന്നത്. ഗ്രാമിന് 4560 രൂപയാണ് ഇന്നത്തെ നിരക്ക്. ഇന്നലെ പവന് 720 രൂപ കുറഞ്ഞ് 36960 രൂപയ്ക്കാണ് വ്യാപാരം നടന്നത്. ജൂലൈയ്ക്ക് ശേഷമുള്ള ഏറ്റവും കുറഞ്ഞ വിലയാണ് ഇന്ന് സ്വര്‍ണത്തിന് രേഖപ്പെടുത്തിയിരിക്കുന്നത്. കഴിഞ്ഞ രണ്ട് ദിവസത്തിനിടെ സ്വര്‍ണ വിലയില്‍ 1200 രൂപയുടെ കുറവാണ് ഉണ്ടായിരിക്കുന്നത്.
ഓഹരി വിപണികളിലെ ശക്തമായ കുതിപ്പിനെ തുടര്‍ന്ന് തുടര്‍ച്ചയായ മൂന്നാം ദിവസവും ഇന്ത്യന്‍ വിപണികളില്‍ സ്വര്‍ണത്തിന്റെയും വെള്ളിയുടെയും വില ഇടിഞ്ഞു. എംസിഎക്സില്‍ സ്വര്‍ണ്ണ ഫ്യൂച്ചറുകള്‍ 10 ഗ്രാമിന് 0.21 ശതമാനം ഇടിഞ്ഞ് 48,485 രൂപയിലെത്തി. വെള്ളി ഫ്യൂച്ചറുകള്‍ കിലോയ്ക്ക് 59,460 രൂപയായി കുറഞ്ഞു. കഴിഞ്ഞ രണ്ട് ദിവസങ്ങളെ അപേക്ഷിച്ച് ഇന്ത്യയില്‍ സ്വര്‍ണ്ണത്തിന്റെയും വെള്ളിയുടെയും വില കുത്തനെ ഇടിഞ്ഞു. കഴിഞ്ഞ സെഷനില്‍ സ്വര്‍ണ്ണ ഫ്യൂച്ചേഴ്‌സ് 900 രൂപ ഇടിഞ്ഞിരുന്നു. മുന്‍ സെഷനില്‍ വെള്ളി വില കിലോഗ്രാമിന് 800 രൂപ ഇടിഞ്ഞു.
ആഗോള വിപണികളില്‍, സ്വര്‍ണ്ണ നിരക്കുകളില്‍ ഇന്ന് കാര്യമായ മാറ്റമില്ല. നാല് മാസത്തെ ഏറ്റവും താഴ്ന്ന നിലയിലായിരുന്ന സ്പോട്ട് സ്വര്‍ണ വില ഇന്ന് ഔണ്‍സിന് 0.1 ശതമാനം ഉയര്‍ന്ന് 1,809.41 ഡോളറിലെത്തി. കഴിഞ്ഞ ദിവസം ഇത് 1,800.01 ഡോളറായി കുറഞ്ഞിരുന്നു. ജൂലൈ 17 ന് ശേഷമുള്ള ഏറ്റവും താഴ്ന്ന വിലയായിരുന്നു ഇത്.
ഡോളര്‍ സൂചിക ഇന്ന് 0.14% കുറഞ്ഞു. വിലയേറിയ മറ്റ് ലോഹങ്ങളില്‍ വെള്ളി വില ഔണ്‍സിന് 0.2 ശതമാനം ഉയര്‍ന്ന് 23.29 ഡോളറിലെത്തി. പ്ലാറ്റിനം വില 0.2 ശതമാനം ഇടിഞ്ഞ് 959.64 ഡോളറിലെത്തി. കൊവിഡ് -19 വാക്സിനെക്കുറിച്ചുള്ള നല്ല വാര്‍ത്തകളും യുഎസ് രാഷ്ട്രീയ അനിശ്ചിതത്വങ്ങളുമാണ് സ്വര്‍ണ്ണ വില ഇടിയാന്‍ കാരണം. ലോകത്തിലെ ഏറ്റവും വലിയ സ്വര്‍ണ്ണ പിന്തുണയുള്ള എക്സ്ചേഞ്ച്-ട്രേഡഡ് ഫണ്ടായ എസ്പിഡിആര്‍ ഗോള്‍ഡ് ട്രസ്റ്റിന്റെ ഓഹരികള്‍ ചൊവ്വാഴ്ച 1.1 ശതമാനം ഇടിഞ്ഞ് 1,199.74 ടണ്ണായി. തിങ്കളാഴ്ച ഇത് 1,213.17 ടണ്ണായിരുന്നു.
