പകര്‍ച്ചവ്യാധി മൂലമുണ്ടായ അനിശ്ചിതത്വം നിലനില്‍ക്കുന്നുണ്ടെങ്കിലും ഇന്ത്യന്‍ പ്രൊഫഷണലുകള്‍ക്ക് അടുത്ത വര്‍ഷം പ്രതീക്ഷ നല്‍കുന്നതാണ്. 2021 ല്‍ 40% ഇന്ത്യന്‍ പ്രൊഫഷണലുകള്‍ പുതിയ ജോലികളുടെ എണ്ണത്തില്‍ വര്‍ദ്ധനവ് പ്രതീക്ഷിക്കുന്നു. ഏപ്രിലില്‍ ഇത് 19% ആയിരുന്നു, 53% ആളുകള്‍ തങ്ങളുടെ കമ്പനികള്‍ അടുത്ത ആറുമാസത്തിനുള്ളില്‍ മികച്ച പ്രകടനം കാഴ്ചവയ്ക്കുമെന്ന് പ്രതീക്ഷിക്കുന്നു.
ഇന്ത്യയുടെ സമ്പദ്വ്യവസ്ഥ സാവധാനം തുറക്കുന്ന ഈ സമയത്തും നിയമന നിരക്ക് ക്രമാനുഗതമായി കൊവിഡിന് മുമ്പുള്ള നിലകളിലേക്ക് തിരിച്ചുവരികയാണ്. പ്രൊഫഷണല്‍ നെറ്റ്വര്‍ക്കിംഗ് പ്ലാറ്റ്‌ഫോമായ ലിങ്ക്ഡ്ഇന്‍ കണക്കുകള്‍ പ്രകാരം 2020 ഒക്ടോബറില്‍ നിയമന നിരക്ക് 46% വാര്‍ഷിക വളര്‍ച്ച നേടി.
2020 നവംബര്‍ വരെ, 78% തൊഴിലില്ലാത്ത പ്രൊഫഷണലുകള്‍ക്ക് സമ്മര്‍ദ്ദം അനുഭവപ്പെട്ടു. 32% ഇന്ത്യക്കാര്‍ മാത്രമാണ് അവരുടെ വരുമാനം വര്‍ദ്ധിക്കുന്നമെന്ന് പ്രതീക്ഷിക്കുന്നത്. ഇന്ത്യയിലെ 62% തൊഴിലന്വേഷകര്‍ ഈ വെല്ലുവിളി നിറഞ്ഞ സമയങ്ങളില്‍ പുതിയ തൊഴില്‍ മേഖലകളിലേയ്ക്ക് തിരിഞ്ഞതായും റിപ്പോര്‍ട്ട് ചെയ്തു.
ഓണ്‍ലൈന്‍ പഠനം 2021ലും വന്‍ വളര്‍ച്ച നേടുമെന്നാണ് പ്രതീക്ഷിക്കുന്നത്. ലിങ്ക്ഡ്ഇന്റെ വര്‍ഷാവസാന കണ്ടെത്തലുകള്‍ അനുസരിച്ച്, 57% പ്രൊഫഷണലുകള്‍ ഓണ്‍ലൈന്‍ പഠനത്തിനായി ചെലവഴിക്കുന്ന സമയം വര്‍ദ്ധിപ്പിക്കുമെന്ന് പറഞ്ഞു. ശരിയായ ഡിജിറ്റല്‍, സോഫ്റ്റ് സ്‌കില്‍സ് വികസിപ്പിക്കുന്നതിനും, അതേ കമ്പനിയില്‍ തന്നെ പുതിയ അവസരങ്ങള്‍ നേടുന്നതിനുമാണിത്.
ഡാറ്റാ അനലിസ്റ്റ്, ഡിജിറ്റല്‍ മാര്‍ക്കറ്റിംഗ് സ്‌പെഷ്യലിസ്റ്റ്, ഗ്രാഫിക് ഡിസൈനര്‍, സോഫ്‌റ്റ്വെയര്‍ ഡെവലപ്പര്‍ എന്നിവയാണ് ആഗോളതലത്തില്‍ ഡിമാന്‍ഡുള്ള ജോലികള്‍. അതിവേഗം വളരുന്ന കഴിവുകളില്‍ പൈത്തണ്‍, മെഷീന്‍ ലേണിംഗ്, ഡാറ്റാ സ്ട്രക്ചറുകള്‍, ഡിജിറ്റല്‍ മാര്‍ക്കറ്റിംഗ്, എച്ച്ടിഎംഎല്‍ എന്നിവ ഉള്‍പ്പെടുന്നു. 2020 വര്‍ഷം വിനാശകരമായ വര്‍ഷമായിരുന്നു, അപ്രതീക്ഷിത വെല്ലുവിളികളെ നേരിടാനും പുതിയ യാഥാര്‍ത്ഥ്യങ്ങള്‍ക്കായി തയ്യാറെടുക്കാനും 2021 സഹായിക്കുമെന്നും ലിങ്ക്ഡിന്‍ ഇന്ത്യ കണ്‍ട്രി മാനേജര്‍ അശുതോഷ് ഗുപ്ത പറഞ്ഞു.
