ന്യൂഡല്‍ഹി: രാജ്യത്തെ കൂടുതല്‍ വിമാനത്താവളങ്ങള്‍ സ്വകാര്യവത്ക്കരിക്കാന്‍ കേന്ദ്രസര്‍ക്കാര്‍ നീക്കം നടത്തുന്നതായി റിപ്പോര്‍ട്ട്. ഏകദേശം 25 ല്‍ കൂടുതല്‍ വിമാനത്താവളങ്ങള്‍ സ്വകാര്യവത്കരിക്കാന്‍ കേന്ദ്രസര്‍ക്കാര്‍ നീക്കം നടത്തുന്നുണ്ടെന്നാണ് വിവിധ ദേശീയ മാധ്യമങ്ങള്‍ ഇപ്പോള്‍ റിപ്പോര്‍ട്ട് ചെയ്തിട്ടുള്ളത്. ഇക്കാര്യത്തില്‍ കേന്ദ്രസര്‍ക്കാര്‍ ഉടന്‍ തീരുമാനം എടുക്കുമെന്ന് സ്റ്റാറ്റിയൂട്ടറി ബോഡി ചെയര്‍മാന്‍ ഗുരുപ്രസാദ് മോഹന്‍പത്ര വ്യക്തമാക്കുകയും ചെയ്തിട്ടുണ്ട്. ഒന്നുമുതല്‍ 1.5 മില്യണ്‍ യാത്രക്കാര്‍ ദിനപ്രതി എത്തുന്ന രാജ്യത്തെ 20 മുതല്‍ 25 വരെയുള്ള വിമാനത്താവളങ്ങളെയാണ് കേന്ദ്രസര്‍ക്കാര്‍ സ്വകാര്യവത്ക്കരിക്കാന്‍ നീക്കം നടത്തുന്നത്. രണ്ടാം മോദിസര്‍ക്കാറിന്റെ നൂറ് ദിന കര്‍മ്മപരിപാടിയുടെ ഭാഗമായാണ് രാജ്യത്തെ കൂടുതല്‍ വിമാനത്താവളങ്ങള്‍ സ്വകാര്യവത്കിരിക്കാനുള്ളങ്ങള്‍ നീക്കം നടത്തുന്നത്.വിമാനത്താവളങ്ങളില്‍ കൂടുതല്‍ സ്വകാര്യവത്ക്കരണം നടത്താനുള്ള കേന്ദ്രസര്‍ക്കാറിന്റെ നീക്കത്തിനെതിരെ ശക്തമായ വിമര്‍ശനമാണ് ഇപ്പോള്‍ വിവിധ ഭാഗത്ത് നിന്ന് ഉയര്‍ന്നുവരുന്നത്.
അതേസമയം തിരുവനന്തപുരം വിമാനത്താവളമടക്കം രാജ്യത്തെ ആറോളം വിമാനത്താവളങ്ങള്‍ സ്വകാര്യവത്കരിക്കാന്‍ കേന്ദ്രസര്‍ക്കാര്‍ നീക്കങ്ങള്‍ ആരംഭിച്ചിട്ടുണ്ട്. എന്നാല്‍ മൂന്ന് വിമാനത്താവളങ്ങളുടെ നടത്തിപ്പ് കേന്ദ്രസര്‍ക്കാര്‍ അദാനി ഗ്രൂപ്പിന് കൈമാറിയിട്ടുണ്ട്. കേന്ദ്ര മന്ത്രിസഭയുടെ അന്തിമ അനുമതിയും ലഭിച്ചിട്ടുണ്ട്. അഹമ്മദാബാദ്, ലക്നൗ, മംഗളൂരു എന്നീ എയര്‍പ്പോര്‍ട്ടുകളുടെ നടത്തിപ്പാണ് അദാനി ഗ്രൂപ്പിന് കൈമാറുന്നതിനുള്ള അന്തിമ അനുമതി കേന്ദ്ര മന്ത്രിസഭ നല്‍കിയത്. 50 വര്‍ഷത്തെ നടത്തിപ്പ് കരാറിനാണ് കേന്ദ്ര മന്ത്രിസഭ അനുമതി നല്‍കിയിട്ടുള്ളത്. അതേസമയം രാജ്യത്തെ എയര്‍പ്പോര്‍ട്ടുകളുടെ നടത്തിപ്പവകാശം സ്വകാര്യ കമ്പനിക്ക് കൈമാറുന്നതിനെതിരെ വലിയ വിമര്‍ശനമാണ് ഉയര്‍ന്നുവന്നിട്ടുള്ളത്. നേരത്തെ ആറ് എയര്‍പോര്‍ട്ടുകളുടെ നടത്തിപ്പവകാശമാണ് കേന്ദ്രസര്‍ക്കാര്‍ അദാനി എന്റര്‍പ്രൈസസിന് കൈമാറാന്‍ ആലോചിച്ചത്. എന്നാല്‍ വിവിധ ഭാഗത്ത് നിന്നുള്ള എതിര്‍പ്പുകള്‍ മൂലമാണ് മൂന്ന് എയര്‍പോര്‍ട്ടുകളുടെ നടത്തിപ്പ് അദാനി ഗ്രൂപ്പിന് കൈമാറാന്‍ കേന്ദ്രസര്‍ക്കാര്‍ പിന്നീട് തീരുമാനിച്ചിട്ടുള്ളത്.
സംസ്ഥാന സര്‍ക്കാറിന്റെ ശക്തമായ എതിര്‍പ്പിനെ തുടര്‍ന്ന് തിരുവനന്തപുരം വിമാനത്താവളം അദാനി ഗ്രൂപ്പിന് കൈമാറിക്കൊണ്ടുള്ള ഉത്തരവ് കേന്ദ്ര മന്ത്രിസഭ ഇതുവരെ പുറത്തിറക്കിയിട്ടില്ല. തിരുവനന്തപുരം വിമാനത്താവളം സ്വകാര്യ കമ്പനിക്ക് കൈമാറുന്നതിനെതിരെ മുഖ്യമന്ത്രി പിണറായി വിജയന്‍ കടുത്ത വിമര്‍ശനമാണ് കേന്ദ്രസര്‍ക്കാറിന് നേരെ ഉയര്‍ത്തിയത്. സംസ്ഥാനത്തിന്റെ അനുമതിയില്ലാതെ കേന്ദ്രസര്‍ക്കാറിന് തിരുവനന്തപുരം വിമാനത്താവളം സ്വകാര്യ കമ്പനിക്ക് കൈമാറാന്‍ സാധ്യമല്ലെന്നായിരുന്നു മുഖ്യമന്ത്രി പ്രതികരിച്ചത്.
എന്നാല്‍ തിരുവനന്തപുരം വിമാനത്താവളം അദാനി ഗ്രൂപ്പിന് കൈമാറുന്നത് സംബന്ധിച്ച് പുനരാലോചിക്കുമെന്ന് കേന്ദ്രസര്‍ക്കാര്‍ വ്യക്തമാക്കുകയും ചെയ്തിട്ടുണ്ട്. തിരുവനന്തപുരം വിമാനത്താവളം അടക്കം ആറ് വിമാനത്താവളങ്ങളുടെ നടത്തിപ്പവകാശമാണ് അദാനി ഗ്രൂപ്പ് ലേലത്തിലൂടെ സ്വന്തമാക്കിയത്. തിരുവനന്തപുരം വിമാനത്താവളം അദാനി ഗ്രൂപ്പിന് നല്‍കിയാല്‍ സംസ്ഥാനത്തിന്റെ സഹകരണം ഉണ്ടാകില്ലെന്ന മുഖ്യമന്ത്രിയുടെ വിമര്‍ശനം തന്നെയാണ് കേന്ദ്രസര്‍ക്കാറിനെ പുനരാലോചനയ്ക്ക് പ്രേരിപ്പിച്ചത്.
