ന്യൂഡല്ഹി: ഇന്ത്യന് സമ്പദ്വ്യവസ്ഥയുടെ വളര്ച്ചയില് 7.3% ഇടിവ്. ഈ മാര്ച്ചില് അവസാനിച്ച സാമ്പത്തിക വര്ഷത്തിലെ കണക്കാണിത്. 1979-80നുശേഷം കഴിഞ്ഞ 4 ദശകത്തിനുള്ളില് ആദ്യമായാണ് വര്ഷം മുഴുവന് ദീര്ഘിച്ച ഇടിവുണ്ടാകുന്നത്. അന്ന് ജിഡിപിയില് 5.2% ഇടിവാണുണ്ടായത്. കഴിഞ്ഞ സാമ്പത്തിക വര്ഷത്തിന്റെ ആദ്യത്തെ 2 പാദങ്ങളില് കോവിഡ് മഹാമാരിയുടെ പിടിയിലായിരുന്നു സമ്പദ്വ്യവസ്ഥ.
പിന്നീട് മൊത്ത ആഭ്യന്തര ഉല്പാദനം (ജിഡിപി) മൂന്നാം പാദത്തില് 0.5 ശതമാനവും അവസാന പാദത്തില് 1.6 ശതമാനവും ഉയര്ന്നു. മുന്വര്ഷം അവസാനപാദത്തില് ഇത് 3% ആയിരുന്നു. മഹാമാരി പിടിമുറുക്കും മുന്പു തന്നെ മാന്ദ്യത്തിലായിരുന്ന സമ്പദ്വ്യവസ്ഥ, ലോക്ഡൗണ് കൂടിയായതോടെ കൂടുതല് തകര്ച്ചയിലേക്കു വീണു. 202021ല് 135 ലക്ഷം കോടി രൂപയായിരുന്ന ജിഡിപി, മുന്വര്ഷം 145 ലക്ഷം കോടിയായിരുന്നു. മുന്വര്ഷത്തെ സ്ഥിതിയിലേക്കു വരണമെങ്കില് 202122ല് 10 ശതമാനത്തിലേറെ വളര്ച്ച നേടേണ്ടതുണ്ട്.
എന്നാല് കോവിഡിന്റെ രണ്ടാം തരംഗം സാമ്പത്തിക പ്രവര്ത്തനങ്ങളുടെ വേഗം തടഞ്ഞതിനാല് ഇനി ആ ലക്ഷ്യം നേടാനാവുമെന്നു കരുതുന്നില്ല. തൊഴിലില്ലായ്മ 14.73% ആയി ഉയരുകയും ഉപഭോക്തൃ ഡിമാന്ഡ് കുറയുകയും ചെയ്തതാണ് പുതിയ വെല്ലുവിളി. വാക്സിനേഷന് തീവ്രഗതിയില് ആകാത്തതും പ്രശ്നം. നാഷനല് സ്റ്റാറ്റിസ്റ്റിക്കല് ഓഫിസാണ് പുതിയ കണക്കുകള് ഇന്നലെ പുറത്തുവിട്ടത്. കോവിഡ് രണ്ടാം തരംഗം അത്ര വലിയ പ്രശ്നമായി വരില്ലെന്നും എന്നാല് രണ്ടക്ക വളര്ച്ച നേടുക ബുദ്ധിമുട്ടാകും എന്നുമാണ് മുഖ്യ സാമ്പത്തിക ഉപദേഷ്ടാവ് കെ. വി. സുബ്രഹ്മണ്യത്തിന്റെ വിലയിരുത്തല്.
