മാര്‍ച്ചിലെ ജിഎസ്ടി വരുമാനം എക്കാലത്തെയും ഉയര്‍ന്ന നിലവാരമായ 1.23 ലക്ഷം കോടി രൂപയിലെത്തി. കഴിഞ്ഞ വര്‍ഷം ഇതേ മാസത്തെ വരുമാനമായി താരതമ്യം ചെയ്യുമ്പോള്‍ 27 ശതമാനമാണ് വര്‍ധന. ജിഎസ്ടി നടപ്പാക്കിയതിനുശേഷം ഇത്രയും വരുമാനം ലഭിക്കുന്നത് ഇതാദ്യമായാണ്. കഴിഞ്ഞ ആറുമാസമായി ജിഎസ്ടി വരുമാനം ഒരു ലക്ഷം കോടി രൂപയ്ക്കുമുകളിലാണ്.
കോവിഡിന്റെ സാമ്പത്തികാഘാതത്തില്‍നിന്നുള്ള തിരിച്ചുവരവിന്റെ ലക്ഷണമാണിതെന്നാണ് സര്‍ക്കാരിന്റെ വിലയിരുത്തല്‍. കേന്ദ്ര ജിഎസ്ടി വഴി 22,973 കോടി രൂപയും സംസ്ഥാന ജിഎസ്ടിവഴി 29,329 കോടി രൂപയും സംയോജിത ജിഎസ്ടി(ഐജിഎസ്ടി)വഴി 62,842 കോടി രൂപയും സെസുവഴി 8,757 കോടി രൂപയുമാണ് സമാഹരിച്ചത്. സാമ്പത്തിക വര്‍ഷത്തിന്റെ ആദ്യപാദത്തില്‍ (-)41ശതമാനവും രണ്ടാം പാദത്തില്‍ (-)8 ശതമാനവും മൂന്നാം പാദത്തില്‍ 8 ശതമാനവും നാലാം പാദത്തില്‍ 14 ശതമാനവുമാണ് ജിഎസ്ടി വരുമാനത്തിലെ വളര്‍ച്ച.
