ന്യൂഡല്‍ഹി: ജിഎസ്ടിയില്‍ നിന്ന് ഒഴിവാക്കേണ്ട ഇനങ്ങള്‍, നികുതിവെട്ടിപ്പ് സാധ്യതയുള്ള മേഖലകള്‍ എന്നിവ നിര്‍ണയിക്കാനും നികുതി സ്ലാബ് പുനഃപരിശോധിക്കാനും മന്ത്രിതല സമിതി രൂപവത്കരിച്ച് കേന്ദ്രം. കര്‍ണാടക മുഖ്യമന്ത്രി ബസവരാജ് ബൊമ്മൈയുടെ അധ്യക്ഷതയില്‍ ധനമന്ത്രാലയം രൂപവത്കരിച്ച സംസ്ഥാന ധനമന്ത്രിമാരുടെ ഏഴംഗ സമിതിയില്‍ കേരളത്തില്‍ നിന്ന് കെ എന്‍ ബാലഗോപാലും അംഗമാണ്. നികുതിരഹിത ഇനങ്ങളില്‍ ചിലതിന് നികുതി ഏര്‍പ്പെടുത്തിയേക്കും.
ധാന്യങ്ങള്‍, കാര്‍ഷിക ഉപകരണങ്ങള്‍, അച്ചടിച്ച പുസ്തകങ്ങള്‍, വെറ്റില തുടങ്ങിയവ ഇപ്പോള്‍ നികുതി രഹിത ഇനങ്ങളുടെ പട്ടികയിലാണ്. ഇതിനു പുറമെ നികുതിദായകര്‍ക്ക് ലഭ്യമായ നികുതിയടവ് സംവിധാനങ്ങളിലെ പോരായ്മകള്‍ വിലയിരുത്താന്‍ എട്ടംഗ സമിതിയും രൂപവത്കരിച്ചു. കേന്ദ്ര, സംസ്ഥാന നികുതി ഉദ്യോഗസ്ഥര്‍ തമ്മിലെ മെച്ചപ്പെട്ട ഏകോപനത്തിനുള്ള വഴികളും നിര്‍ദേശിക്കും. മഹാരാഷ്ട്ര ഉപമുഖ്യമന്ത്രി അജിത് പവാര്‍ അധ്യക്ഷനായ സമിതിയില്‍ ഡല്‍ഹി ഉപമുഖ്യമന്ത്രി മനീഷ് സിസോദിയ, തമിഴ്‌നാട് ധനമന്ത്രി പളനിവേല്‍ ത്യാഗരാജന്‍ തുടങ്ങിയവരാണ് അംഗങ്ങള്‍.
നികുതി ഘടന ലളിതമാക്കാനുള്ള ശ്രമമാണ് ജിഎസ്ടിയുടെ നാലു വര്‍ഷം പിന്നിട്ടപ്പോള്‍ നടത്തുന്നത്.ചില സ്ലാബുകള്‍ ലയിപ്പിക്കാനും ചില ഉല്‍പന്ന, സേവനങ്ങള്‍ക്ക് പ്രത്യേക നിരക്ക് ഏര്‍പ്പെടുത്താനും ഉദ്ദേശ്യമുണ്ട്. ബിഹാര്‍ ഉപമുഖ്യമന്ത്രി തര്‍കിഷോര്‍ പ്രസാദ്, പശ്ചിമ ബംഗാള്‍ ധനമന്ത്രി അമിത് മിത്ര തുടങ്ങിയവരാണ് ആദ്യ സമിതിയിലെ മറ്റ് അംഗങ്ങള്‍. രണ്ടു മാസത്തിനകം റിപ്പോര്‍ട്ട് നല്‍കും.
അഞ്ച്, 12, 18, 28 എന്നിങ്ങനെയാണ് ജിഎസ്ടിയില്‍ നികുതി സ്ലാബുകള്‍. ആഡംബര, ദുര്‍ഗുണ ഉല്‍പന്നങ്ങള്‍ക്ക് ഏറ്റവും ഉയര്‍ന്ന സ്ലാബില്‍ നികുതി ഈടാക്കുന്നതിനു പുറമെ പ്രത്യേക സെസും ചുമത്തിയിട്ടുണ്ട്. 12, 18 സ്ലാബുകള്‍ ഒന്നിച്ചാക്കണമെന്ന ആവശ്യം മന്ത്രിതല സമിതി പരിശോധിക്കും. കഴിഞ്ഞ 17ന് നടന്ന ജിഎസ്ടി കൗണ്‍സിലിന്റെ തീരുമാന പ്രകാരമാണ് ഈ സമിതികള്‍.
