2021 സെപ്റ്റംബര്‍ 30 ന് അവസാനിച്ച രണ്ടാം പാദത്തില്‍ ഇരുചക്രവാഹന വിപണിയിലെ ലീഡര്‍ ഹീറോ മോട്ടോകോര്‍പ്പിന്റെ ഏകീകൃത അറ്റാദായം 22 ശതമാനം ഇടിഞ്ഞ് 747.79 കോടി രൂപയായി. കഴിഞ്ഞ സാമ്പത്തിക വര്‍ഷം ഇതേ കാലയളവില്‍ 963.82 കോടി രൂപ ഏകീകൃത അറ്റാദായം നേടിയ കമ്പനി, തങ്ങളുടെ ഇലക്ട്രിക് വാഹന പദ്ധതി പുരോഗമിച്ച ഘട്ടത്തിലാണെന്നും 2022 മാര്‍ച്ചോടെ ആദ്യ ഉല്‍പ്പന്നം പുറത്തിറക്കാന്‍ ഒരുങ്ങുകയാണെന്നും അറിയിച്ചു. പ്രവര്‍ത്തനങ്ങളില്‍ നിന്നുള്ള ഏകീകൃത വരുമാനം 8,538.85 രൂപയാണ്. മുന്‍വര്‍ഷത്തെ പാദത്തില്‍ ഇത് 9,473.32 കോടി രൂപയായിരുന്നുവെന്ന് ഹീറോ മോട്ടോകോര്‍പ്പ് റെഗുലേറ്ററി ഫയലിംഗില്‍ അറിയിച്ചു.
22 സാമ്പത്തിക വര്‍ഷത്തിലെ രണ്ടാം പാദത്തില്‍ 14.38 ലക്ഷം മോട്ടോര്‍സൈക്കിളുകളും സ്‌കൂട്ടറുകളും കമ്പനി വിറ്റഴിച്ചു. കഴിഞ്ഞ സാമ്പത്തിക വര്‍ഷം ഇതേ കാലയളവില്‍ വിറ്റ 18.22 ലക്ഷം യൂണിറ്റില്‍ നിന്ന് 21 ശതമാനം ഇടിവ്. ഈ സാമ്പത്തിക വര്‍ഷം രണ്ടാം പാദത്തില്‍ മൊത്തം ചെലവ് 7,640.71 കോടി രൂപയായി. മുന്‍ വര്‍ഷം ഇതേ കാലയളവില്‍ ഇത് 8,359.23 കോടി രൂപയായിരുന്നു. ഉപഭോഗ സാമഗ്രികളുടെ വിലയും മുന്‍ വര്‍ഷം ഇതേ കാലയളവിലെ 6,692.38 കോടി രൂപയില്‍ നിന്ന് 6,091.07 കോടി രൂപയായി കുറഞ്ഞു.
