മുംബൈ: ജൂണ്‍ 30 ന് അവസാനിച്ച സാമ്പത്തിക വര്‍ഷത്തെ ആദ്യ പാദത്തില്‍ എഫ്എംസിജി രംഗത്തെ പ്രമുഖരായ ഹിന്ദുസ്ഥാന്‍ യൂണിലിവറിന്റെ അറ്റാദായം 5.7 ശതമാനം വര്‍ധിച്ച് 1,897 കോടി രൂപയായി. കഴിഞ്ഞ സാമ്പത്തിക വര്‍ഷം ഏപ്രില്‍ മുതല്‍ ജൂണ്‍ വരെ 1,795 കോടി രൂപയുടെ അറ്റാദായമാണ് കമ്പനി രേഖപ്പെടുത്തിയത്.
അവലോകന കാലയളവില്‍ വില്‍പന 3.65 ശതമാനം ഉയര്‍ന്ന് 10,570 കോടിയായി. മുന്‍വര്‍ഷം ഇതേ കാലയളവില്‍ ഇത് 10,197 കോടി രൂപയായിരുന്നു. ഹിന്ദുസ്ഥാന്‍ യൂണിലിവര്‍ ലിമിറ്റഡ് (എച്ച്യുഎല്‍) റെഗുലേറ്ററി ഫയലിംഗിലാണ് കണക്കുകള്‍ വിശദമാക്കിയത്.
''വിപണികളെയും അവയുടെ പ്രവര്‍ത്തനങ്ങളെയും തകര്‍ക്കുന്ന കൊവിഡ് -19 വെല്ലുവിളികളുടെ സാഹചര്യത്തില്‍, വിറ്റുവരവ് നാല് ശതമാനവും നികുതിക്ക് ശേഷമുള്ള ലാഭം ഏഴ് ശതമാനം വര്‍ദ്ധിച്ചതിലൂടെ എച്ച്യുഎല്‍ മികച്ച പ്രകടനം കാഴ്ചവച്ചതായി,'' കമ്പനി പ്രസ്താവനയില്‍ പറഞ്ഞു.
