ആമസോണ് ഇന്ത്യയില് രജിസ്റ്റര് ചെയ്ത വ്യക്തിഗത വില്പനക്കാര്ക്കും ചെറുകിട സ്ഥാപനങ്ങള്ക്കും തല്ക്ഷണ ഓവര് ഡ്രാഫ്റ്റ് സേവനം അവതരിപ്പിച്ച് ഐസിഐസിഐ ബാങ്ക്. 25 ലക്ഷം രൂപ വരെയാണ് ബാങ്ക് ഓവര് ഡ്രാഫ്റ്റ് ആയി അനുവദിക്കുക. പൂര്ണമായും ഓണ്ലൈന് ആയാകും ബാങ്കിന്റെ സേവനം.
ആമസോണില് രജിസ്റ്റര് ചെയ്തിട്ടുള്ള മറ്റ് ബാങ്കുകളിലെ ഉപഭോക്താക്കള്ക്ക് ഐസിഐസിഐ ബാങ്കില് കറന്റ അക്കൗണ്ട് തുറക്കുന്നതിലൂടെ ഒഡി ലഭിക്കും. ഓണ്ലൈന് ആയി അക്കൗണ്ട് തുറക്കാവുന്നതാണ്. ഐസിഐസിഐ സേവനം ആമസോണില് രജിസ്റ്റര് ചെയ്ത സംരംഭകര്ക്ക് പ്രവര്ത്തന മൂലധന ആവശ്യകതകള് നിറവേറ്റുന്നതിന് സഹായകരമാകും. അമസോണിന്റെ മുഖ്യ എതിരാളികളായ ഫ്ലിപ്കാര്ട്ട് തങ്ങളുടെ ഹോള്സെയില് ഉപഭോക്താക്കളായ ചെറുകിട കച്ചവടക്കാര്ക്ക് രണ്ട് മിനിട്ടുകൊണ്ട് വായ്പ ലഭ്യമാക്കുന്ന പദ്ധതി ഓഗസ്റ്റില് അവതരിപ്പിച്ചിരുന്നു.
വെബ്സൈറ്റില് രജിസ്റ്റര് ചെയ്തിട്ടുള്ള വില്പ്പനക്കാര്ക്കുള്ള ഓണ്ലൈന് പോര്ട്ടലായ ആമസോണ് സെല്ലര് സെന്ട്രലിന്റെ അക്കൗണ്ടില് ഐസിഐസി ബാങ്ക് ഓഫര് ഓപ്ഷന് കണ്ടെത്താനാകും. ഇതില് ക്ലിക്ക് ചെയ്താല് ബാങ്കിന്റെ ഇന്സ്റ്റ ഒടി പ്ലാറ്റ്ഫോമിലേക്ക് കയറാം. തുടര്ന്ന് വിശദംശങ്ങള് നല്കിയാല് ഒഡി ലഭിക്കും. ഐ സി ഐ സിയില് അക്കൗണ്ട് ഇല്ലാത്തവര്ക്ക് ഈ സമാന ഓപ്ഷന് ഉപയോഗിച്ച് അക്കൗണ്ട് ആരംഭിക്കാം.
