ന്യൂഡല്‍ഹി: ജൂണ്‍ 1 മുതല്‍ ഇന്ത്യന്‍ റെയില്‍വേ ട്രെയിന്‍ സര്‍വ്വീസുകള്‍ പുനരാരംഭിക്കാന്‍ തീരുമാനിച്ചതായി റെയില്‍വേ മന്ത്രാലയം അറിയിച്ചിരുന്നു. ഇതിനെ തുടര്‍ന്ന് എസി, നോണ്‍ എസി ട്രെയിനുകളുടെ ടിക്കറ്റ് ബുക്കിംഗും ആരംഭിച്ചു. ടിക്കറ്റുകള്‍ ഓണ്‍ലൈനായും റിസര്‍വേഷന്‍ കൗണ്ടറുകളിലൂടെയും കോമണ്‍ സര്‍വീസ് സെന്ററുകളിലൂടെയും ബുക്ക് ചെയ്യുകയും റദ്ദാക്കുകയും ചെയ്യാം.
ഇതില്‍ പോസ്റ്റോഫീസുകളും ടിക്കറ്റിംഗ് ഏജന്റുകളും ഉള്‍പ്പെടുന്നു. അതുകൊണ്ട് നിങ്ങളുടെ അടുത്തുള്ള പോസ്റ്റ് ഓഫീസിലെത്തിയും ഇനി ട്രെയിന്‍ ടിക്കറ്റുകള്‍ ബുക്ക് ചെയ്യാം. ഐആര്‍സിടിസി വെബ്സൈറ്റ് വഴിയോ മൊബൈല്‍ ആപ്പ് വഴിയോ മാത്രമേ ടിക്കറ്റ് ബുക്ക് ചെയ്യാവൂ എന്നാണ് റെയില്‍വേ മന്ത്രാലയം നേരത്തെ വ്യക്തമാക്കിയിരുന്നത്.
പ്രാദേശിക ആവശ്യങ്ങള്‍ക്കും വ്യവസ്ഥകള്‍ക്കും അനുസരിച്ച് റിസര്‍വേഷന്‍ കൌണ്ടറുകള്‍ തുറക്കുമെന്നാണ് റെയില്‍വേ അറിയിച്ചിരിക്കുന്നത്. റിസര്‍വേഷന്‍ കൗണ്ടറുകള്‍ ഇന്നലെ മുതല്‍ ഘട്ടം ഘട്ടമായി തുറക്കും. റെയില്‍വേ മന്ത്രി പീയൂഷ് ഗോയല്‍ ട്വിറ്ററിലൂടെയാണ് ഇക്കാര്യം അറിയിച്ചത്. നിലവിലുള്ള പ്രോട്ടോക്കോളുകള്‍ അനുസരിച്ച് പ്രാദേശിക സംസ്ഥാന സര്‍ക്കാരുകള്‍ കൈകാര്യം ചെയ്യുന്നത് ശ്രാമിക് സ്‌പെഷ്യല്‍ ട്രെയിനുകളുടെ സര്‍വ്വീസ് തുടരും.
ഈ ബുക്കിംഗ് സൗകര്യങ്ങള്‍ വീണ്ടും തുറക്കുന്നത് പാസഞ്ചര്‍ റെയില്‍വേ സര്‍വീസുകള്‍ പുനസ്ഥാപിക്കുന്നതിലെ ഒരു സുപ്രധാന ചുവടുവയ്പ്പാണ്. നിലവിലുള്ള മഹാമാരി കണക്കിലെടുത്ത് സോണല്‍ റെയില്‍വേ സാമൂഹിക അകലം പാലിക്കുകയും ശുചിത്വ പ്രോട്ടോക്കോളുകള്‍ പാലിക്കുകയും ചെയ്യണം.
രാജ്യവ്യാപകമായി ലോക്ക്ഡൗണ്‍ ഏര്‍പ്പെടുത്തിയതിനാല്‍ രാജ്യത്തുടനീളമുള്ള എല്ലാ പാസഞ്ചര്‍ ട്രെയിന്‍ സര്‍വീസുകളും താല്‍ക്കാലികമായി നിര്‍ത്തി വച്ചിരിക്കുകയാണ്. രണ്ട് മാസത്തെ ഇടവേളയ്ക്ക് ശേഷമാണ് ട്രെയിന്‍ സര്‍വ്വീസുകള്‍ ഭാഗികമായ രീതിയില്‍ പുനരാരംഭിക്കാന്‍ പദ്ധതിയിട്ടിരിക്കുന്നത്.
മെയ് 11 ന് 30 പ്രത്യേക എസി ട്രെയിനുകള്‍ ന്യൂഡല്‍ഹിയില്‍ നിന്ന് വിവിധ സംസ്ഥാനങ്ങളിലേയ്ക്ക് സര്‍വ്വീസ് നടത്തിയിരുന്നു. മെയ് ഒന്നിന് ശേഷം റെയില്‍വേ 21.5 ലക്ഷത്തിലധികം കുടിയേറ്റ തൊഴിലാളികളെ സ്വന്തം സംസ്ഥാനങ്ങളിലേക്ക് ശ്രമിക് സ്‌പെഷ്യല്‍ ട്രെയിനുകളിലൂടെ എത്തിച്ചിട്ടുണ്ട്. വിവിധ നഗരങ്ങളിലും അവരുടെ ജോലിസ്ഥലങ്ങളിലും കുടുങ്ങിക്കിടക്കുന്ന കുടിയേറ്റക്കാര്‍ക്ക് കൂടുതല്‍ ആശ്വാസം പകരുന്നതിനായി ശ്രാമിക് ട്രെയിനുകളുടെ എണ്ണം ഇരട്ടിയാക്കാനും ഇന്ത്യന്‍ റെയില്‍വേ പദ്ധതിയിടുന്നുണ്ട്.
