രാജ്യത്തെ അണ്‍ലോക്ക് നടപടിക്രമങ്ങള്‍ സാമ്പത്തിക പ്രവര്‍ത്തനങ്ങളെയും വ്യക്തികളുടെ യാത്രകളെയും പിന്തുണച്ചതിനാല്‍ സെപ്റ്റംബറില്‍ ഇന്ത്യയുടെ ഇന്ധന ആവശ്യകത ഉയര്‍ന്നു. എന്നാല്‍, ഉപഭോഗം മുന്‍ വര്‍ഷത്തേക്കാള്‍ ഇപ്പോഴും ദുര്‍ബലമായി തുടരുകയാണെന്ന് സര്‍ക്കാര്‍ കണക്കുകള്‍ വ്യക്തമാക്കുന്നു. പെട്രോളിയം ഇന്ധനങ്ങളുടെ ഉപഭോഗം സെപ്റ്റംബറില്‍ 7.2 ശതമാനം ഉയര്‍ന്ന് 15.47 ദശലക്ഷം ടണ്ണായി മാറി. ജൂണിന് ശേഷം ആദ്യമായാണ് ഇന്ധന ആവശ്യകതയില്‍ ഇത്രമാത്രം വര്‍ധന രേഖപ്പെടുത്തുന്നത്. ജൂണില്‍ പ്രതിമാസ വര്‍ധന 16.09 ദശലക്ഷം ടണ്ണായിരുന്നു.
എന്നാല്‍, ഒരു വര്‍ഷം മുമ്പത്തെ സമാന കാലയളവില്‍ നിന്ന് ഡിമാന്‍ഡ് 4.4 ശതമാനം ഇടിഞ്ഞു, തുടര്‍ച്ചയായ ഏഴാം തവണയാണ് വാര്‍ഷിക അടിസ്ഥാനത്തില്‍ ഇടിവ് രേഖപ്പെടുത്തുന്നത്. പെട്രോളിയം പ്രകൃതി വാതക മന്ത്രാലയത്തിന്റെ കീഴിലുളള പെട്രോളിയം പ്ലാനിംഗ് ആന്‍ഡ് അനാലിസിസ് സെല്ലാണ് (പിപിഎസി) വിവരങ്ങള്‍ പുറത്തുവിട്ടത്.
ഡീസലിന്റെ വില്‍പ്പനയില്‍ ആറ് ശതമാനം ഇടിവ്. രാജ്യത്തെ കൊവിഡ് -19 അണുബാധ വര്‍ദ്ധിക്കുകയാണ്. സ്വകാര്യ മേഖലയില്‍ പിരിച്ചുവിടലുകളും വര്‍ധിക്കുകയാണ്. ഇത് ഇന്ധന ഉപഭോഗത്തെ പ്രതികൂലമായി ബാധിച്ചേക്കും. ഓഗസ്റ്റിലെ ഇന്ധന ആവശ്യകത ഏപ്രില്‍ മുതലുള്ള മാസങ്ങളിലെ കണക്കുകള്‍ പ്രകാരം, ഏറ്റവും ദുര്‍ബലമായിരുന്നു. നിയന്ത്രണങ്ങള്‍ കാരണം സാമ്പത്തിക പ്രവര്‍ത്തനങ്ങളും ഗതാഗതവും തടസ്സപ്പെട്ടതാണ് ആവശ്യകതയില്‍ തുടര്‍ച്ചയായ ഇടിവ് റിപ്പോര്‍ട്ട് ചെയ്യാന്‍ കാരണം.
സാമ്പത്തിക വളര്‍ച്ചയുമായി ബന്ധപ്പെട്ട പ്രധാന പാരാമീറ്ററാണ് ഡീസല്‍ ഉപഭോഗം, ഇന്ത്യയിലെ മൊത്തത്തിലുള്ള ശുദ്ധീകരിച്ച ഇന്ധന വില്‍പ്പനയുടെ 40 ശതമാനം വരും ഇത്. കഴിഞ്ഞ മാസം ഡീസല്‍ ഉപഭോ?ഗം 13.2 ശതമാനം ഉയര്‍ന്ന് 5.49 ദശലക്ഷം ടണ്ണായി. ഓഗസ്റ്റില്‍ ഇത് 4.85 ദശലക്ഷം ടണ്ണായിരുന്നു.
എന്നാല്‍, വാര്‍ഷിക അടിസ്ഥാനത്തില്‍ ഡീസലിന്റെ ആവശ്യകത ആറ് ശതമാനം കുറഞ്ഞു. ഗ്യാസോലിന്‍ അഥവാ പെട്രോളിന്റെ വില്‍പ്പന കഴിഞ്ഞ വര്‍ഷത്തെ അപേക്ഷിച്ച് 3.3 ശതമാനം ഉയര്‍ന്ന് 2.45 ദശലക്ഷം ടണ്ണായി. ഓഗസ്റ്റിലെ 2.38 ദശലക്ഷം ടണ്ണില്‍ നിന്ന് 2.9 ശതമാനം വര്‍ധന. പാചക വാതകം അല്ലെങ്കില്‍ ദ്രവീകൃത പെട്രോളിയം ഗ്യാസ് (എല്‍പിജി) വില്‍പ്പന 4.8 ശതമാനം ഉയര്‍ന്ന് 2.27 ദശലക്ഷം ടണ്ണായി. നാഫ്ത വില്‍പ്പന 2.9 ശതമാനം ഉയര്‍ന്ന് 1.14 ദശലക്ഷം ടണ്ണായും മാറി. ഓഗസ്റ്റില്‍ നിന്ന് 5.7 ശതമാനമായാണ് വില്‍പ്പന വര്‍ധിച്ചത്. റോഡുകള്‍ നിര്‍മ്മിക്കാന്‍ ഉപയോഗിക്കുന്ന ബിറ്റുമെന്‍ വില്‍പ്പന കഴിഞ്ഞ വര്‍ഷത്തെ അപേക്ഷിച്ച് 38.3 ശതമാനം ഉയര്‍ന്നു. ഇന്ധന എണ്ണ 7.4 ശതമാനവും പ്രതിമാസം 4.1 ശതമാനവും കുറഞ്ഞു.
