200 മില്യണ്‍ ഡോളര്‍ സമാഹരിക്കാന്‍ ഒരുങ്ങി കല്യാണ്‍. പഴയ വായ്പകള്‍ തിരിച്ചടയ്ക്കുന്നതിനായി കല്യാണ്‍ ജ്വല്ലേഴ്‌സ് അനുബന്ധ സ്ഥാപനമായ കല്യാണ്‍ ജ്വല്ലേഴ്‌സ് എഫ്സെഡ്ഇ വഴി 200 മില്യണ്‍ ഡോളര്‍ സമാഹരിക്കും. യുഎസ് ഡോളറിലുള്ള സീനിയര്‍ ഫിക്സഡ്-റേറ്റ് നോട്ടുകള്‍ (ബോണ്ടുകള്‍) വഴിയാണ് കല്യാണ്‍ ജ്വല്ലേഴ്‌സ് എഫ്സെഡ്ഇ ഈ തുക സമാഹരിക്കുകയെന്ന്, ബിസിനസ് സ്റ്റാന്‍ഡേര്‍ഡ് റിപ്പോര്‍ട്ട് ചെയ്യുന്നു.
റേറ്റിംഗ് ഏജന്‍സിയായ സ്റ്റാന്‍ഡേര്‍ഡ് ആന്‍ഡ് പുവേഴ്‌സ് കല്യാണ്‍ ജ്വല്ലേഴ്‌സ് ഇന്ത്യയ്ക്കും, കല്യാണ്‍ ജ്വല്ലേഴ്‌സ് എഫ്സെഡ്ഇ ഇഷ്യൂ ചെയ്യുന്ന ഫിക്സഡ്-റേറ്റ് നോട്ടുകള്‍ക്കും ബി റേറ്റിംഗ് നല്‍കിയിട്ടുണ്ട്. ഫിക്സഡ്-റേറ്റ് നോട്ടുകളില്‍ നിന്നും ലഭിക്കുന്ന തുക പഴയ വായ്പകള്‍ തിരിച്ചടയ്ക്കുന്നതിനായും, ഇടപാട് ഫീസ് അടയ്ക്കുന്നതിനും, പൊതു കോര്‍പ്പറേറ്റ് ആവശ്യങ്ങള്‍ക്കായും ഉപയോഗിക്കും. ഈ നോട്ടുകള്‍ സിംഗപ്പൂര്‍ സ്റ്റോക്ക് എക്സ്ചേഞ്ചില്‍ ലിസ്റ്റ് ചെയ്യും.
