കൊച്ചി: ബേപ്പൂര്‍- അഴീക്കല്‍ തുറമുഖങ്ങളെ ബന്ധിപ്പിച്ചു കൊച്ചിയില്‍ നിന്നു തീരദേശ ചരക്കു കപ്പല്‍ സര്‍വീസ് ആരംഭിക്കുന്നത് ഈ ആഴ്ച അവസാനത്തേക്കു മാറ്റി. ഇന്ന് ആരംഭിക്കുമെന്നാണു നേരത്തെ അറിയിച്ചിരുന്നതെങ്കിലും സാങ്കേതിക കാരണങ്ങളാലാണു നീട്ടിവച്ചത്. റൗണ്ട് ദ് കോസ്റ്റ് ഷിപ്പിങ് കമ്പനിയുടെ 'എംവി ഹോപ് സെവന്‍' കപ്പലാണു സര്‍വീസ് നടത്തുക.
വിദേശത്തു നിന്നും വിവിധ ഇന്ത്യന്‍ തുറമുഖങ്ങളില്‍ നിന്നും കൊച്ചി തുറമുഖത്തെത്തുന്ന കണ്ടെയ്‌നറുകള്‍ കുറഞ്ഞ ചെലവില്‍ മലബാര്‍ ജില്ലകളിലെത്തിക്കാന്‍ സര്‍വീസ് സഹായിക്കുമെന്നാണു വിലയിരുത്തല്‍. റോഡ് മാര്‍ഗം ചരക്കു നീക്കുന്നതിനെക്കാള്‍ 30 % വരെ കടത്തു കൂലി കുറയുമെന്നാണു പ്രതീക്ഷ. തുടക്കത്തില്‍ ആഴ്ചയില്‍ രണ്ടു സര്‍വീസ് വീതം. പിന്നീട്, കൂടുതല്‍ കപ്പലുകളും സര്‍വീസുകളും ആരംഭിക്കാനും സാധ്യതയുണ്ട്.
