ന്യൂഡല്‍ഹി: രാജ്യത്തെ ഏറ്റവും വലിയ ഇന്‍ഷൂറന്‍സ് സ്ഥാപനമായ എല്‍ഐസിയുടെ ഓഹരി വില്‍പനക്കുള്ള നടപടികള്‍ക്ക് ജനുവരി അവസാനം തുടക്കം കുറിക്കുമെന്ന് സൂചന. ഇതിന്റെ ഭാഗമായി ഐപിഒയെ കുറിച്ചുള്ള വിവരങ്ങള്‍ ഉള്‍ക്കൊള്ളുന്ന ഡ്രാഫ്റ്റ് റെഡ് ഹിയറിങ് പ്രോസ്‌പെക്ട് എല്‍ഐസി പുറത്തിറക്കും.
നിലവില്‍ സാമ്പത്തിക വര്‍ഷത്തിന്റെ മൂന്നാംപാദ ലാഭഫലം പ്രഖ്യാപിക്കുന്നതിനുള്ള നടപടികള്‍ക്കൊപ്പം ഐപിഒക്ക് വേണ്ടിയുള്ള പ്രവര്‍ത്തനങ്ങളും എല്‍ഐസിയില്‍ ത്വരിതഗതിയില്‍ മുന്നോട്ട് പോകുന്നുണ്ടെന്നാണ് റിപ്പോര്‍ട്ടുകള്‍. ജനുവരിയില്‍ നടപടികള്‍ക്ക് തുടക്കം കുറിച്ച് ഈ സാമ്പത്തിക വര്‍ഷം അവസാനിക്കുന്നതിന് മുമ്പ് ഐപിഒ പൂര്‍ത്തിയാക്കാനാണ് എല്‍ഐസി ലക്ഷ്യമിടുന്നത്.
ധനമന്ത്രി നിര്‍മ്മല സീതാരാമന്‍ ഫെബ്രുവരി ഒന്നിന് അവതരിപ്പിക്കുന്ന ബജറ്റില്‍ ഇതുസംബന്ധിച്ച കൂടുതല്‍ പ്രഖ്യാപനങ്ങളുണ്ടാവുമെന്നും റിപ്പോര്‍ട്ടുകളുണ്ട്. ഓഹരി വില്‍പനയിലൂടെ 15 ലക്ഷ്യം കോടി സ്വരൂപിക്കാനാണ് എല്‍ഐസി ലക്ഷ്യമിടുന്നത്. ഓഹരികളില്‍ 20 ശതമാനം വിദേശ നിക്ഷേപകര്‍ക്കായിരിക്കും. നേരത്തെ പോളിസി ഉടമകളോട് ഓഹരി വില്‍പനയുടെ ഭാഗമാവാന്‍ എല്‍ഐസി അഭ്യര്‍ഥിച്ചിരുന്നു. ഇതിന്റെ ഭാഗമായി പോളിസി ഉടമകളുടെ പാന്‍കാര്‍ഡ് വിവരങ്ങളും എല്‍ഐസി തേടിയിരുന്നു.
