മുംബൈ: ജെറ്റ് എയര്‍വേസിന് പിറകേ പാപ്പരത്ത നടപടി നേരിട്ട് എയര്‍ കോസ്റ്റയും. ദേശീയ കമ്പനി നിയമട്രിബ്യൂണലിന്റെ അമരാവതി ബെഞ്ചാണ് കേസ് പരിഗണിക്കുന്നത്. ഇന്‍സോള്‍വന്‍സി ആന്റ് ബാങ്ക് റപ്റ്റ്‌സി കോഡ് പ്രകാരം കോടതിയുടെ നിരീക്ഷണത്തില്‍ കടബാധ്യതകള്‍ പുന:ക്രമീകരിക്കാനാണ് നടപടി. വിജയവാഡ ആസ്ഥാനമായുല്‌ള ലിംകമനേനി കുടുംബത്തിന്റെ ഉടസ്ഥതയിലുള്ള എല്‍ഇപിഎല്‍ പ്രൊജക്ടിന്റേതാണ് എയര്‍കോസ്റ്റ.
2017 ജൂണ്‍ മാസം എയര്‍കോസ്റ്റയുടെ ഫ്‌ളൈയിങ് ലൈസന്‍സ് ഡിജിസിഎ റദ്ദാക്കിയിരുന്നു. ഇതേതുടര്‍ന്ന് കമ്പനി പ്രവര്‍ത്തനം നിര്‍ത്തി. പിന്നീട് ജര്‍മ്മന്‍ വിമാന അറ്റക്കുറ്റപ്പണി കമ്പനിയായ എംടിയു മെന്റിനന്‍സ് ബര്‍ലിന്‍ നല്‍കിയ പരാതിയിലാണ് ഇപ്പോള്‍ നടപടി. വിമാന എഞ്ചിന്‍ പാട്ടത്തിന് എടുത്ത വകയില്‍ പണം നല്‍കിയില്ലെന്നാണ് പരാതി. അതേസമയം ജര്‍മന്‍ കമ്പനി മോശം എഞ്ചിന്‍ നല്‍കിയതിനെ തുടര്‍ന്ന് കമ്പനിക്ക് വലിയ സാമ്പത്തിക നഷ്ടമുണ്ടായെന്ന് എയര്‍ കോസ്റ്റ പ്രമോട്ടര്‍ രമേഷ് ലിംകമനേനി ആരോപിച്ചു.
