കൊച്ചി: സംസ്ഥാനത്ത് മദ്യ വില്‍പ്പനയ്ക്കുള്ള ആപ്ലിക്കേഷന്‍ തയ്യാറാക്കുന്ന ജോലികള്‍ അന്തിമ ഘട്ടത്തില്‍. കൊച്ചിയിലെ സ്റ്റാര്‍ട്ട് അപ് കമ്പനി വികസിപ്പിച്ച ആപ്പിന് ഗൂഗിള്‍ അപ് സ്റ്റോറിന്റെ അനുമതി ലഭിച്ചാല്‍ ഉടന്‍ പരീക്ഷണ അടിസ്ഥാനത്തില്‍ ആപ്പിന്റെ പ്രവര്‍ത്തനം തുടങ്ങും. സ്മാര്‍ട്ട് ഫോണിലും, സാധാരണ മൊബൈല്‍ ഫോണിലും രണ്ട് തരം സംവിധാനമാണ് ഓണ്‍ലൈന്‍ മദ്യ വിതരണത്തിന് ഒരുക്കുന്നത്.
കൊച്ചി കടവന്ത്രയിലെ ഫെയര്‍ കോഡ് ടെക്‌നോളജീസ് വികസിപ്പിച്ച മൊബൈല്‍ ആപ്പ് വഴിയാണ് ഓണ്‍ലൈന്‍ മദ്യ വിതരണം ആലോചിക്കുന്നത്. സംസ്ഥാനത്തെ 301 ബിവറേജസ് ഔട്ട് ലെറ്റുകളുടേയും 500 ലേറെ ബാറുകളുടേയും 225 ബിയര്‍ പാര്‍ലറുകളുടെയും വിശദാംശങ്ങളാണ് ആപ്പില്‍ സജ്ജമാക്കുന്നത്.
സ്മാര്‍ട്ട് ഫോണ്‍ ഉപയോഗിക്കുന്നവര്‍ പ്ലേ സ്റ്റോര്‍ വഴി ആപ് ഡൗണ്‍ലോഡ് ചെയ്യണം. ആപിലേക്ക് പ്രവേശിച്ചാല്‍ ആദ്യം ജില്ല തെരഞ്ഞെടുക്കണം. തുടര്‍ന്ന് മദ്യം ബുക്ക് ചെയ്യുന്ന ആള്‍ക്ക് ഏത് സ്ഥലത്താണോ മദ്യം വാങ്ങാണ്ടത് ആ സ്ഥലത്തെ പിന്‍കോഡ് നല്‍കി കടകള്‍ തെരഞ്ഞെടുക്കാം. നല്‍കുന്ന പിന്‍കോഡിന്റെ പരിധിയില്‍ ഔട് ലെറ്റുകള്‍ ഇല്ലെങ്കില്‍ മറ്റൊരു പിന്‍കോഡ് നല്‍കി വീണ്ടും ബുക്ക് ചെയ്യണം.
ഓരോ ഔട് ലെറ്റുകള്‍ക്കും രാവിലെ മുതല്‍ ടൈം സ്ലോട്ടുകള്‍ ഉണ്ടാകും. മദ്യം വാങ്ങാന്‍ താല്‍പ്പര്യമുള്ള സമയം തെരഞ്ഞെടുത്താല്‍ ആ സമയത്ത് മദ്യം ലഭ്യമാകുന്ന ഔട് ലെറ്റുകള്‍, ബാറുകള്‍ എന്നിവയുടെ വിശദാംശം ലഭിക്കും. ഇതില്‍ ഒരു ഔട് ലെറ്റ് തെരഞ്ഞെടുത്താല്‍ ക്യു ആര്‍ കോഡ് അല്ലങ്കില്‍ ടോക്കണ്‍ നമ്പര്‍ ലഭിക്കും. അനുവദിച്ച സമയത്ത് ഔട് ലെറ്റില്‍ എത്താനായില്ലെങ്കില്‍ വീണ്ടും ബുക്ക് ചെയ്യേണ്ടിവരും.
21 വയസ്സിന് മുകളില്‍ പ്രായമുള്ളവര്‍ക്ക് മാത്രമാണ് ഓണ്‍ലൈന്‍ വഴി മദ്യം ബുക്ക് ചെയ്യാനാകുക. ഇനി സമാര്‍ട് ഫോണ്‍ ഇല്ലാത്തവര്‍ക്കായി ഒരു മൊബൈല്‍ നമ്പര്‍ നല്‍കുന്നതാണ് പരിഗണിക്കുന്നത്. പിന്‍കോഡ് അടക്കമുള്ള വിശദാംശങ്ങള്‍ ഈ നമ്പറിലേക്ക് എസ്എംഎസ് അയച്ചാല്‍ മദ്യം ലഭിക്കാനുള്ള ടോക്കണ്‍ നമ്പര്‍ എസ്എംഎസ് ആയി ലഭിക്കും. തലേ ദിവസം ബുക്ക് ചെയ്താല്‍ പിറ്റേ ദിവസം മദ്യം ലഭിക്കുന്ന രീതിയിലാണ് ആപ് ക്രമീകരിച്ചിട്ടുള്ളത്.
