ന്യൂഡല്‍ഹി: പിരാമല്‍ ഫാര്‍മ കമ്പനി ഹെമ്മോ ഫാര്‍മസ്യൂട്ടിക്കല്‍സിന്റെ 100 ശതമാനം ഓഹരികളും വാങ്ങുന്നു. 775 കോടി രൂപയുടേതാണ് ഇടപാട്. റെഗുലേറ്ററി ഫയലിങില്‍ പിരാമല്‍ ഫാര്‍മ കമ്പനിയാണ് ഇക്കാര്യം വെളിപ്പെടുത്തിയത്. ഇതോടെ പിരാമല്‍ ഫാര്‍മ കമ്പനിക്ക് പൂര്‍ണ ഉടമസ്ഥതയുള്ള സഹോദര സ്ഥാപനമായി ഹെമ്മോ ഫാര്‍മസ്യൂട്ടിക്കല്‍സ് മാറും.
ഈ സാമ്പത്തിക വര്‍ഷത്തില്‍ നടക്കുന്ന മൂന്നാമത്തെ പ്രധാന ഫാര്‍മ കമ്പനി ഏറ്റെടുക്കലാണിതെന്ന് പിരാമല്‍ ഫാര്‍മ ലിമിറ്റഡ് ചെയര്‍പേഴ്‌സണ്‍ നന്ദിനി പിരാമല്‍ പറഞ്ഞു.
ഇടപാടില്‍ വളരെയധികം സന്തോഷമുണ്ടെന്നാണ് ഹെമ്മോ പ്രൊമോട്ടറും മാനേജിങ് ഡയറക്ടറുമായ മധു ഉതംസിങിന്റെ പ്രതികരണം. ഹെമ്മോ ഫാര്‍മസ്യൂട്ടിക്കല്‍സിന്റെ പ്രവര്‍ത്തനങ്ങള്‍ പുതിയ തലത്തിലേക്ക് ഉയര്‍ത്താന്‍ സഹായകരമാകുന്നതാണ് പിരാമല്‍ ഗ്രൂപ്പിന്റെ ഏറ്റെടുക്കല്‍ നടപടിയെന്നും അദ്ദേഹം പറഞ്ഞു.
