ന്യൂഡല്ഹി: റെയില്വെയില് കൂടുതല് വിപുലീകരണവും സേവനങ്ങളും നടപ്പിലാക്കാനുള്ള തയ്യാറെടുപ്പിലാണ് കേന്ദ്രസര്ക്കാര്. ഇതിന്റെ ഭാഗമായി ട്രെയിനുകള്ക്കുള്ളില് വൈഫൈ ലഭ്യമാക്കുന്നതിനു നടപടികള് ആരംഭിച്ചതായി റെയില്വേ മന്ത്രി പിയൂഷ് ഗോയല് വ്യക്തമാക്കി. നാല് വര്ത്തിനകം പദ്ധതി നടപ്പാക്കുമെന്ന് സ്വീഡനില് വെച്ച് പിയൂഷ് ഗോയല് പറഞ്ഞു. റെയില്വേ സ്റ്റേഷനുകളില് വൈഫൈ ലഭ്യമാക്കുന്നതിനുള്ള നടപടികളില് ഗണ്യമായ പുരോഗതിയുണ്ടാക്കാന് ആയിട്ടുണ്ട്.
രാജ്യത്തെ 5150 റെയില്വേ സ്റ്റേഷനുകളില് ഇപ്പോള് വൈഫൈ സൗകര്യം ഉണ്ടെന്ന് ഗോയല് ചൂണ്ടിക്കാട്ടി. അടുത്ത വര്ഷം അവസാനത്തോടെ രാജ്യത്ത് ആകെയുള്ള 6500 സ്റ്റേഷനുകളിലും വൈഫൈ എത്തിക്കും. ട്രെയിനുകള്ക്കുള്ളില് വൈഫൈ ലഭ്യമാക്കുന്നത് സങ്കീര്ണമായ പ്രവര്ത്തിയാണ്. അതുകൊണ്ട് തന്നെ ഇത് പൂര്ണമായി നടപ്പിലാക്കാന് കുറഞ്ഞത് നാല് വര്ഷമെങ്കിലും വേണം.
പുത്തന് സാങ്കേതിക വിദ്യയിലുപരി കൂടുതല് നിക്ഷേപവും ഇതിനായി ആവശ്യമുണ്ട്. ടവറുകള് സ്ഥാപിക്കുകയും ട്രെയിനുകള്ക്കുള്ളില് ഉപകരണങ്ങള് ഘടിപ്പിക്കുകയും ചെയ്യേണ്ടതുണ്ട്. ഇതിനായി വിദേശ സാങ്കേതിക വിദ്യ ലഭ്യമാക്കണമെന്ന് ഗോയല് പറഞ്ഞു. ട്രെയിനുകളില് വൈഫൈ എത്തുന്നതോടെ സുരക്ഷയില് വന് കുതിച്ചു ചാട്ടമുണ്ടാക്കാനാകുമെന്നും കൂട്ടിച്ചേര്ത്തു. കംപാര്ട്ട്മെന്റുകളില് സിസിടിവി സ്ഥാപിക്കാനും അതിന്റെ ദൃശ്യങ്ങള് അപ്പോള് തന്നെ പൊലീസ് സ്റ്റേഷനുകളുമായി ബന്ധിപ്പിക്കാനുമാവും. ഇത് റെയില്വേ രംഗത്ത് പുത്തന് വിപ്ലവം കൊണ്ട് വരും.
