ഓഫര്‍ ഫോര്‍ സെയില്‍ വഴി 15 ശതമാനം ഓഹരി വില്‍ക്കാന്‍ സര്‍ക്കാര്‍ തീരുമാനിച്ചതിനെതുടര്‍ന്ന് ആര്‍വിഎന്‍എലിന്റെ ഓഹരിവില 9.5 ശതമാനത്തോളം താഴ്ന്നു. ഓഹരിയൊന്നിന് 27.50 രൂപ നിരക്കിലാണ് 15 ശതമാനം ഓഹരി വിറ്റഴിക്കുന്നത്. ഉച്ചയ്ക്ക് 1.25ന് 27.70 രൂപ നിരക്കിലാണ് ഓഹരിയുടെ വ്യാപാരം നടന്നത്.
മുന്‍ദിവസത്തെ ക്ലോസിങ് നിരക്കിനേക്കാള്‍ 9 ശതമാനത്തിലേറെ നഷ്ടത്തിലാണ് ഓഹരി വില ഇപ്പോള്‍. 15 ശതമാനം ഓഹരി വിറ്റഴിച്ച് 750 കോടി രൂപ സമാഹരിക്കുകയാണ് ലക്ഷ്യം. നോണ്‍ റീട്ടെയില്‍ നിക്ഷേപകര്‍ക്ക് ബുധനാഴ്ചയും റീട്ടെയില്‍ നിക്ഷേപകര്‍ക്ക് വ്യാഴാഴ്ചയുമാണ് ഒഫര്‍ ഫോര്‍ സെയിലിന് അപേക്ഷിക്കാന്‍ കഴിയുക.
2003ലാണ് റെയില്‍വെ മന്ത്രാലയത്തിനുകീഴില്‍ പൊതുമേഖല സ്ഥാപനമായി റെയില്‍ വികാസ് നിഗം സ്ഥാപിച്ചത്. 2020 ഡിസംബര്‍ 31ലെ കണക്കുപ്രകാരം സര്‍ക്കാരിന് 87.84 ശതമാനം ഓഹരികളാണ് സ്വന്തമായുള്ളത്. കൂടുതല്‍ ഓഹരി വിറ്റഴിക്കുന്നതോടെ വിഹിതം 74.67 ശതമാനമായി കുറയും.
