കൊച്ചി: ഓണ്‍ലൈന്‍ വഴി പഴയ നാണയങ്ങളുടേയും നോട്ടുകളുടേയും വില്‍പ്പനയുടെ മറവില്‍ നടക്കുന്ന തട്ടിപ്പുകള്‍ക്കെതിരേ മുന്നറിയിപ്പു നല്‍കി റിസര്‍വ് ബാങ്ക്. ഇത്തരം തട്ടിപ്പുകാര്‍ ആര്‍ബിഐയുടെ പേരിലും ലോഗോയിലും ഇടപാടുകള്‍ നടത്തുന്നത് ശ്രദ്ധയില്‍പ്പെട്ടതിനെ തുടര്‍ന്നാണു മുന്നറിയിപ്പ്. നോട്ടുകളുടേയും നാണയങ്ങളുടേയും കൈമാറ്റത്തിനു കമ്മീഷന്‍, നികുതി എന്നിവ ആവശ്യമാണെന്ന തരത്തിലാണ് തട്ടിപ്പുകള്‍ പ്രത്യക്ഷപ്പെടുന്നത്.
പഴയ നാണയങ്ങളുടേയും നോട്ടുകളുടേയും കൈമാറ്റത്തിനു ആര്‍.ബി.ഐ. ഒരു ഏജന്‍സിയേയോ സ്ഥാപനത്തേയോ ചുമതലപ്പെടുത്തിയിട്ടില്ലെന്നു വ്യക്തമാക്കി. ഇത്തരം തട്ടിപ്പുകള്‍ക്കെതിരേ ആളുകള്‍ ജാഗ്രത പുലര്‍ത്തണമെന്നും ആര്‍.ബി.ഐയുടെ മുന്നറിയിപ്പുണ്ട്. പഴയ നാണയങ്ങള്‍ക്കു കോടികണക്കിനു രൂപ ലഭിച്ചതായും വാഗ്ദാനം നല്‍കുന്നതായും ധാരളം വാര്‍ത്തകള്‍ അടുത്തിടെയായി സാമൂഹിക മാധ്യമങ്ങളില്‍ പ്രചരിക്കുന്നുണ്ട്.
അതേസമയം പഴയ നാണയങ്ങളുടേയും നോട്ടുകളുടേയും വില്‍പ്പന സാധ്യമാക്കുന്ന അംഗീകൃത ലേല കേന്ദ്രങ്ങള്‍ രാജ്യത്തിനകത്തും പുറത്തും പ്രവര്‍ത്തിക്കുന്നുണ്ട്. ഇത്തരം കേന്ദ്രങ്ങള്‍ വില്‍പ്പനക്കാരുടേയും വാങ്ങുന്നവരുടേയും വിവരങ്ങള്‍ ഉറപ്പുവരുത്തിയ ശേഷമാണ് ഇടപാടുകള്‍ നടത്തുന്നത്. ഇടപാടുകളുടെ മൂല്യം കണക്കാക്കിയാണ് ഇവരുടെ നിരക്ക് നിശ്ചയിക്കുന്നത്. നിലവില്‍ നടക്കുന്ന തട്ടിപ്പുകള്‍ ഇടപാടിനു മുമ്പു തന്നെ കമ്മീഷന്‍ ആവശ്യപ്പെടുന്ന തരത്തിലാണ്.
