ന്യൂഡല്‍ഹി: രാജ്യത്തെ ഏറ്റവും വലിയ പൊതുമേഖലാ ബാങ്കായ സ്റ്റേറ്റ് ബാങ്ക് ഓഫ് ഇന്ത്യക്ക് റിസര്‍വ് ബാങ്കിന്റെ പിഴ ശിക്ഷ. രണ്ട് കോടി രൂപയാണ് പിഴ ചുമത്തിയത്. ജീവനക്കാര്‍ക്ക് കമ്മീഷന്‍ ഇനത്തില്‍ പ്രതിഫലം നല്‍കാന്‍ വൈകിയെന്ന കാരണത്തിലാണ് ശിക്ഷ.
മാര്‍ച്ച് 15 നാണ് ഇതുമായി ബന്ധപ്പെട്ട ഉത്തരവ് പുറപ്പെടുവിച്ചത്. ബാങ്കിങ് റെഗുലേഷന്‍സ് ആക്ട് സെക്ഷന്‍ 10(1)(b)(ii) പ്രകാരമാണ് നടപടി. ജീവനക്കാര്‍ക്ക് കമ്മീഷന്‍ ഇനത്തില്‍ പ്രതിഫലം നല്‍കുന്നതില്‍ റിസര്‍വ് ബാങ്ക് നേരത്തെ പുറപ്പെടുവിച്ച ഉത്തരവ് പാലിച്ചില്ലെന്ന കാരണം ഈ ഉത്തരവില്‍ വ്യക്തമാക്കിയിരിക്കുന്നു.
നിലവില്‍ രാജ്യത്തെ ഏറ്റവും വലിയ ബാങ്കാണ് എസ്ബിഐ. ഇവര്‍ക്ക് 2019 ലും റിസര്‍വ് ബാങ്ക് പിഴയിട്ടിരുന്നു. ഏഴ് കോടി രൂപയായിരുന്നു അന്ന് പിഴയിട്ടത്. നിഷ്‌ക്രിയ ആസ്തികളും തട്ടിപ്പുകാരെ കൈകാര്യം ചെയ്യുന്നതിലും വീഴ്ച വരുത്തിയതിനായിരുന്നു പിഴ. ഇന്ന് ഉച്ചയ്ക്ക് ഒരു മണിക്കുള്ള കണക്കില്‍ എസ്ബിഐ ഓഹരികള്‍ 373 രൂപയ്ക്കാണ് വില്‍ക്കപ്പെടുന്നത്. ഓഹരി വിലയില്‍ 1.31 ശതമാനത്തിന്റെ ഇടിവാണ് രേഖപ്പെടുത്തിയിരിക്കുന്നത്.
