ന്യൂഡല്‍ഹി:അനില്‍ അംബാനി നാല് ദിവത്തിനകം 453 കോടി രൂപ അടച്ചില്ലെങ്കില്‍ ജയിലിലേക്ക് പോകേണ്ടി വരും. നാഷണല്‍ കമ്പനി ലോ അപ്പല്ലറ്റ് ട്രിബ്യൂണല്‍ സ്വീഡിഷ് ടെലികോം കമ്പനിക്ക് 453 കോടി രൂപ അംബാനി ചൊവ്വാഴ്ച നല്‍കണമെന്ന് കഴിഞ്ഞ ദിവസം വിധിച്ചിരുന്നു. 453 കോടി രൂപ സ്വീഡിഷ് ടെലികോം കമ്പനിക്ക് നല്‍കാതെ അംബാനിക്ക് മറ്റൊരു പോംവഴിയെ പറ്റി ചിന്തിക്കാന്‍ പോലും സാധ്യമല്ല. വിഷയം അതല്ല. അനില്‍ അംബാനി എങ്ങനെയാണ് ഈ പണം കണ്ടെത്തി പ്രശ്ന പരിഹാരത്തിന് മുതിരുന്നത്. ഈ തുക കണ്ടെത്തണമെങ്കില്‍ അംബാനിയുടെ കീഴിലുള്ള സ്വത്തുക്കള്‍ വില്‍ക്കേണ്ടി വരും. അങ്ങനെ സ്വത്തുക്കള്‍ വില്‍ക്കേണ്ടി വന്നാല്‍ അംബാനിക്ക് വലിയ നഷ്ടമാണ് ബിസിനസ് ലോകത്ത് നേരിടേണ്ടി വരിക.
അതേസമയം എസ്ബിഐ ഉള്‍പ്പടെയുള്ള ബാങ്കുകളോട് ടാക്‌സ് റീ ഫണ്ട് ഇനത്തില്‍ 260 കോടി രൂപ നല്‍കാന്‍ അനുവദിക്കണമെന്ന ആവശ്യം കോടതി തള്ളി. അതേസമയം ആകെ നല്‍ാകനുള്ള 571 കോടി രൂപയില്‍ 118 കോടി രൂപ ഇതിനകം അംബാനി നല്‍കിയിട്ടുണ്ട്. ബാങ്കുകള്‍ റീ ഫണ്ട് നല്‍കാതെ അംബാനിക്ക് ഈ പ്രതിസന്ധിയില്‍ നിന്ന് കരകയറാനാകില്ല. റീ ഫണ്ട് അനുവദിക്കാന്‍ അംബാനിക്ക് സുപ്രീം കോടതിയെ സമീപിക്കാമെന്നും ട്രിബ്യൂണല്‍ വ്യക്തമാക്കി.
