കൊറോണ പ്രതിസന്ധി കാലം കൂടി ഉള്‍പ്പെട്ട മാര്‍ച്ച് 31 ന് അവസാനിച്ച സാമ്പത്തിക വര്‍ഷത്തില്‍ എല്‍ഐസിയ്ക്ക് റെക്കോഡ് നേട്ടം. കഴിഞ്ഞ ആറ് വര്‍ഷത്തിനിടെ ഏറ്റവും കൂടുതല്‍ പോളിസികള്‍ വിറ്റഴിക്കാന്‍ ഇക്കാലയളവില്‍ എല്‍ ഐ സിയ്ക്കായി.
പുതിയ പോളിസികളുടെ വില്‍പന 2.19 കോടിയായി ഉയര്‍ന്നപ്പോള്‍ ആദ്യ പ്രീമിയം വരുമാനവും ഉയര്‍ന്നു. ഇന്‍ഷൂറന്‍സ് റെഗുലേറ്ററി അതോറിറ്റി പുറത്തിറക്കിയ കണക്ക് പ്രകാരം എല്‍ ഐ സിയ്ക്ക് കഴിഞ്ഞ സാമ്പത്തിക വര്‍ഷത്തില്‍ വളര്‍ച്ച 25 ശതമാനത്തില്‍ അധികമാണ്. അതേസമയം സ്വകാര്യ കമ്പനികളുടെ പ്രീമിയം വര്‍ധനയില്‍ 11.64 ശതമാനമാണ് കൂടിയത്. കോവിഡ് പ്രതിസന്ധി കാലഘട്ടത്തിലും എല്‍ ഐ സി മികവ് കാട്ടിയത് ഇന്‍ഷൂറന്‍സ് രംഗത്തെ വര്‍ധിച്ചു വരുന്ന ആവശ്യത്തിന്റെ സൂചനയാണെന്ന് വിലയിരുത്തപ്പെടുന്നു.
ഐ ആര്‍ ഡി എ ഐ കണക്കനുസരിച്ച് 2019-20 ലെ ബിസിനസ് പ്രീമിയം 1.77 ലക്ഷം കോടി രൂപയാണ്. മുന്‍ വര്‍ഷം ഇത് 1.42 ലക്ഷം കോടി രൂപയായിരുന്നു. വര്‍ധന 25.17 ശതമാനം. എല്‍ ഐ സി യില്‍ ഏറ്റവും കൂടുതല്‍ ബിസിനസ് നടക്കാറുള്ളത് മാര്‍ച്ച് മാസത്തിലാണ്. എന്നാല്‍ കൊറോണയെ തുടര്‍ന്ന രാജ്യത്ത് ലോക്ഡൗണ്‍ പ്രഖ്യാപിക്കപ്പെട്ട കാലയളവില്‍ പോലും കച്ചവടം കൂടി.എല്‍ ഐ സി പെന്‍ഷന്‍, ഗ്രൂപ്പ് സ്‌കീമുകളും ഇക്കാലയളവില്‍ റെക്കോഡിട്ടു.
